بەلل سورانسەن گاننەسس – 40-تان استام ادامنىڭ ولىمىنە سەبەپشى بولعان قاندى قول قىلمىسكەر ايەل. ونىڭ قۇرباندارىنىڭ اراسىندا ءوزىنىڭ تۋعان بالالارى دا بولعان، سونىمەن قاتار كۇيەۋلەرى مەن كوڭىل بىلدىرگەن ەر ادامدار، دەپ جازادى قامشى اقپاراتتىق اگەنتتىگى شەتەلدىك باق-قا سىلتەمە جاساپ.

مۇنداي جانتۇرشىگەرلىك قىلمىستاردى ول ايەل 1881 جىلى امەريكاعا بارعاننان كەيىن باستاعان. نورۆەگيالىق قىز قاجەتتى قاراجاتتى جيناپ، شەتەلدە كەتۋى ءۇشىن فەرمادا اۋىر جۇمىستار اتقارۋىنا تۋرا كەلگەن. وزىنە كەرەك قاراجاتىن جيناپ بولعاننان كەيىن ءۇيىن تاستاپ، اقش-قا كوشىپ كەتكەن. بۇل ەلگە كەلگەننەن سوڭ ەسىمىن برۋنگيل پولدسدوتتەردەن بەلل دەگەن اتقا اۋىستىرادى. كەيىننەن سول ەلدە ءجۇرىپ ءوزىنىڭ بولاشاق كۇيەۋى مەدس سورەنستى كەزدەستىرەدى.

بەلل قانداي ويمەن كۇيەۋىن ولتىرۋگە بارعاندىعى بەلگىسىز. الايدا بىرنەشە ۋاقىتتان كەيىن ەكەۋىنىڭ كونديتەرلىك مەكەمەلەرى ورتەنىپ، ساقتاندىرۋ كومپانياسى ولارعا قوماقتى قارجى تولەيدى. بۇل وقيعادان كەيىن بەلل وتە ءقاۋىپتى بيزنەستى ويلايدى. سورەنستەردىڭ 4 بالاسى بولعان. سولاردىڭ بىرەۋىن بەلل ساقتاندىرىپ قويۋعا بەل بۋادى. ءدال سول ساقتاندىرعان بالالارى بەلگىسىز قازا تابا باستايدى. الايدا بارلىعىنىڭ ءولىمىنىڭ سەبەبى ءبىر – ۋلانعان. سول ۋاقىتتا بالالارى قازا تاپقان اتا-انالار ساقتاندىرۋ كومپانيالارىنان اقشا الا باستاعان.

بىرنەشە جىل وتكەننەن سوڭ ونىڭ كۇيەۋى قازا تابادى. ءبىر قىزىعى، كوز جۇماردان ءبىر اي بۇرىن ول ءوزىنىڭ ءومىرىن ساقتاندىرىپ قويعان بولاتىن. مۇنى دا سايكەستىك دەپ اتاۋعا بولادى ما؟ دارىگەرلەر ونى جۇرەك تالماسىنان كوز جۇمدى دەپ مالىمدەگەن. ال باسقا دارىگەردىڭ ايتۋىنشا، ول ايەلدىڭ كۇيەۋى ستريحنين اتتى زاتتان ۋلانىپ ولگەن. الايدا، بەلل جۇرتتىڭ ءبارىن ءوزىنىڭ سوزىنە سەندىرىپ، ءمايىتتى كورسەتۋدەن باس تارتقان. كەيىننەن ساقتاندىرۋ كومپانياسى وعان 8 000 اقش دوللارى كولەمىندە قارجى تولەگەن. جيناعان اقشالارىن جانە قالعان بالالارىن الىپ جەسىر ايەل باسقا شتاتقا كوشىپ بارىپ، سول جاقتان جاڭا فەرما اشىپ الادى. الايدا ساقتاندىرۋ ىسىنە قاتىستى ونىڭ الاياقتىعى تولاستاعان ەمەس، بىرنەشە ۋاقىت وتكەننەن كەيىن ول ساقتاندىرىپ قويعان قايىق ورتەنىپ كەتكەن.

1902 جىلى بەلل ەكىنشى رەت تۇرمىس قۇرادى. تويدان كەيىن 12 كۇن وتكەن سوڭ كۇيەۋىنىڭ كىشى قىزى قاتىس بولىپ، 6 اي وتكەن سوڭ پەتەردىڭ ءوزى كوز جۇمادى. سول ۋاقىتتا بەلل اياعى اۋىر بولا تۇرى قالتالى ازاماتتارمەن تانىسا باستاعان. جەسىر ايەلگە كوڭىل بىلدىرۋشىلەر كوپ بولعان، الايدا ونىڭ ماڭىنا جولاعان ادام ءتىرى كۇيىندە قايتىپ كەلمەيتىن.

فەرما كۇزەتشىلەرىنىڭ ءبىرى رەي لامفەر جەسىر ايەلگە ەسسىز عاشىق بولعانى سونشالىق، ونىڭ قيتۇرقى جوسپارلارىنا كومەكتەسۋگە ۋادە بەرگەن. الايدا ءبىراز ۋاقىتتان كەيىن ايەل ول كۇزەتشىنى دە ورعا جىعادى.

فەرما ورتەنەردەن بىرنەشە كۇن بۇرىن بەلل پوليسيا بولىمىنە كەلىپ لافمەردىڭ وزىنە قوقان-لوققى جاساپ جاتقاندىعىن ايتىپ شاعىمدانعان. تۇندە بولعان ورتتەن كەيىن 4 ادامنىڭ ءمايىتى تابىلعان: ونىڭ ۇشەۋى كىشكەنتاي بالالاردىكى بولسا، بىرەۋى باسسىز جاتقان ايەلدىڭ ءمايىتى. ەكسپەرتيزا ناتيجەسى بويىنشا، كىشكەنتاي بالالار ءورت شىققانعا دەيىن ولتىرىلگەن بولسا، باسسىز ايەل بەللدىڭ فەرماسىندا جۇمىس ىستەگەن ەكونوميست قىزدىڭ دەنەسى بولىپ شىققان. ال جەسىر ايەلدىڭ ءوزى ءىز-تۇسسىز جوعالىپ، قاشىپ كەتكەن.

1931 جىلى ول ايەلدى ميسسيسيپيدان كورگەن دەگەن قاۋەسەت تاراعان بولاتىن. ال رەسمي دەرەكتەردە بەلل سورەنسەن گاننەسس 1908 جىلى ءورت كەزىندە قازا تاپتى دەپ كورسەتىلگەن.

اۋدارعان: نازەركە لابيحان