مەملەكەت باسشىسى ەلوردانىڭ اينالاسىنداعى جاسىل ايماقتى تىكۇشاقپەن ارالاپ، وعان قىرعاۋىلدار مەن ەلىكتەر جىبەرۋدىڭ ءداستۇرلى شاراسىنا قاتىستى. سونداي-اق، ءىس-شارا سوڭىندا بۇقارالىق اقپارات قۇرالدارىنىڭ وكىلدەرى ءۇشىن بريفينگ وتكىزدى.

قازاقستان پرەزيدەنتى بۇگىندە استانا ماڭىنداعى 80 مىڭعا جۋىق گەكتار جەرگە اعاش وتىرىزىلعانىن جانە 2020 جىلعا قاراي ونىڭ اۋماعى 100 مىڭ گەكتارعا جەتەتىنىن اتاپ ءوتتى.

نۇرسۇلتان نازاربايەۆ «جاسىل جەلەكتەگى» جان-جانۋارلار مەن وسىمدىك الەمىنىڭ ارتۇرلىلىگىنە نازار اۋدارىپ، اعاش ەگۋدى كوبەيتۋ جونىندەگى جوسپارلار تۋرالى ايتتى.

– عالىمدار مەن ورمانشىلارعا اتقارعان جۇمىستارى ءۇشىن العىس بىلدىرەمىن. بۇل جەردە اعاش ءوسىرۋ وڭاي شارۋا ەمەس. ءقازىر مۇندا ۇلكەن ورمان القابى پايدا بولدى. استانانىڭ اينالاسىنداعى ورمان كەڭىستىگى جان-جانۋارلار مەن قۇستار ەمىن-ەركىن مەكەن ەتەتىن تابيعي القاپقا اينالدى، – دەدى ەلباسى.

مەملەكەت باسشىسى قالا ماڭىنداعى ورمان القابى ەلوردانىڭ قولايلى كليماتىن قالىپتاستىرىپ، ەكولوگياسىن جاقسارتۋدا ماڭىزدى ءرول اتقاراتىنىن اتاپ ءوتتى.

سونىمەن بىرگە، قازاقستان پرەزيدەنتى ورمان القابىنىڭ اۋماعىندا رەكرەاسيالىق ايماق سالۋ ناتيجەلەرىنە توقتالىپ، «جاسىل جەلەكتى» «ەلىمىزدىڭ تىنىسى» دەپ اتادى.

– ادامدار وسى جەردە قانشا جىل ءومىر سۇرسە، ورمانىمىز دا سونشا ۋاقىت تۇرادى. بۇل – ەلىمىزدىڭ بايلىعى. استانادا «ەكسپو-2017» حالىقارالىق كورمەسى ءوتىپ جاتىر. ول «جاسىل دامۋدىڭ» قاعيداتتارى مەن يدەياسىن ۇستاناتىن قالا رەتىندە استانانىڭ ءيميدجىن نىعايتۋعا سەپتىگىن تيگىزەدى. ەلوردا ىشىندەگى ساياباقتار دا بەلسەندى تۇردە جاقسارتىلۋدا، – دەدى نۇرسۇلتان نازاربايەۆ.

ەلباسى بولاشاق ۇرپاقتى، ءوز ەلىنىڭ ناعىز پاتريوتتارىن تاربيەلەپ وسىرۋدە تابيعاتتى ساقتاۋدىڭ جانە تۋعان جەردى قۇرمەتتەۋدىڭ ماڭىزدىلىعىنا ەرەكشە توقتالدى.

قازاقستان پرەزيدەنتى ورمان القابىنىڭ اۋماعىن تىكۇشاقپەن ارالاپ كورىپ، «بالقاراعاي» دەمالىس ايماعىندا ورنالاسقان ەتنواۋىلدا بولدى، سونداي-اق «جاسىل ايماقتى» دامىتۋ ءۇشىن اتقارىلىپ جاتقان جۇمىستاردىڭ بارىسى مەن ونى ودان ءارى كوگالداندىرۋ جوسپارلارى تۋرالى حاباردار بولدى.

كەڭەستە اۋىل شارۋاشىلىعى ۆيسە-مينيسترى ە.نىسانبايەۆ ەسەپ بەردى. ۆيسە-مينيستردىڭ مالىمەتىنە سايكەس، بۇگىندە 1997 جىلدان باستاپ وتىرعىزىلعان ورمان القابىنىڭ كولەمى 80 مىڭعا جۋىق گەكتارعا جەتتى.

ە.نىسانبايەۆ وتىرعىزىلعان كوشەتتەردىڭ جاعدايىنا ۇدايى مونيتورينگ جاساپ، رەسپۋبليكامىزدىڭ كاسىبي ۇيىمدارىنىڭ قاتىسۋىمەن عىلىمي زەرتتەۋ جۇمىستارىن جۇرگىزۋ استانا قالاسى ماڭىندا «جاسىل جەلەكتى» قالىپتاستىرۋدى قامتاماسىز ەتەتىن نەگىزگى شارا بولىپ سانالاتىنىن ايتتى.

كەڭەسكە پرەزيدەنت اكىمشىلىگىنىڭ باسشىسى ءا.جاقسىبەكوۆ، استانا قالاسىنىڭ اكىمى ءا.يسەكەشيەۆ، اقمولا وبلىسىنىڭ اكىمى م.مىرزالين، پرەمەر-مينيستردىڭ ورىنباسارى – اۋىل شارۋاشىلىعى ءمينيسترى ا.مىرزاحمەتوۆ تا قاتىستى.

جاسىل ايماقتى قالىپتاستىرۋ تۋريزم مەن رەكرەاسيانى دامىتۋعا سەپتىگىن تيگىزەدى. بۇگىندە 10 ورمان پايدالانۋشىعا «جاسىل ايماق» رەسپۋبليكالىق مەملەكەتتىك كاسىپورنىنىڭ مەملەكەتتىك ورمان قورى اۋماعىنان ​مادەني-ساۋىقتىرۋ جانە رەكرەاسيالىق ماقساتپەن ورماندى ۇزاقمەرزىمدى پايدالانۋعا ۋچاسكىلەر بەرىلگەن.

سونداي-اق، استانا قالاسىنىڭ شەتىندە ەلوردا تۇرعىندارى مەن قوناقتارىنىڭ دەمالۋى ءۇشىن قوسشى مەن يلينكا كەنتتەرى اراسىندا ۆەلوسيپەد جولى سالىندى. بۇل جاڭا تەحنولوگيالىق ستاندارتتارعا ساي سالىنعان جانە ۇزىندىعى 23 شاقىرىمدى قۇرايتىن ءارى ورماندى جەردە ورنالاسقان ەل اۋماعىنداعى بىردەن-بىر ۆەلوسيپەد جولى سانالادى. قالا اكىمشىلىگى استانا اينالاسىنداعى ۆەلوسيپەد جولى جەلىسىن 258 شاقىرىمعا دەيىن ۇزارتۋدى جوسپارلاپ وتىر.