الماتىدا 17 جاستاعى ۆەلوشاباندوز قىز قايتىس بولعانى جايىندا حابارلانعان. سولتۇستىك قازاقستاننان جارىسقا كەلىپ، اۋرۋحانادان ءبىراق شىققان دانا احمەتوۆا بىرنەشە كۇن ءحال ۇستىندە جاتىپ تىلگە كەلمەستەن كوز جۇمعان. دارىگەرلەردىڭ ايتۋىنشا، سپورتشىعا كۇن ءوتىپ كەتكەن. ال بويجەتكەننىڭ تۋىستارى وعان دەر كەزىندە كومەك كورسەتىلمەدى دەپ وتىر.

ۆەلوسپورتتان قازاقستان قۇراماسىنىڭ مۇشەسى دينا احمەتوۆا الماتىعا جاستاردىڭ 4ء-شى سپورتتىق ويىنىنا قاتىسۋ ءۇشىن كەلگەن. سولتۇستىكتىڭ نامىسىن قورعاپ جۇرگەن جاس تالانت وقۋ-جاتتىعۋ بارىسىندا ەسىنەن تانىپ قۇلاپتى. دەرەۋ جەدەل جاردەممەن بىردەن اۋرۋحاناعا جەتكىزىلگەن. الايدا، بىرنەشە كۇن ءحال ۇستىندە جاتىپ، اقىرى تىلگە كەلمەستەن كوز جۇمدى.

№7 قالالىق اۋرۋحانانىڭ باس دارىگەرى مارات ابدۋللايەۆتىڭ ايتۋىنشا، ورگانيزمنىڭ سۋسىزدانۋى سالدارىنان بالا قيىن جاعدايعا كەلگەن. ودان كەيىن باۋىرى، بۇيرەكتەرى، باسقا ورگاندارى زاقىم العان. بارلىق ماماندار جيناپ كونسيليۋم وتكىزگەن، الايدا بەس كۇننەن كەيىن بالا قايتىس بولىپ كەتتى. بۇل تۋرالى كتك جاڭالىقتار قىزمەتى حابارلايدى.

ماماندار سپورتشىعا كۇن وتكەن دەپ وتىر. اعزاسىنداعى سۋى ازايىپ، كەي مۇشەلەرى جۇمىسىن توقتاتقان. الايدا دينانىڭ تۋىستارى بۇل پىكىرمەن كەلىسپەيدى. ولار قايعىلى جاعداي جارىستى ۇيىمداستىرۋشىلاردىڭ سالعىرتتىعىنان بولدى دەگەن پىكىردە. سەبەبى، قىز ەسىنەن تانىپ قۇلاعاندا وعان العاشقى كومەك كورسەتىلمەپتى.

قايعىدان قان جۇتىپ وتىرعان دانانىڭ اكەسى جانبولات احمەتوۆ بىلاي دەيدى:

-ونىڭ دەنساۋلىعى وتە جاقسى بولعان. ءوزى ۇلتتىق قۇرامانىڭ مۇشەسى عوي. مىقتى ەدى. جاتتىقتىرۋشىسى ودان الەم چەمپيونىن شىعارام دەيتىن. ءبىراق وكىنىشكە قاراي ول ارمان ورىندالمادى.

ون ءتورت جاسىندا سپورتقا كەلىپ ءۇش جىلدا ءبىراز بەلەستى باعىندىرعان دينا احمەتوۆاعا باپكەرلەرى راسىمەن دە ۇلكەن ءۇمىت ارتقان ەكەن. ول 2016 جىلدان باستاپ وليمپيادالىق دايارلاۋ تىزىمىنە كىرگىزىلگەن. ءقازىر قىزدىڭ دەنەسىنە ساراپتاما جۇرگىزىلىپ جاتىر. كەيىن ونى جەرلەۋ ءۇشىن تۋعان ءوڭىرى قىزىلجارعا الىپ كەتەدى.