مەكسيكادا گاررەرو شتاتىنىڭ  ستۋدەنتتەرى ۇكىمەت باسشىسى ەنريكە پەنو نەتونىڭ 6 كۇن ىشىندە وتستاۆكاعا كەتۋىن تالاپ ەتىپ وتىر. بۇل تۋرالى ريانوۆوستي حابارلايدى.

ستۋدەنتتەر جەكسەنبى كۇنى گاررەرو شتاتى چيمپالسينگو قالاسىندا ەكى بىردەي راديوستانسيانى باسىپ الىپ، تىكەلەي ەفيردەن پرەزيدەنتتەرىنىڭ وتستاۆكاعا كەتۋىن ۇندەگەن.

نارازىلىق شەرۋىن ۇيىمداستىرۋشى ستۋدەنتتەر بەلسەندىسى: « 26 قاراشا ءبىزدىڭ دوستارىمىزدىڭ جوعالعانىنا تۋرا 2 اي بولادى. ال وسى كۇنگە دەيىن ءبىز بيلىكتىڭ اۋزىنان ولاردى ىزدەۋ جۇمىستارىنا ءاتۇستى قاراپ، جالعان اقپارات بەرگەندەرىن بىلەمىز» دەيدى.

يگۋالادا ستۋدەنتتەر 26 قىركۇيەك كۇنى ەلدىڭ ءبىلىم بەرۋ جۇيەسىنە قارسىلىقتارىن ءبىلدىرىپ، الاڭعا شىققان بولاتىن.  يگۋالانىڭ ەكس-مەرى حوسە لۋيسا اباركيدىڭ بۇيرىعى بويىنشا ولارعا قارسى شابۋىل ورىن العان.  ناتيجەسىندە 6 ستۋدەنت وقيعا ورنىندا قازا تاپسا، 43 ستۋدەنتتى پوليسيا جاساعى الىپ كەتكەن بولاتىن. كەيىن انىقتالعانداي ۇستالعان ستۋدەنتتەردى پوليسەيلەر قىلمىستىق توپ «بىرىككەن جاۋىرگەرلەردىڭ» قولىنا تابىستاعان.

سودان بەرگى ۋاقىتتاردا مەكسيكادا نارازىلىق شەرۋلەرى ءجيى ۇيىمداستىرىلا باستاپ، اشىنعان حالىق اكىمشىلىك عيماراتتارىنا شابۋىل جاساي باستاعان. كولىك جولدارىن جاۋىپ، قارسىلىقتارىن كۇشەيتكەن. ال يگۋالىنىڭ ەكس-مەرى جۇبايى ەكەۋى قاشىپ كەتكەنىمەنەن كوز ۇزاماي ۇستالىپ، وعان قوسا ونداعان پوليسەي قىزمەتكەرلەرى قاماۋعا الىنعان بولاتىن.