بەلگىلى پۋبليسيست جاندوس تەمىرعالي اتاقتى «قان مەن تەر» رومانىنىڭ اۆتورى كسرو مەملەكەتتىك سىيلىعىنىڭ لاۋرەتى ءابدىجامىل نۇرپەيىسوۆتى ادەبيەت ءبولىمى بويىنشا نوبەل سىيلىعىنا ۇسىنۋ جونىندە تىلەك ءبىلدىردى.

جاندوس تەمىرعالي : «بۇل يدەيا ماعان قاراشا ايىنىڭ سوڭىندا كەلدى. وسىلاي دەپ ۇسىنىس جاساۋىما جازۋشىمەن ويلاماعان جەردەن كەزىگىپ، سۇحباتتاس بولۋىم سەبەپ بولدى. ءابدىجامىل اعا مەنىڭ اعايىمنىڭ ەسكى دوسى ەكەن. اعامىزدىڭ ۇيىندە قوناقتا بولعانىمىزدا اڭگىمىلەسۋدىڭ ءساتى ءتۇستى. كىتاپتارىمەن بالا كەزدەن تانىستىعىم بولعانىمەن جازۋشىنى بۇل العاش كورۋىم. سويلەسە كەلە وسىنداي دارا تۇلعالاردىڭ تەك قازاق حالقىنا عانا ەمەس بۇكىل الەم الدىندا مويىندالۋى كەرەك دەگەن ويعا كەلدىم». ءتىپتى وسى يدەيانى قۋاتتاپ ءۇشىن Facebook الەۋمەتتىك جەلىسىندە ارنايى توپ قۇرعان. 5 كۇننىڭ ىشىندە 800-گە جۋىق ادام تىركەلىپتى. « مەن ونەرتانۋشى رەتىندە ءابدىجامىل كارىم ۇلىنىڭ شىعارمالارىن جوعارى باعالايمىن. اسىرەسە، ول كىسىنىڭ ارال تەڭىزىنىڭ تراگەدياسى مەن جەرگىلىكتى حالىقتىڭ احۋالى جايلى جازعان شىعارمالارىن»، - دەيدى.

ءابدىجامىل نۇرپەيىسوۆ 1924 جىلى 22 قازاندا قىزلوردا وبىلىسى ارال قالاسىندا دۇنيەگە كەلگەن. 1942 جىلى 18 جاسىندا اسكەر قاتارىنا الىنعان. سوعىستا ۋكراينا، بالتىق جاعالاۋلارىنداعى مايداندارعا قاتىسقان. سوعىستان سوڭ « كۋرليانديا» اتتى اۆتوبيوگرافيالىق تۋىندىسىن جازادى. 1961-1970 جىلدار ارالىعىندا كسرو مەملەكەتتىك سىيلىعىن الىپ بەرگەن، الەمنىڭ 30-دان استام تىلىنە اۋدارىلعان «قان مەن تەر» تريلوگياسىن جازعان. 2000-شى جىلى ارال تراگەدياسىن كوتەرگەن «سوڭعى پارىز» اتتى رومان-ديلوگياسى باسىلىپ شىقتى. بۇل شىعارماسى 2003 جىلى شولوحوۆ اتىنداعى ادەبي سىيلىقتى جەڭىپ العان. ۇسىنىس جۇزەگە اساتىن بولسا، ءابدىجامىل نۇرپەيىسوۆ نوبەل سىيلىعىن العان تۇڭعىش قازاق بولماق.

"قازاقپارات"