"ءبىرىنشى قاڭتار"، "نوۆىي گود" دەپ جىلى قارسى العانىمىزبەن «توتەنشە، سۋىق» جايلاردىڭ  ءدال وسى كۇنى ورىن الاتىنى بەلگىلى. وتقا كۇيەتىنىنە كوزى جەتسە دە كوبەلەكتىڭ كوزسىز ەرلىگىن قايتالاۋدا قازاقتىڭ الدىنا تمد-دا ەشكىمنىڭ ءداتى بارىپ تۇسە قويماس.

ءدال سول كۇنى توناۋ، ۇرلىق، زورلىق ت،ب. ايتار اۋىزعا اۋىرلىق قىلاتىن قىلمىستىڭ قۇيتىرقى تۇرلەرى «ىسكە قوسىلادى». ءدال وسى «ايتۋلى كۇنگە» بۇكىل قازاق قازىردەن باستاپ قامدانىپ كەتتى.  الماتىنىڭ اباتتانعان كوشەلەرىندەگى برەندتىك دۇكەندەر مەن كوفەحانالار مەنمۇندالاپ بەزەنىپ تۇر.

ەستە بولسا،وعان دەيىندە اتاۋسىز قالدىرۋعا،قۇتتىقتاۋدى «قازا» قىلۋعا بولمايتىن مەرەكەمىز بار ەدى عوي؟ تاۋەلسىزدىك مەيرامى! اتاي كورمەڭىز. ورىس مەرەكەسىنىڭ قازاق ورتاسىنداعى ناسيحاتىنا مەيرام الدى جاسالار ءتۇرلى جەڭىلدىكتەر مەن جارنامالار جۇمىس ىستەيدى. جاڭا جىلدىق كۋپون ت،ب. قاپتاعان جەڭىلدىكتەن اياز اتانىڭ قاپشىعىن تولتىرۋعا بولعانداي. بايلانىس قۇرالدارىنا دەيىن جاڭا جىلدىق ارنايى تاريفتەرىن شىعارىپ الەك. وعان دەرەك، مالاقايىن باسا كيگەن  مىنا جارناماشىلار.

بۇنىڭ ءبارى ءبىر عانا مەيرامنىڭ اياسىندا ۇسىنىلىپ وتىرعان جەڭىلدىكتەر. ءسىز "تاۋەلسىزدىك ءتاريفى" دەگەندى ەستىپ كوردىڭىز بە؟ نەمەسە سول كۇنى بايلانىس قۇرالدارىنا جەڭىلدىك جاساعانى تۋرالى « تاۋەلسىزدىك » مەيرامىنا قارسى جەلى ىشىندە 300 سمس، 45 مينۋت قوڭىراۋ، 200 مبايت تەگىن دەگەن حابارلاما كەلدى مە قالتافونىڭىزعا؟ كەلمەيدى، اۋرە بولماڭىز. جارنامانىڭ ءجۇزىن جاساسىن، ءبىراق، جارناماسىن جاساۋعا جاعداي تۋدىرىپ وتىرعان ەلدىڭ تاريحىنا،  ۇلتتىق قۇندىلىعىنا نەگە سىيلاستىقپەن قارامايدى؟ 16-جەلتوقساننان ءارى ناسيحاتتاسا سول ءتاريفى وتپەي قالمايدى ەمەس.

ودان كەيىن حالىقتا تاۋەلسىزدىك كۇنىنە قايدان قۇلشىنىس بولسىن؟

 ورىنباسار باقتىبەكوۆ