ق ر تاۋەلسىزدىگىنىڭ 25 جىلدىعى جانە قازاق كوشىنىڭ 25 جىلدىعى اياسىندا «الەمدە بار قازاقتا ءبىر وتان بار» اتتى ءان جارىققا شىقتى دەپ حابارلايدى Qamshy.kz. يبراگيم ەسكەندىردىڭ ورىنداۋىنداعى ءان دۇنيەجۇزى قازاقتارىنىڭ جالعىز وتانى — قازاقستان ەكەنىن باسا ايتادى.  ەرلان تولەۋبايدىڭ ءانىن يبراگيم ەسكەندىر ورىنداعان.

قازاقستان تاۋەلسىزدىك الۋعا ساناۋلى كۇندەر قالعاندا-اق، 1991 جىلى 18 قاراشادا قازاق كسر جوعارعى كەڭەسى «بايىرعى ۇلت ادامدارىنىڭ باسقا رەسپۋبليكالاردان جانە شەت ەلدەردەن قازاق كسر-ىنا كوشىپ كەلۋى ءتارتىبى مەن شارتتارى تۋرالى» قاۋلى قابىلدادى. بۇل زاڭنىڭ اياسىندا اتاجۇرتقا ۇلى كوش باستالدى. پرەزيدەنت نازاربايەۆتىڭ «قازاقستان - الەمدەگى بارشا قازاقتىڭ قۇتتى قارا شاڭىراعى» دەگەنى قانداستارىمىزدىڭ كوشىنە قامشى باستى.

العاشقىلاردىڭ ءبىرى بولىپ جەتكەن ابىز اقساقال حاليفا التاي تۋعان جەردىڭ توپىراعىن ماڭدايىنا باسىپ، ءسۇيىپ ساجدە ەتتى. تۇركيادان، مونعوليادان ارناۋلى ۇشاقتارمەن كوشتىڭ الدى كەلە باستادى. اتاجۇرتتى اڭساعان كوزى اشىق، كوكىرەگى وياۋ، مۇمكىندىگى بار ازاماتتار ەش ىركىلمەستەن اتتارىنىڭ باسىن اتامەكەنگە بۇردى. ونىڭ دالەلى مۇستافا وزتۇرىك سياقتى الەمدى مويىنداتقان، اتاق پەن ابىرويعا يە ازاماتتاردىڭ ەلگە كەلۋى.

شەتەل قازاقتارىمەن بىرگە قارا شاڭىراققا تاريحي مادەنيەتىمىز، ۇلتتىق ادەبيەتىمىز، اسىل مۇرا ءان مەن ءبيىمىز، كۇي مەن جىرىمىز ورالدى. الدىڭعى بۋىن ءوزى قاناتتانعان جۇرتتان كورگەن ونەر-بىلىمىن، عىلىمى مەن تەحنيكاسىن ەلدىڭ يگىلىگىنە جاراتتى. مەملەكەت شەتەلدەگى قانداستارىمىزدى شاقىرىپ قانا قويعان جوق، جات جۇرتتا جۇتىلىپ كەتپەسىن دەپ جاستارىن وقىتۋدى قولعا الدى. شەتەلدەگى قازاق جاستارى اتاجۇرتتا تەگىن ءبىلىم الىپ، ەڭبەككە ارالاستى. شەتەلدەن كەلگەن اعايىن اتاجۇرتىنىڭ گۇلدەنۋىنە ەكونوميكالىق، دەموگرافيالىق، رۋحاني، ادەبي-مادەني ۇلەس قوسىپ، قازاقتىڭ كەرەگەسى كەڭەيىپ، قابىرعاسى بۇتىندەلە ءتۇستى.

وسىنىڭ ناتيجەسىن، كوشى-قوننىڭ جەتىستىگىن 2014 جىلى ەلباسى «ءبىز 1 ميلليون اعايىندى ەلگە قايتاردىق!» دەپ ماقتانىشپەن جاريالادى. دۇنيەجۇزى قازاقتارىنىڭ V قۇرىلتايىندا دا ەلباسى نازاربايەۆ الەمدەگى قازاقتاردى اتاجۇرتقا ورالۋعا شاقىردى.

پاتريوتتىق اندەرمەن تانىلىپ جۇرگەن يبراگيم ەسكەندىردىڭ ورىنداۋىنداعى جاڭا ءان دە بارشا قازاقتارعا اتاجۇرتقا ورالۋدى ناسيحاتتايدى.