پاۆلودار وبلىسى اۋماعىندا 30 جۇرگىنشى قار قاماعىندا قالدى.
استانا-سەمەي باعىتىندا جىلجىعان Mersedes ماركالى اۆتوبۋسى، ەكىباستۇز-شىدەرتى باعىتىندا قاتىنايتىن رەيستىك اۆتوبۋس بايەت اۋلىنىڭ تۇسىندا جول جيەگىنە شىعىپ كەتكەن. كولىك سالونىندا بولعان 20 جولاۋشىنى ەۆاكۋاسيالاۋعا ەكىباستۇز قالاسىنان ارنايى اۆتوبۋس جونەلتىلگەن.
سوڭىن الا سول كۇرە جولدا اۋىر جۇك كولىگى مەن Niva Chevrolet ماركالى سالوندا 4 جولاۋشى بولعان جەڭىل كولىك وپپا قارعا باتىپ قالعان. قۇتقارۋشىلار كومەگىمەن قوس كولىكتە اپاتتى جاعدايدان شىعىپ، ءارى قارايعى ساپارىن جالعاستىرعان.
پاۆلودار-اقتوعاي تراسساسىندا ءتورت جولاۋشى مەن ءبىر جاسقا تولماعان نارەستەگە قۇتقارۋشىلار قولىن سوزعان. تاعى 3 جولاۋشى پاۆلودار-ەكىباستۇز باعىتىندا قالىڭ قاردىڭ قۇرساۋىندا قالعان. قۇتقارۋشىلار بريگاداسى دەر كەزىندە جەتىپ كومەك قولىن سوزىپ، جولاۋشىلاردى ۇسىكتەن امان الىپ قالعان.
