بايقوڭىر توڭىرەگىندە وبا ىندەتى تابىلدى دەپ جازادى قازاقپارات. اسا ءقاۋىپتى جۇقپالى اۋرۋ ورىن العان جاعداي تۋرالى قالا اكىمشىلىگىنىڭ رەسمي سايتىندا حابارلاندى. اكىمشىلىك بايقوڭىر تۇرعىندارىن قالا سىرتىنا شىققاندا اباي بولۋعا شاقىردى. «قالا اكىمشىلىگىنىڭ ەسكەرتۋ جانە توتەنشە جاعدايدى جويۋ جانە ءورت قاۋىپسىزدىگىن قامتاماسىز ەتۋ جونىندەگى كوميسسياسى «بايقوڭىر» كەشەنى اۋماعىنىڭ توڭىرەگىندەگى تابيعي-وشاقتىق اسا ءقاۋىپتى جۇقپالى اۋرۋ - وبا بويىنشا ورىن العان ەپيدەميولوگيالىق جاعدايعا بايلانىستى قالا سىرتىنا شىققاندا ساقتىق تانىتىپ، اباي بولۋعا شاقىرادى»، - دەلىنگەن حابارلامادا.

قالادا توتەنشە جاعدايدى جويۋ جانە ەسكەرتۋ جونىندەگى كوميسسيانىڭ كەزەكتەن تىس وتىرىسى ءوتتى. «كەشەن بويىنشا باس مەملەكەتتىك سانيتارلىق دارىگەر سەرگەي وگار مەن رەسەي فەدەرالدى مەديكو-بيولوگيالىق اگەنتتىگى №1 ورتالىق مەديكو-سانيتارلىق ءبولىمىنىڭ باستىعى مىندەتىن اتقارۋشى  سەرگەي رومانوۆ جاساعان باياندامادا «بايقوڭىر» كەشەنى اۋماعىنىڭ توڭىرەگىندە تابىلعان تابيعي-وشاقتىق اسا ءقاۋىپتى جۇقپالى اۋرۋ - وبا بويىنشا ورىن العان ەپيدەميولوگيالىق جاعداي تۋرالى ءمالىم ەتىلدى. تالقىلاۋ ناتيجەسىندە ءىس-شارالاردى كۇشەيتۋ جانە قالا تۇرعىندارىنا بولعان جاعداي تۋرالى اقپارات تاراتۋ شەشىمى قابىلداندى»، - دەپ حابارلادى قالا اكىمشىلىگى.