ەلوردادا «Astana Open-2017» حالىقارالىق شاحمات فەستيۆالى وتۋدە، دەپ حابارلايدى Qamshy.kz  اقپارات اگەنتتىگى  استانا اكىمدىگىنىڭ باسپا ءسوز قىزمەتىنە سىلتەمە جاساي وتىرىپ.

قازاقستاندا مۇنداي دەڭگەيدەگى شارا العاش رەت ۇيىمداستىرىلدى. فەستيۆال باعدارلاماسىندا ءارتۇرلى فورماتتاعى بالالار مەن ەرەسەكتەر اراسىندا بەس تۋرنير بار، سونىمەن قاتار تورەشىلەر ءۇشىن حالىقارالىق شاحمات فەدەراسياسىنىڭ سەمينارى وتەدى.

بۇل جارىس – ءداستۇرلى تۇردە 6 جىلدان بەرى وتكىزىلىپ كەلەدى. فەستيۆالدىڭ اشىلۋ سالتاناتىنا حالىقارالىق شاحمات فەدەراسياسىنىڭ پرەزيدەنتى كيرسان يليۋمجينوۆ قاتىستى.

فەستيۆال الەمدىك جارىستار الدىنداعى ەرلەر، ايەلدەر مەن بالالار-جاسوسپىرىمدەر قۇراماسىنىڭ ەڭ ماڭىزدى دايىندىق كەزەڭى بولىپ تابىلادى.

بيىلعى جارىستىڭ ەڭ نەگىزگى ەرەكشەلىگى – اۋقىمدىلىعىندا، دەيدى ۇيىمداستىرۋشىلاردىڭ ءبىرى ەرجان شاكەنوۆ. العاش رەت بۇل جەردە 12 ەلدەن (قازاقستان، رەسەي، اقش، بولگاريا، ەگيپەت، ۋكراينا، موڭعوليا، تاجىكستان، ارمەنيا، بەلورۋس، وزبەكستان، قىرعىزستان) التى ءجۇز سپورتشى قاتىسۋدا.

قاتىسۋشىلار اراسىندا – حالىقارالىق گروسسمەيستەرلەر، شەبەرلەر، الەمدىك جانە ازيالىق سايىستاردىڭ چەمپيوندارى مەن جۇلدەگەرلەرى (اسەل سەرىكباي، ءامينا قايىربەكوۆا، نازەركە نۇرعالي، مەرۋەرت كاماليدەنوۆا، ساتبەك احمەدينوۆ، الديار اڭسات، قازىبەك نوگەربەك جانە ت.ب) بار.

جارىستىڭ باس تورەشىسى – حالىقارالىق دەڭگەيدەگى قازى سەرگەي يۋروۆسكيي.

ۇيىمداستىرۋشىلار بيىل قاتىسۋشىلار جارىستان بولەك ۋاقىتتارىن ءتيىمدى وتكىزەتىنىن ايتادى. كوبى ەكسپو كورمەسىنە بارۋعا نيەت تانىتىپتى.

29 شىلدە فەستيۆال اياقتالادى. جەڭىمپازدار اقشالاي سىيلىقتارعا يە بولادى.

 - بۇل فەستيۆالدىڭ جۇلدە قورى – 11 ميلليوننان استام تەڭگە. ءبىرىنشى ورىن ءۇشىن جەڭىمپاز ەكى ميلليون تەڭگە الادى. جۇلدە قورى 20-شى ورىنعا دەيىن قاراستىرىلعان، - دەدى ە.شاكەنوۆ.