استانا قالاسىنىڭ ەكسپو كونگرەسس ورتالىعىندا «World Robot Olympiad» دەگەن اتاۋمەن روبوتوتەحنيكادان رەسپۋبليكالىق جارىس باستالدى دەپ حابارلايدى قامشى اقپاراتتىق اگەنتتىگى ق ر ءبىلىم جانە عىلىم مينيسترلىگىنىڭ باسپا ءسوز قىزمەتىنە سىلتەمە جاساپ.

رەسپۋبليكالىق سايىسقا ەلىمىزدىڭ تۇكپىر-تۇكپىرىنەن ءۇش جۇزدەن استام مەكتەپ وقۋشىلارى قاتىسىپ جاتىر. جارىس «نەگىزگى»، «شىعارماشىلىق» جانە «روبوت فۋتبولى» كاتەگوريالار بويىنشا وتكىزىلەدى.

روبوتوتەحنيكا بويىنشا ۇلتتىق چەمپيوناتتىڭ اشىلۋىندا جاس دارىنداردى ءبىلىم جانە عىلىم ءمينيسترى ەرلان ساعادييەۆ، «نازاربايەۆ زياتكەرلىك مەكتەپتەرى» دببۇ باسقارماسىنىڭ ءتورايىمى كۇلاش ءشامشيدينوۆا جانە «LEGO Education» كومپانياسىنىڭ تمد بويىنشا وكىلى يۋريي ۆيريچ قۇتتىقتادى.

300 قاتىسۋشىنىڭ 200 استام دەلەگاتتارى زياتكەرلىك مەكتەپتەردە وقيدى. وڭتۇستىك استانامىزدان 30 وقۋشى قاتىسۋدا، ياعني ەڭ كوپ دەلەگاسيانى   الماتى قالاسى قۇراپ وتىر.

بايقاۋدىڭ ەڭ جاس قاتىسۋشىسى – پاۆلوداردان كەلگەن 8 جاسار جاسمين ەششانوۆا. ول بايقاۋدىڭ «نەگىزگى» ساناتىندا ونەر كورسەتەدى. جاسمين ءمينيستردىڭ قولىنان ارنايى سىيلىق – نوۋتبۋك الدى. ونىڭ باپكەرى – نازىم ارىستانبەك قىزى، 2015 جىلعى پاۆلودار قالاسى نازاربايەۆ زياتكەرلىك مەكتەبىنىڭ تۇلەگى، ءۇش توپ دايىندادى.

– ءبىز بارلىق مەكتەپتەردە ءسيفرلى تەحنولوگيالارعا دەگەن قىزىعۋشىلىقتى وياتۋدامىز، ۇلتتىق چەمپيوناتتىڭ قاتىسۋشىلارى بۇگىننىڭ وزىندە ءسيفرلى قازاقستاننىڭ نەگىزىن قالاپ ۇلگەردى، – دەپ اتاپ ءوتتى ءبىلىم جانە عىلىم ءمينيسترى ەرلان ساعادييەۆ ءىس-شارانىڭ اشىلۋ سالتاناتىندا. 

جارىس جەڭىمپازدارى اراسىنان 2017 جىلعى 10-12 قاراشادا كوستا-ريكادا وتەتىن WRO-2017 حالىقارالىق وليمپياداسىنا بارۋ ءۇشىن ۇلتتىق توپ قالىپتاستىرىلاتىن بولادى.

– ءبىز وليمپيادا قاتىسۋشىلارىن ءساتتى كەلەشەك كۇتىپ تۇرعانىنا سەنەمىز. ويتكەنى ولار بۇگىننىڭ وزىندە سىني تۇرعىدان ويلانىپ، ساندىق تەحنولوگيالارعا ۇلكەن قىزىعۋشىلىق تانىتىپ وتىر. بۇل ناعىز عالىمدارعا ءتان قاسيەت، – دەپ اتاپ ءوتتى «نازاربايەۆ زياتكەرلىك مەكتەپتەرى» دببۇ-نىڭ باسقارما ءتورايىمى كۇلاش ءشامشيدينوۆا.

ۇلتتىق چەمپيونات – WRO روبوتوتەحنيكا بويىنشا حالىقارالىق كەزەڭىنىڭ ىرىكتەۋ ءبولىمى. «نازاربايەۆ زياتكەرلىك مەكتەپتەرى» دببۇ
2014 جىلدان باستاپ «World Robot Olympiad-تىڭ» قازاقستاندا ۇلتتىق ۇيلەستىرۋشىسى بولىپ تابىلادى جانە وسى شارانى زياتكەرلىك مەكتەپتەردە جىل سايىن وتكىزىپ وتىرادى.

شولۋشى: اسەم المۇحانبەت