استانادا اشىلعان «شانحاي اپتالىعى» حالىقارالىق كورمەسىنە پلاستيك بوتەلكەلەردىڭ قالدىقتارىنان جاسالعان شاباداندار قويىلدى، دەپ حابارلايدى قامشى اقپاراتتىق اگەنتتىگى قازاقپاراتقا سىلتەمە جاساپ.

قاجەتسىز پلاستيك بوتەلكەلەردى قايتا وڭدەۋ جولىمەن جاسالعان بۇل جولساندىقتاردى «Shangtex Holding» كورپوراسياسى قۇرامىنداعى Newest كومپانياسى قازاقستانعا العاش رەت اكەلىپ وتىر.

«بۇل ءتاسىل قىتايدا 1994 جىلدارى پايدا بولعان. ءبىز كەرەكسىز پلاستيك بوتەلكەلەردى جيناپ، ارنايى ۇساقتايمىز جانە ولاردى ەرىتىپ، تاقتاي ءتارىزدى سىعىمدايمىز. وسىلايشا، دايىن بولعان ماتەريالدى بوياپ، ءتۇرلى-تۇستى شاباداندار ازىرلەيمىز»، - دەيدى كاسىپورىن وكىلدەرى.

مۇنداي شابادانداردىڭ سالماعى 2 كەلىنى قۇرايدى، ال نارىقتاعى قۇنى 120 دوللارعا تەڭ.

سونداي-اق «شانحاي تەكستيل» ماماندارى پلاستيكتەن كيىم دە تىگۋگە بولاتىنىن اتاپ ءوتتى. ولاردىڭ ايتۋىنشا، پلاستيك ماتەريالدان تىگىلگەن كيىمدەر ماقتادان تىگىلگەندەرگە قاراعاندا مىقتىراق ءارى ارزان بولادى.

«ارنايى اپپارات ارقىلى پلاستيكتەن ءجىپ جاسالادى جانە سول جىپتەن كيىمدەر تىگىلەدى. بۇل تاجىريبە قىتايدا كەڭىنەن تاراعان»، - دەيدى ولار.

ايتا كەتەيىك، «ەسكپو-2017» حالىقارالىق كورمەسى اياسىندا بۇگىن Radisson Blu Astana قوناقۇيىندە «شانحاي اپتالىعى» حالىقارالىق كورمەسى اشىلدى.  وندا ەنەرگەتيكا، اۆتوموبيل قۇراستىرۋ، قۇرىلىس، حيميالىق ءوندىرىس، تەكستيل جانە ازىق-تۇلىك ءوندىرىسى سالالارىنداعى شانحايدىڭ بەلدى كاسىپورىندارىنىڭ جاڭا تەحنولوگيالارى، قۇرىلعىلارى مەن تاۋارلارى قويىلعان. كورمە 5 شىلدەگە دەيىن جالعاسادى.