نۇرسۇلتان نازاربايەۆ قازاقستاندا تىركەلگەن ديپلوماتيالىق ميسسيالار جانە حالىقارالىق ۇيىمدار وكىلدىكتەرىنىڭ باسشىلارىمەن كەزدەستى. بۇل تۋرالى قامشى اقپاراتتىق اگەنتتىگى اقوردانىڭ باسپا ءسوز قىزمەتىنە سىلتەمە جاساپ حابارلايدى.

مەملەكەت باسشىسى بيىل ەلىمىزدىڭ سىرتقى ساياسات سالاسى ءۇشىن مەرەيلى مەجە بولىپ سانالاتىنىن، وسىدان 25 جىل بۇرىن قازاقستاننىڭ ديپلوماتيالىق قىزمەتىن قۇرۋ تۋرالى جارلىققا قول قويىلعانىن اتاپ ءوتتى.

– تاۋەلسىزدىكتىڭ العاشقى جىلدارىندا ءبىزدىڭ باسقا مەملەكەتتەرمەن ءوزارا ءىس-قيمىل جاساۋ جونىندەگى تاجىريبەمىز دە، ءوزىمىزدىڭ ديپلوماتيالىق قىزمەتىمىز دە بولعان جوق. ديپلوماتيالىق كادرلاردىڭ تاپشىلىعى ەرەكشە بايقالدى، – دەدى قازاقستان پرەزيدەنتى.

نۇرسۇلتان نازاربايەۆ بۇل پروبلەمالار رەسپۋبليكاداعى كۇردەلى الەۋمەتتىك-ەكونوميكالىق جاعدايمەن تۇسپا-تۇس كەلگەنىن ايتتى.

– قىسقا ۋاقىت ىشىندە ديپلوماتيالىق كورپۋس قۇرىپ، ءوز ەلشىلەرىمىزدى شەت ەلدەرگە جىبەرۋگە مۇمكىندىك الدىق. مىنە، شيرەك عاسىردان كەيىن ەلىمىزدىڭ سىرتقى ساياساتى تولىق قالىپتاستى دەپ ايتا الامىن، – دەدى مەملەكەت باسشىسى.

سونىمەن قاتار، قازاقستان پرەزيدەنتى ەگەمەندىگىمىزدىڭ العاشقى جىلدارىندا ەلىمىزدە اۋماقتىق تۇتاستىعىمىز بەن ۇلتتىق تاۋەلسىزدىگىمىزدى ساقتاپ، قاۋىپسىزدىگىمىزدىڭ بەرىك كەپىلىن قالىپتاستىرا العانىمىزدى اتاپ ءوتتى.

– قازىرگى كەزدە استانا حالىقارالىق يادرولىق قارۋعا قارسى قوزعالىستىڭ كوشباسشىسى بولىپ سانالادى جانە الەمدەگى ستراتەگيالىق تۇراقتىلىق پەن ادىلەتتىلىكتى قامتاماسىز ەتۋ ىسىنە زور ۇلەس قوسىپ كەلەدى، – دەپ تۇيىندەدى نۇرسۇلتان نازاربايەۆ.

بۇدان بولەك، مەملەكەت باسشىسى قازاقستاننىڭ وڭىرلىك ەكونوميكالىق ينتەگراسيا مەن كووپەراسيا اياسىندا ءتۇرلى جوبانىڭ باستاماشىسى بولىپ سانالاتىنىن ايتتى.

– جالپى، قازاقستاندا جۇرگىزىلىپ جاتقان كوپۆەكتورلى سىرتقى ساياسات پەن ەلىمىزدىڭ حالىقارالىق باستامالارى الەمدە كەڭ قولداۋعا جانە تانىمالدىلىققا يە بولدى، – دەپ قورىتىندىلادى نۇرسۇلتان نازاربايەۆ.

شولۋشى: ايگەرىم تاۋباي