اقتوبەدە تۇراتىن 71 جاستاعى ليديا جيتنيەۆا ۋكراينادا ومىرگە كەلگەن. قازاقستانعا قونىس اۋدارعانىنا 40 جىلدان اسىپ كەتىپتى. 90 جىلداردىڭ باس كەزىندە بولعان قاتتى سۋ تاسقىنى ونىڭ بۇكىل قۇجاتتارىن شايىپ كەتكەن. سودان بەرى ول ەش قۇجاتسىز ءومىر ءسۇرىپ كەلەدى، دەپ حابارلايدى قامشى اقپاراتتىق اگەنتتىگى 31 ارناعا سىلتەمە جاساپ.
ليديا جيتنيەۆا 25 جىلدان بەرى قۇجاتتارىن قالپىنا كەلتىرە الماي ءجۇر. ول كەزدە ولار لاشىق سەكىلدى ۇيدە تۇرىپ جاتقاندىقتان، مۇلىكتەرى مەن قۇجاتتارىن سۋدان قۇتقارىپ قالا الماعان. وسى ۋاقىت ىشىندە ول ءوز ەركىمەن ۋكرايناعا دا حات جازعان.
ءقازىر قارت ايەل زەينەتاقى المايدى، زاڭدى تۇردە دارىگەرگە دە قارالۋ قۇقىعى جوق. ۋكراينادا جۇرگەن كەزىندە شاحتادا جۇمىس ىستەگەن، ال قازاقستانعا كەلىپ قۇرىلىسقا ارالاسىپتى. ءقازىر قىزىمەن بىرگە جاتاقحانادا تۇرىپ جاتىر.
ءبىراق بۇل باسپانا دا وزدەرىنە تيەسىلى ەمەس. كولەمى 80 شارشى مەتر بولاتىن پاتەر ونىڭ بۇرىنعى كۇيەۋ بالاسىنىڭ مەنشىگى ەكەن. وسىلايشا تامىز ايىندا پاتەردى سوعان قايتارىپ بەرمەك.
“زەينەتاقى المايمىن. قانشا حات جازسام دا ۋكراينادان جاۋاپ جوق. ءۇيدى وتكىزگەن سوڭ قايدا تۇراتىنىمدى دا بىلمەيمىن”، – دەيدى ول.
جيتنيەۆا ميگراسيالىق پوليسياعا ەكى جىل بۇرىن شاعىم ءتۇسىردىم دەيدى. الايدا پوليسەيلەر وزدەرىنە ايەلدىڭ كەشە عانا كەلگەنىن ايتادى.
“ول قۇجاتىن قالپىنا كەلتىرۋ ءۇشىن باسقا قۇجاتتاردى جيناۋى ءتيىس. ول – مەكەن-جاي انىقتامالىعى، تۋۋ تۋرالى كۋالىك، قىزىنىڭ نەمەسە كۇيەۋىنىڭ جەكە كۋالىگى. سوسىن ءبىز بارلىق جينالعان قۇجاتتاردى ۋكرايناعا جىبەرەمىز”، – دەيدى اقتوبە قالالىق پوليسيا باسقارماسى ميگراسيالىق پوليسيا باسشىسى گۇلبانۋ مۇحتاروۆا.
ميگراسيالىق پوليسيانىڭ ايتۋىنشا، دونباسستا ءقازىر بولىپ جاتقان اسكەري قيمىلدارعا بايلانىستى ونداعى مۇراعات قۇجاتتارى ءجيى جوعالادى، ءتىپتى ورتەنىپ تە كەتەدى. سول سەبەپتى ول جاقتان جاۋاپ ۇنەمى كەشىگىپ كەلەدى ەكەن.
