قىرعىز ەلىنىڭ پرەزيدەنتى المازبەك اتامبايەۆ 24 شىلدە كۇنى شولپان-اتادا بولعان باسپا ءسوز ءماسليحاتىندا «ساپات» (سەبات) مەكتەبىنىڭ مۇعالىمدەرىنە قاتىستى ماسەلەگە توقتالا كەتتى، دەپ حابارلايدى Qamshy.kz اقپارات اگەنتتىگى Opennewsportal.com سايتىنا سىلتەمە جاساپ.

«وزدەرىڭىز بىلەسىزدەر، مەن «سەبات» مەكتەپتەرىن جابۋعا تىيىم سالعاندىقتان، تۇركيا بيلىگى بىزگە دەگەن رەنىشىن بىلدىرگەن بولاتىن. الايدا، «سەبات» مەكتەپتەرى – وتە كەرەمەت مەكتەپتەر دەپ سەنىممەن ايتا الامىن. ولاردىڭ تالاپتارىنان كەيىن ءبىز ول مەكتەپتەردى قاتاڭ باقىلاۋعا الدىق. «سەبات» مەكتەپتەرىنىڭ 35%-ى ءقازىر قىرعىز رەسپۋبليكاسىنىڭ ءبىلىم جانە عىلىم مينيسترلىگىنىڭ قاراماعىنا وتكەن. ءبىز اشىق تۇردە ول مەكتەپتەردى بىزگە بەرۋىن وتىنگەنبىز. سونىمەن قاتار، «سەبات» اتاۋىن ءبىز «ساپات» دەپ اۋىستىردىق. بۇل مەكتەپتە جۇمىس ىستەيتىن مۇعالىمدەردىڭ 90-95%-ى قىرعىزدار»، - دەپ مالىمدەدى ول.

«تۇركيا ەلشىسىنىڭ ايتۋىنشا، قىرعىزستاندا جۇمىس ىستەيتىن ادامداردىڭ 3،5 ميلليونى گۇلەننىڭ جاقتاستارى ەكەن. ولاردىڭ كوپشىلىگى «ساپات» مەكتەبىنىڭ مۇعالىمدەرى. ال، ەگەر، مەكتەپ مۇعالىمدەرىن تەرروريست دەپ تانيتىندار بولسا، وزدەرىنىڭ اقىل-ەستەرىنىڭ دۇرىستىعىنا كوز جەتكىزۋ ءۇشىن ولار دارىگەرگە بارىپ كورىنگەندەرى دۇرىس... ول مەكتەپتەردىڭ جابىلىپ قالۋىنا جول بەرمەيتىندىگىمىزدى اشىق تۇردە جاريا ەتكىم كەلەدى. ءبىزدىڭ بيۋدجەتىمىزدىڭ 24%-ى ءبىلىم سالاسىنا جۇمسالىپ وتىر، سوندىقتان دا ءبىز بۇل ماسەلەنى كۇشەيتەمىز جانە تەك العا قاراي جۇرەمىز»، - دەپ ءوز ويىن كەسىپ ايتتى اتامبايەۆ.

سونىمەن قاتار، باسپا ءسوز ءماسليحاتىنا قاتىسۋشىلار قىرعىز ەلىنىڭ ەكس-مۇفتيى چۋباك قاجى جاليلوۆ اقش-قا بارعان كەزىندە سول جەردە تۇراتىن تۇرىكتىڭ ءدىن وكىلى فەتحۋللاح گۇلەنمەن كەزدەسكەنى جايىندا دا المازبەك اتامباۆەتان تۇسىنىك بەرۋىن سۇرادى.

«جاليلوۆ ءقازىر ەشقانداي دا لاۋازىمدا وتىرعان جوق، سول سەبەپتى دە ول ءوزىنىڭ قالاعان ادامىمەن كەزدەسە الادى. بىرەۋ ەردوعانمەن كەزدەسسىن، بىرەۋ گۇلەنمەن كەزدەسسىن، ماڭىزى جوق، ءبىز – ەركىندىكتى جاقتايتىن مەملەكەتپىز. ەگەر، رەسمي وكىلدەردىڭ ءبىرى بارىپ كەزدەسسە، ءسوزسىز، قانداي دا ءبىر شارا قولدانامىز. الايدا، جاليلوۆ ونداي رەسمي وكىل ەمەس، سوندىقتان دا ول قالاعانىن ىستەي الادى»، - دەپ جاۋاپ بەردى قىرعىز رەسپۋبليكاسىنىڭ پرەزيدەنتى.

دايىنداعان: نازەركە لابيحان