ارمىسىز، ارداقتى اعايىن!

 «اۋەلى ءسوزدىڭ باسى ءبىسمىللا، ءبىسمىللا دەمەي ءىس قىلما». قاراشانىڭ 19-ىنان باستاپ قازاقيانىڭ ينتەرنەت تورىنا ءبىزدىڭ سايت تا ۇياسىن سالماققا نيەت ەتتى. ءتۇپ ماقساتىمىز تۇگەن ەدى، بەت باعدارىمىز بىلاي ەدى دەپ قۇپياسىن قازبالايتىنداي قىرتىسى قالىڭ، قاتپارى تەرەڭ سايت ەمەسپىز.

 ماقساتىمىز جالعىز. قازاق ونەرىنىڭ ماندايىنا بىتكەن جالعىز ايى بىتىمدەس ايتىس ونەرىن ناسيحاتتاۋ. مۇددەمىز باياعى. ەلدىكتىڭ كەرەگەسىنە كوز بولۋ، شاڭىراعىنا ۋىق بوپ شانشىلۋ. ءوزى وزگە جۇرت جەردەگى تار تەسىككە دوپ سىيعىزىپ، قۇس تالاستىرىپ، يت ىرىلداستىرىپ جاتقاندا، قازەكەم ءسوز جارىستىردى.

 اقىننان ويدى ولەڭمەن ورنەكتەگەن سۋىرىپ سالمالىقتى، ال تىندارماننان ءار ءسوزدىڭ ماعىناسىنا بويلاۋدى تالاپ ەتكەن ايتىس راسىندا ونەردىڭ اتاسى دەۋگە لايىق. «قازاق قانداي؟» دەسەڭ، «مىنە وسىنداي» دەپ كورسەتەر اسىلىمىز دەپ... اعىلشىنعا ايتىپ جاتقان جوق ەكەنبىز-اۋ.

 قازاق بالاسىنىڭ ايتىستى بىلمەيتىنى كەم. كورەدى. تىڭدايدى. كۇتەدى. ايتىسكەرىن الاقانعا سالىپ قۇرمەتتەيدى. ايتىستىڭ ءقازىر قالپى، لەكسيكونى، ماقامى وزگەرگەن شىعار-اۋ، ءبىراق جۇرتتىڭ وعان دەگەن ىقىلاسى ءباز باياعى قالپىندا.

 ال ىقىلاس، ساعىنىش ءھام سۇرانىس بار جەردە ءبىزدىڭ سايتتا نە جازامىن، نە كورسەتەمىن دەگەن ماسەلە تۋا قويماس. باستىسى، مۇندا باستى تەلەارنالاردان كورسەتۋگە تابۋ قويىلعان ايتىستى تاماشالايتىن بولاسىزدار. باعزى زاماننان بۇگىنگە دەيىنگى ايتىسكەرلەر بۋىنىنىڭ تولىق دەرەگىن تاباتىن بولاسىزدار.

 جاس ايتىسكەرلەردىڭ قىم-قۋىت تىرشىلىكتىڭ قۋانىشى مەن قايعىسىنا، ءۇمىتى مەن كۇدىگىنە قاتىستى بۋىن شىعارىپ وتىرامىز. ساياسي ايتىس، ساتيرا ايتىس دەيسىز بە، ايتىستىڭ فورماسىن بايىتىپ، جاستارعا جول كۇرەپ، ونلايندا دا، وففلايندا دا قىزمەتىمىز ايتىستى ايتۋدان جالىقپاۋ بولماق.

 ءا دەگەننەن قاعازدا ءبارىن قاتىرىپ تاستاۋعا اسىقپالىق. اياق الىسىمىزدى اڭدىپ كورەرسىزدەر. ءبىراق، تىلەۋلەس بولعاندارىڭىزدى قالايمىز. ايتىس ونەرىنە بەي جاي قاراي المايتىن بارلىق ازاماتتاردى ورتاق ىسكە ات سالىسۋعا شاقىرامىز! ەندەشە، بۇگىننەن باستاپ بىزگە دە كوز قيىعىڭىزدى سالا ءجۇرىڭىز!

 http://kazaitys.kz/  ۇجىمى