الا دوپ،الاياق اقشا! ءقازىر قازاقستاندا كەنجە قالعان سپورت ءتۇرى - فۋتبول. كەيىنگى جىلدارداعى «جىلت» ەتكەن ساۋلە عانا جانكۇيەرلەردىڭ جاپپاي جىلىستاۋىنان امان ساقتاپ تۇر. قازاقستان اياقدوپشىلارىن قاعىتپا ازىلگە قولجاۋلىق قىلاتىندا ساتتەرى بولادى. ءار ءسات سايىن جاۋىر بولعان «سەنىمنىڭ» ارقاسىن ۇمىتپەن سيپاي بەرگەننەن دە جالىققان شىعار. ەل سەنگەن ويىندا، «تەڭ سالعان گول» ەمەس، تەڭسەلگەن ناتيجەمەن قايتا بەرگەسىن..ءقازىر قۇراما كوماندالارىمىز قارجى جاعىنان بولسىن، قاجىر جاعىنان بولسىن قاجىپ جۇرگەندەي. وسى ورايدا مىنانداي ءبىر اقپارات ەل قۇلاعىن ەلەڭ ەتكىزدى. وسىدان بىرنەشە كۇن بۇرىن سايتىمىزدا «سامۇرىق-قازىنا» ءال-اۋقات قورىنىڭ تۇركيالىق «گالاتاساراي» فۋتبول كلۋبىنىڭ دەمەۋشىسى بولعاندىعىن ەستىپ، جاعامىزدى ۇستاعانبىز.
سويتسەك، «سامۇرىقپەن» قاناتىن قاتار قاعاتىن «بانكتەردە» بار ەكەن. وتاندىق «Capital Bank Kazakhstan» لوندوندىق ارسەنال فۋتبول كومانداسىمەن 3 جىلدىق كەلىسىم شارتقا وتىرىپتى. بۇل تۋرالى كوماندا ءوز سايتتارىندا جازعان ەكەن.
كەلىسىم شارت تۋرالى ارسەنالدىڭ كوممەرسيالىق ديرەكتورى ۆەن ۆەنكەتەشام: «ءبىز بۇل كەلىسىم شارتقا قۋانىشتىمىز. اعىلشىن پرەمەر ليگاسىنداعى قازاقستانمەن العاشقى سەرىكتەستىك جۇمىستى باستاپ وتىرعانىمىز قۋانتادى» دەيدى. ال كاپيتالى كوپ « Capital Bank Kazakhstan » بانكىنىڭ ديرەكتورى عاني وزبەكوۆ: « وتە قۋانىشتىمىز. ءبىز الدىمىزعا ايقىن ماقسات قويىپ، الەمدەگى مىقتى كوماندامەن بيزنەس جوسپارلارىمىزدى جۇزەگە اسىرامىز. ارسەنال الەمدەگى ميللونداعان جانكۇيەرى بار كوماندا » دەيدى. ميلليونداعان جانكۇيەرى بار كومانداعا ميللياردتاعان قارجىمىز كەتەتىنىن ەسكەرسەك مىڭ جەردەن جانكۇيەر بولساڭ دا جانىڭ كۇيەدى ەكەن. وتاندىق فۋتبولعا وسى قارجىڭ وننان ءبىرى ءبولىنىپ وتىرما؟ اقشا شاشۋ، اتاق جيۋعا ەڭ توتە جول ەكەنىن ەسكەرسەك، ولاردا قاتەلەسپەگەنى. قازاقتى ناسيحاتتاماقشى-مىس. سامۇرىقتى بىلگەنمەن سارىارقانى تانىماس تۇرىكتەرگە تەر بولىپ، كاپيتالىڭدى بىلگەنمەن Kazakhstan-ڭدى تانىمايتىندارعا جەم بولىپ جۇرمەيىك.
ءوزىڭ ديۋاناسىڭ، كىمگە ءپىر بولاسىڭ؟
ورىنباسار باقتىبەكوۆ
