پارلامەنت سەناتىنىڭ ءتوراعاسى قاسىم-جومارت توقايەۆ 28 ماۋسىمدا وتكەن سەنات دەپۋتاتتارى سايلاۋىندا سايلانعان جوعارعى پالاتا مۇشەلەرىمەن كەزدەستى دەپ حابارلايدى قامشى اقپاراتتىق اگەنتتىگى ق ر پارلامەنت سەناتىنىڭ باسپا ءسوز قىزمەتىنە سىلتەمە جاساپ.
ق.توقايەۆ ايماقتارداعى ءماسليحات دەپۋتاتتارى مەن حالىقتىڭ ولارعا كورسەتكەن سەنىمنىڭ جوعارى دەڭگەيىن اتاپ ءوتىپ، سەناتتىڭ جاڭا مۇشەلەرىن قۇتتىقتادى. سپيكەر ولاردىڭ ءتۇرلى سالالارداعى ەڭبەكتەرى بارىسىندا جيناقتاعان مول تاجىريبەلەرى پارلامەنتتە تابىستى قىزمەت ەتۋىنىڭ كەپىلى بولارىنا سەنىم ءبىلدىردى.
«كەلەسى سەسسيادا الدىمىزدا قاۋىرت جۇمىستار كۇتىپ تۇر. ەڭ الدىمەن، ەلباسىنىڭ ساياساتىن زاڭنامالىق تۇرعىدان قولداۋ جانە جۇزەگە اسىرۋ بويىنشا اتقارىلىپ جاتقان كەشەندى جۇمىستاردى جالعاستىراتىن بولامىز. جالپى، بۇگىنگى كۇنى پارلامەنت قاراۋىندا 30-عا جۋىق زاڭ جوباسى بار»،- دەپ اتاپ ءوتتى ق.توقايەۆ.
سەنات ءتوراعاسى جاڭا دەپۋتاتتاردى پالاتا جۇمىسىنىڭ ەرەكشەلىكتەرى تۋرالى حاباردار ەتتى جانە پالاتانىڭ كەلەسى سەسسياسىنىڭ كەزەكتى وتىرىسىندا پارلامەنت پەن سەنات رەگلامەنتىنە تۇزەتۋلەر ەنگىزىلۋى كۇتىلىپ وتىرعانىن ەسكە سالدى.
سول كۇنى ق.توقايەۆ وكىلەتتىلىك مەرزىمى اياقتالعان سەناتورلارمەن كەزدەستى. سپيكەر، زاڭ شىعارۋ قىزمەتىنە ۇلكەن ۇلەس قوسقانى، ەل ومىرىندەگى الەۋمەتتىك-ەكونوميكالىق جانە ساياسي وزگەرىستەرگە بەلسەندى قاتىسقانى ءۇشىن پارلامەنتشىلەرگە العىسىن ءبىلدىردى. كەزدەسۋ سوڭىندا ولار سەنات ءتوراعاسىنىڭ العىس حاتىمەن جانە سەناتتىڭ قۇرمەت گراموتاسىمەن ماراپاتتالدى.
