كەشە نيۋ-يورك نارىعىندا WTI سۇرىپتى مۇنايدىڭ باعاسى رەكوردتىق كورسەتكىشكە دەيىن قۇلدىرادى. اقش-تىڭ تەحاس شتاتىندا وندىرىلەتىن قارا التىننىڭ بۇل ءتۇرى بىردەن 4 پايىزعا ارزانداپ، باررەلى 63،05 دوللارعا باعالاندى.  بۇل – 2009 جىلدىڭ شىلدەسىنەن بەرى تىركەلگەن ەڭ تومەنگى باعا. نتۆ.Ru. تاراتقان اقپاراتقا سۇيەنسەك، باعانىڭ كۇرت تومەندەۋىنە نارىقتا قارا التىننىڭ قورى تىم كوپ دەگەن مالىمەت اسەر ەتكەن.

مۇنايدىڭ باعاسى ەۋروپادا دا ءماز ەمەس. لوندونداعى كونتينەنتارالىق فيۋچەرستىك كەلىسىمدەر بيرجاسىنداعى سەسسيا قورىتىندىسى بويىنشا، Brent ماركالى مۇنايدىڭ باعاسى 2،93 دوللارعا ارزانداپ، باررەلى 66،14 دوللارعا جەتتى. مۇناي قۇنىنىڭ قۇلدىراۋى مۇناي ەكسپورتتاۋشى ەلدەر ۇيىمىنىڭ (OPEC)  وندىرىلەتىن مۇناي كولەمىن قىسقارتپاۋ تۋرالى شەشىمىنەن باستاۋ العان بولاتىن. قارا التىن نارىعىنداعى تۇراقسىزدىق رۋبل باعامىنا دا قىسىم كورسەتىپ تۇر.

تيم فينلون، «Energy Analytics Group LLC» كونسۋلتاسيالىق كومپانياسىنىڭ ديرەكتورى: «كەيبىرەۋلەر نارىقتاعى قازىرگى جاعدايدى ءساتتى ساۋدا جاساۋ ءۇشىن تاپتىرماس مۇمكىندىك دەپ باعالاۋى مۇمكىن. الايدا، مۇناي نارىعى ءالى دە تاۋارعا تولى. باعا تومەندەي بەرمەك. نارىقتا تۇراقسىزدىق ساقتالادى».

دجين ماكدجيلليان، «Tradition Energy» كومپانياسىنىڭ باس ساراپشىسى: «مۇناي نارىعى شىڭىراۋدى ىزدەپ الەك، ءبىراق جۋىق ارادا وعان جەتە قويمايتىن ءتارىزدى. ۇزاق مەرزىمدى سالىمدارعا بەيىمدەلگەن ينۆەستورلار بۇل نارىقتان باستارىن الا قاشۋدا. ويتكەنى قۇنى جوعالعان تاۋاردى ەشكىم ساتىپ العىسى كەلمەيدى».

"قازاقپارات"