«باياناۋىل» تابيعي ۇلتتىق پاركىنىڭ قىزمەتكەرى جاسىباي كولىنە دەمالۋعا كەلەتىن تۋريستەردىڭ كوبى تازالىققا سەلقوس قارايتىنىن ايتتى، دەپ حابارلايدى pavlodarnews.kz ءتىلشىسى. «باياناۋىل» تابيعي ۇلتتىق پاركى «جاسىباي» ورمانشىلىعىنىڭ ورمان شەبەرى جۇلدىز  تۇياقبايەۆتىڭ سوزىنشە، جاسىباي كولى مەن ورمانىن كۇزەتۋگە ياعني، ءورتتىڭ الدىن الىپ، كول جاعالاۋىنىڭ تازالىعىن ساقتاۋ ءۇشىن التى ادام عانا جۇمىلدىرىلعان.

- تاڭنان قارا كەشكە دەيىن ءۇي بەتىن كورمەيمىز. ويتكەنى، التى ادام جاسىبايدىڭ بۇكىل ورمانى مەن كولىن قاداعالاۋعا ۇلگەرمەي قالادى. التى ادامعا ءبىر عانا «نيۆا» اۆتوكولىگى بەرىلگەن. دەمالۋشىلاردىڭ اراسىندا نەبىر ءسوز ۇقپايتىن ادامدار بولادى. تازالىق ساقتاڭدار دەسەك وزىمىزگە قارسى شىعىپ، وزدەرىنىڭ بىلگەنىن ىستەگىسى كەلەدى.

كاتامارانمەن كولدە ءجۇزىپ ءجۇرىپ، ىشكەن سۋسىندارىنىڭ ىدىستارىن لاقتىرىپ كەتەدى. كۇن جىلى كەزدە ولار تۇندە تاۋعا شىعىپ كەتەدى دە وت جاعادى. ەندى ونى وشىرمەي كەتەتىن بولسا بۇكىل ورمان ورتكە ورانۋى ابدەن مۇمكىن. سوندىقتان، ولاردىڭ ءاربىرىنىڭ ارتىنان ەرىپ ءجۇرىپ، تۇنگى ساعات 12-دە وتتارىن ءسوندىرىپ، قوناقۇيگە قايتارامىز. ەگەر، قانداي ءبىر توتەنشە جاعداي ورىن السا، بارلىعىنا ءبىز جاۋاپ بەرەمىز.

ءبىراق، سونى جۇرت تۇسىنە بەرمەيدى، - دەيدى جۇلدىز تۇياقبايەۆ. «باياناۋىل» تابيعى ۇلتتىق پاركىنىڭ تۋريزم جونىندەگى ينجەنەرى سۇلتان اردابايدىڭ سوزىنشە، جاسىباي كولىنىڭ جاعاسىندا ءبىر ايدا 20 مىڭنان استام ادام دەمالادى. بيىلعى جىلعى دەمالىس ماۋسىمى اشىلعان كۇننەن باستاپ، 40 مىڭنان استام ساياحاتشى كەلگەن. ۇلتتىق پارككە قاراستى «باياناۋىل، «جاسىباي» جانە «دالبا» ورمانشىلىعىنىڭ قىزمەتكەرلەرى ءار اپتانىڭ جۇما جانە سەنبى كۇندەرى تازالىق جۇرگىزىپ تۇرادى.

شولۋشى: اسەل بولات قىزى