د.ترامپ امەريكا حالقى اتىنان نۇرسۇلتان نازاربايەۆتى جانە قازاقستان حالقىن ورتالىق ازيادا العاش رەت ۇيىمداستىرىلىپ وتىرعان حالىقارالىق «ەكسپو-2017» مامانداندىرىلعان كورمەسىنىڭ وتكىزىلۋىمەن قۇتتىقتادى. بۇل تۋرالى قامشى اقپاراتتىق اگەنتتىگى اقوردانىڭ باسپا ءسوز قىزمەتىنە سىلتەمە جاساپ حابارلايدى.
اقش پرەزيدەنتى وسى جاھاندىق شارانىڭ ارقاسىندا قازاقستاننان جانە دۇنيە ءجۇزىنىڭ تۇكپىر-تۇكپىرىنەن كەلەتىن ميلليونداعان قوناقتار ادام قيالىنان ءنار الاتىن تەحنولوگيالىق يننوۆاسيا مەن 115-تەن استام ۇلتتىق پاۆيلونداردا كورىنىس تاپقان تاماشا ارىپتەستىك الەمىنە كۋا بولاتىنىن ايتقان.
«امەريكا قۇراما شتاتتارى استاناداعى «ەكسپو-2017» كورمەسىنە قاتىسىپ، امەريكانىڭ ەنەرگەتيكا، عىلىم جانە تەحنولوگيا سالالارىنداعى ۇزدىك جەتىستىكتەرىن، سونداي-اق سان قىرلى مادەنيەتىمىزدى كورسەتۋدى زور مارتەبە سانايدى»، – دەلىنگەن حاتتا.
سونداي-اق، د.ترامپ اقش پاۆيلونى وتكەن شيرەك عاسىردا ەلدەرىمىز نىعايتا تۇسكەن ستراتەگيالىق سەرىكتەستىكتىڭ ماڭىزدى نىشانى بولىپ سانالاتىنىن جانە ونىڭ قۇراما شتاتتاردىڭ الداعى ۋاقىتتا دا وڭىردەگى بەيبىتشىلىكتى، تۇراقتىلىق پەن وسىپ-وركەندەۋدى قولداۋعا دەگەن نيەتىن بىلدىرەتىنىن اتاپ ءوتتى.
«پرەزيدەنت مىرزا، «ەكسپو-2017» كورمەسى ارقىلى ەنەرگەتيكالىق قاۋىپسىزدىك ماسەلەلەرى جونىندەگى جاھاندىق ديالوگتى ودان ءارى ىلگەرىلەتۋدەگى ءسىزدىڭ كوزقاراسىڭىز بەن كوشباسشىلىعىڭىز ءۇشىن سىزگە جانە قازاقستانعا ءىلتيپاتىمدى بىلدىرەمىن. ءوزارا سىيلاستىق پەن ورتاق مۇددەگە نەگىزدەلگەن اقش-قازاقستان اراسىنداعى ستراتەگيالىق سەرىكتەستىك ودان ءارى نىعايا تۇسەدى دەپ سەنەمىن»، – دەلىنگەن حاتتا.
شولۋشى: ايگەرىم تاۋباي
