شىعىس قازاقستان وبلىسى ءۇرجار اۋدانى، قاراتۋما اۋىلىنىڭ تۇرعىنى راقىمبەردى قىدىرمولدين اياگوز قالاسى اياگوز اۋدانىنىڭ ىشكى ىستەر بولىمشەسىنە تەرگەۋگە قاتىسقان سوڭ كوز جۇمعان دەپ حابارلايدى قامشى اقپاراتتىق اگەنتتىگى وبەكتيۆ.kz- كە سىلتەمە جاساپ.

بۇل تۋرالى 53 جاستاعى ەر ادامنىڭ جاقىندارى ايتىپ بەرگەن.

قايعىلى جاعداي 18 ماۋسىمدا ورىن العان. مارقۇمنىڭ جۇبايىنىڭ ايتۋىنشا راقىمبەردى اۋىلدان اياگوزگە قاراي تاعى 4 تۋىسقانىمەن بىرگە جولعا شىققان. قارسى بەتكە كەزدەيسوق شىعىپ كەتكەن ونىڭ كولىگىن جول پوليسياسى توقتاتىپ الادى. ونىڭ اۆتوكولىگىمەن بىرگە تاعى ءبىر كولىكتى توقتاتادى. الايدا ەكىنشى اۆتوكولىككە پروتوكول جازىپ بەرىپ تەز جىبەرە سالعان. ال راقىمبەردىنى پوليسەيلەر كولىگىنە وتىرعىزىپ بەلگىسىز باعىتتا الىپ كەتكەن. جارتى ساعاتتان سوڭ ولار قايتىپ كەلگەن.

«راقىمبەردى ورالعان سوڭ ءوزىن ناشار سەزىنىپ، ءتۇرى بوزارىپ كوڭىل-كۇيى مۇلدەم تۇسىڭكى بولدى»-دەيدى ونىڭ ايەلى.  «پوليسەيلەردىڭ بىرەۋى ءبىزدىڭ كولىككە وتىرىپ راقىمبەردىنىڭ جۇرەگىنىڭ اۋىرىپ تۇرعانىنا قاراماستان ىشكى ىستەر بولىمشەسىنە اپارامىز دەدى. ىشكى ىستەر بولىمىندە راقىمبەردىنى 3 ساعات بويى ۇستادى»-دەيدى ونىڭ جاقىندارى.

تەك 3 ساعات وتكەن سوڭ بولىمشەگە جەدەل جاردەم كەلىپ جەتكەن. تەك ساعات 14:00-دە عانا بولىمشە قىزمەتكەرلەرى ونىڭ جاقىندارىنا راقىمبەردىنىڭ قازا تاپقانىن دەنەسىنىڭ مورگتا ەكەنىن جەتكىزگەن.

بەلگىلى بولعانداي ءاىىب الدىنا جەدەل جاردەم قىدىرمولدين قازا تاپقان سوڭ كەلگەن.  مارقۇمنىڭ جاقىندارى پوليسەيلەردىڭ نە سەبەپتى راقىمبەردىنى ءوز كابينەتتەرىندە 3 ساعاتتان اسا ۇستاعانىن ونىڭ نەدەن قازا تاپقانىن بىلمەي قاتتى قىنجىلۋدا. وسىعان بايلانىستى ونىڭ جاقىندارى پوليسيادان مارقۇممەن سويلەسكەن بەينەجازبانى كورۋدى تالاپ ەتىپ وتىر. الايدا ەكىنشى جاق ولاردىڭ تالابىن قاناعاتتاندىرماي وتىر. مارقۇمنىڭ جاقىندارى تاعى دا سوت مەدەسينالىق ساراپتاما جۇرگىزىلۋىن سۇراپ وتىر. راقىمبەردىنىڭ ولىمىنە جاۋاپتى ادامداردىڭ جازاسىن وتەۋىن تالاپ ەتۋدە.

شولۋشى: نازەركە مۇسا