سەرىك احمەتوۆ اسا ءىرى كولەمدەگى بيۋدجەت قاراجاتىن جىمقىردى دەپ ايىپتالىپ وتىر، - دەپ حابارلايدى Tengrinews.kz ءتىلشىسى قاراعاندىنىڭ قازىبەك بي اۋدانى سوتىنىڭ باسپا ءسوز حاتشىسى ءاليا جوشيەۆاعا سىلتەمە جاساپ.

"قاراعاندى قالاسى قازىبەك بي اۋداندىق سوتىنىڭ 2014 جىلدىڭ 18 قاراشاسىنداعى قاۋلىسىمەن الدىن الا تەرگەۋ ورگاندارى قىلمىستىق كودەكستىڭ 176-بابىنىڭ 4-بولىگى، ب تارماعىندا قاراستىرىلاتىن اۋىر جەمقورلىق قىلمىسىن (جاۋاپتى مەملەكەتتىك لاۋازىمداعى ادامنىڭ بيۋدجەت قاراجاتىن اسا ءىرى كولەمدە جىمقىرۋى) جاسادى دەپ ايىپتاعان سەرىك احمەتوۆكە ەكى اي مەرزىمگە - 2015 جىلدىڭ 18 قاڭتارىنا، 23.00-گە دەيىن ءۇي قاماۋىنا الۋ تۇرىندە بۇلتارتپاۋ شاراسى سانكسيالاندى"، - دەدى جوشيەۆا.

قاۋلى ءالى زاڭدىق كۇشىنە ەنە قويعان جوق، وعان ءۇش كۇن ىشىندە شاعىم نە قارسىلىق كەلتىرۋگە بولادى. جوشيەۆا بۇلتارتپاۋ شاراسى رەتىندە نە سەبەپتى ءۇي قاماۋىنا الۋ تاڭدالعانىن ايتتى.

"مىنا دەرەكتەر ەسەپكە الىندى: سەرىك احمەتوۆ بۇرىن سوتتالماعان، تۇرعىلىقتى مەكەنجايى بار، تۇرعىلىقتى مەكەنجايى بويىنشا وڭ مىنەزدەمە بەرىلگەن، ۇيلەنگەن، سوت ونىڭ دەنساۋلىعىن دا ەسكەردى. بارلىق جايتتى تالداي كەلە سوت بۇلتارتپاۋ شاراسى رەتىندە ءۇي قاماۋىنا الۋدى تاڭداۋ دۇرىس بولادى دەگەن تۇجىرىمعا كەلدى. احمەتوۆتى تۇگەل وقشاۋلاۋ قاجەتتىلىگى تۋعان جوق. ءۇي قاماۋىنا الۋ تۇرعىلىقتى مەكەنجايى بويىنشا ىسكە اسىرىلادى، ول قاراعاندىدا تىركەۋگە وتىرعان. تەرگەۋ توبى جەتەكشىسىنىڭ ءوزى پروكۋراتۋراعا ءۇي قاماۋىنا الۋ تۇرىندە بۇلتارتپاۋ شاراسىن سانكسيالاۋ جونىندە ءوتىنىش ءبىلدىردى، ياعني بۇل - قىلمىستىق قۋدالاۋ ورگاندارىنىڭ ۇسىنىسى"، - دەدى باسپا ءسوز حاتشىسى.

مۇنىڭ الدىندا مەملەكەتتىك قىزمەتى ىستەرى جانە سىبايلاس جەمقورلىققا قارسى ءىس-قيمىل اگەنتتىگى وكىلدەرى تەرگەلىپ جاتقان ىستەردىڭ شەڭبەرىندە 1958 جىلى تۋعان احمەتوۆ سەرىك نىعمەتۇلىنا ايىپ تاعىلعانىن جانە قاراعاندىنىڭ قازىبەك بي اۋدانىنىڭ سوتى وعان ءۇي قاماۋىنا الۋ بۇلتارتپاۋ شاراسىن سانكسيالاعانىن حابارلاعان بولاتىن.