بالقاشتا جاپپاي زورلانعان نۇرگۇل قۇسىلبەكوۆا كۇدىكتىلەر قاماۋعا الىنۋى ءۇشىن ءبىر جىل ۋاقىت كۇرەسكەن. اتىشۋلى ءىس بىرنەشە رەت جابىلىپ، كەيىن قايتا قوزعالعان بولاتىن. باق-تاردا وسى ءىس جايلى جاريالانعان سوڭ عانا كۇدىكتىلەر قاماۋعا الىنىپ وتىر، - دەپ حابارلايدى قامشى اقپاراتتىق اگەنتتىگى Tengrinews.kz سايتىنا سىلتەمە جاساپ.

"كۇدىكتىلەرگە قاتىستى بۇلتارتپاۋ شاراسى رەتىندە ەكى ايعا قاماۋعا الۋ تۋرالى ۇكىم شىقتى"، - دەپ حابارلايدى بالقاش قالالىق سوتىنداعىلار.

جاپپاي زورلاۋ وقيعاسى 2016 جىلدىڭ تامىزىندا بولعان. نۇرگۇل قۇسىلبەكوۆانىڭ ايتۋىنشا، ەكى ەر ادام ونى زيراتقا اپارىپ، جاپپاي زورلاپ، كۇرەكپەن ۇرىپ-سوققان. سودان وعان مولا قازا باستاعان. ابىروي بولعاندا، ايەل قاشىپ شىعىپ، پوليسياعا حابار بەرگەن. الايدا ايعاقتارعا قاراماستان پوليسيا بۇل ءىستى ۇزاققا سوزىپ جىبەرگەن، ءتىپتى كەيىن ءىستى جاۋىپ تاستاعان. زارداپ شەككەن ايەلدىڭ ايتۋىنشا، ءىستىڭ جابىلعانى جايلى وعان ەشكىم دە ايتپاعان. ال سوتقا دەيىنگى تەرگەۋ بارىسىندا جينالعان ماتەريالداردىڭ بارلىعى جوعالىپ كەتكەن.

"ماعان قوعام مەن ءتارتىپ ساقشىلارىنا ب ا ق ارقىلى شىعۋعا تۋرا كەلدى. وسىعان دەيىن مەن "نە مولچي" قورىنا بارعان بولاتىنمىن. مەن ءۇشىن بۇل وڭاي بولعان جوق. وسىلايشا، مەن ءىستى قايتا تەرگەۋدى باستادىم. بالقاشتاعى تەرگەۋشى ەشتەڭەنى دە شەشكەن جوق. ىستەگى ماتەريالداردىڭ ءبىر بولىگى جوعالىپ كەتكەن. ونىڭ دا جازالانۋىن سۇرايمىن. مۇنى قالاي تۇسىنۋگە بولادى؟ سالعىرتتىق؟"، - دەيدى زارداپ شەككەن ايەل.

"تەرگەۋشى راحمەتوۆ ءىستى قايتا تەرگەدى، بارلىق ماتەريالدى جينادى. وعان العىسىمدى بىلدىرەمىن. كۇدىكتىلەر دە قاماۋعا الىندى. وسىعان دەيىن دالاعا شىعۋعا قورقاتىنمىن. ولاردىڭ جازالانعانىن قالايمىن. ايتپەسە مەنىڭ ورنىمدا باسقا دا ايەلدەر بولۋى مۇمكىن عوي. سونداي-اق، بالقاشتاعى تەرگەۋشىنىڭ نەلىكتەن وسى ءىستى سوڭىنا دەيىن اياقتاماعانىن انىقتاۋىن سۇرايمىن"، - دەيدى نۇرگۇل قۇسىلبەكوۆا.

وسى ۋاقىت بويى، ياعني تەرگەۋ كەزىندە نۇرگۇل تەمىرتاۋداعى داعدارىس ورتالىعىندا تۇردى. دەنساۋلىعىنداعى پروبلەمالارعا بايلانىستى جۇمىسقا تۇرا الماي ءجۇر ەكەن. نۇرگۇل قۇسىلبەكوۆانىڭ ايتۋىنشا، ونىڭ بۇيرەگى اۋىرادى. باسىن جاراقاتتاپ الۋىنا بايلانىستى ەنسەفالوپاتيا (مي دەرتى) ميىنداعى جاسۋشالاردىڭ ءبىر بولىگى جۇمىس ىستەمەيدى.