كاتالونيا تۇرعىندارى يسپان ۇكىمەتى تىيىم سالعان تاۋەلسىزدىك رەفەرەندۋمىن جۇزەگە اسىرۋ ءۇشىن سايلاۋ ۋچاسكەلەرىنىڭ الدىندا جينالدى،- دەپ حابارلايدى Qamshy.kz اقپارات اگەنتتىگى.

ايماقتىق وكىلدەر سايلاۋ بيۋللەتەندەرىنىڭ دايىن ەكەندىگىن جانە ناتيجەنىڭ ۇلكەن وزگەرىس الىپ كەلەتىندىگىن ايتتى.

مادريد ۇكىمەتى داۋىس بەرۋدى توقتاتۋعا ۋادە بەردى جانە ونداعان پوليسيا كولىكتەرى بارسەلونا قالالىق پورتىندا ءوز بازاسىن ورنالاستىردى.

تۇندە مىڭداعان تاۋەلسىزدىك ءۇشىن كۇرەسۋشىلەر داۋىس بەرۋ ورتالىقتارى رەتىندە قولدانىلاتىن مەكتەپتەرگە جينالدى. پوليسيا ولاردى شىعارىپ تاستايتىندىقتارىن ايتتى.

رەفەرەندۋمدى ۇيىمداستىرۋشىلار حالىققا سايلاۋ ۋچاسكەلەرىنە ساعات تاڭعى 05:00-تە جينالۋدى سۇراپ، داۋىس بەرۋدى ساعات 09:00-دە باستايتىندىقتارىن ايتقان. ولار كەز كەلگەن پوليسيا ارەكەتتەرىنىڭ بەيبىت تۇردە بولۋىن ءوتىندى.

«مەنى ءوز ەلىم قاجەت ەتەتىندىكتەن، ەرتە تۇردىم. ءبىز نە بولاتىنىن بىلمەيمىز، ءبىراق ءبىز مۇندا بولۋىمىز كەرەك»، - دەيدى 65 جاستاعى ەۋلاليا ەسپالە ي تاررو. ول بارسەلوناداعى سايلاۋ بولاتىن مەكتەپتىڭ سىرتىندا كۇتىپ تۇردى.

جەكسەنبى «دەموكراتيا ءۇشىن اسا ماڭىزدى كۇن»، دەدى ايماقتىق ۆيسە-پرەزيدەنت، وريول دجۋنكۋەراس. «ءبىز كوپتەگەن كەدەرگىلەردى جەڭىپ شىقتىق، بۇدان ارتىق ءبىزدى ەشتەڭە دە اسقاقتاتا المايدى»، - دەدى ول. «ەگەر ءوز قۇقىعىمىزدى قورعاماساق، وندا كىم ءبىز ءۇشىن قورعاماق؟»

بيۋللەتەندەردە تەك ءبىر سۇراق جانە ەكى عانا جاۋاپ بار: «كاتالونيانىڭ رەسپۋبليكا تۇرىندە تاۋەلسىز مەملەكەت بولعانىن قالايسىز با؟» - «ءيا» نەمەسە «جوق».

رەفەرەندۋم يسپانيانىڭ كونستيتۋسيالىق سوتىندا زاڭسىز دەپ جاريالاندى جانە مىڭداعان قوسىمشا پوليسيا كاتالونياعا جىبەرىلدى. ال قوسىمشا وفيسەرلەر بارسەلونا پورتىندا ەكى كەمەدە كۇتىپ وتىر.

داۋىس بەرۋ قارساڭىندا يسپان بىرلىگىن ۇگىتتەگەن مىڭداعان ادام يسپانيانىڭ بارلىق قالالارىندا، سونىڭ ىشىندە كاتالونيا استاناسى بارسەلونادا دا شەرۋلەر وتكىزدى.

ولار يسپان تۋىن جانە «كاتالونيا ول - يسپانيا» دەگەن جازۋى بار باننەرلەردى قولعا الىپ شىقتى.

مادريد ۇكىمەتى كاتالونيادا ورتالىق، باقىلاۋشى پوليسيا قىزمەتىمەن بايلانىسىپ، تىيىم سالۋعا كومەكتەسۋ ءۇشىن موسسوس د'ەكۆادررا ايماقتىق كۇشىن شاقىردى. سونداي-اق، پوليسيا ايماقتىق ۇكىمەت تەلەكوممۋنيكاسيالىق ورتالىعىنا دا شوعىرلاندى.

كاتالون پوليسياسىنىڭ باسشىسى وفيسەرلەردى كۇش قولدانۋدان اۋلاق بولۋعا شاقىردى.

كاتالونيا - بۇل سولتۇستىك-شىعىس يسپانيادا ورنالاسقان 7،5 ملن. حالقى بار ءوز ءتىلى مەن مادەنيەتى  بار ايماق.