تەمىرتاۋ مەن قاراعاندى قالالارىنىڭ اراسىنداعى اۆتوجول ۋچاسكەسى تولىعىمەن 2018 جىلى اياقتالاتىن بولادى. بۇگىنگى كۇنى ول جەردە وڭتۇستىك كورەيانىڭ مەردىگەر كومپانياسى جۇمىس ىستەۋدە، ― دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساي وتىرىپ.

ايماق باسشىسىنىڭ باسپا ءسوز قىزمەتىنەن ءمالىم ەتكەندەي، جالپى وبلىس بويىنشا رەسپۋبليكالىق ماڭىزداعى 477 شاقىرىم جولعا جوندەۋ جۇمىستارى جۇرگىزىلۋدە. «ورتالىق-وڭتۇستىك» كولىك ءدالىزىنىڭ ۋچاسكەلەرىن قايتا جوندەۋ «نۇرلى جول» باعدارلاماسى شەڭبەرىندە جۇزەگە اسىرىلۋدا. «بۇگىنگى كۇنى «انار-تەمىرتاۋ» جولىنىڭ 74 شاقىرىمى تولىعىمەن جوندەلدى. ءقازىر «باتپاق-بايمىرزا» ۋچاسكەسىنىڭ جاڭادان توسەلگەن 34 شاقىرىمىن قولدانىسقا بەرۋ جوسپارلانۋدا.

بۇدان بولەك، 15 شاقىرىمدىق «تەمىرتاۋ-قاراعاندى» ۋچاسكەسىن قايتا جوندەۋ جالعاسۋدا»، ― دەپ اتاپ ءوتتى «قازاۆتوجول» ۇك» اق-نىڭ قاراعاندى وبلىستىق فيليالىنىڭ ديرەكتورى قانات شايمين.

قانات شايمين حابارلاعانداي، بيىل سونداي-اق «جەزقازعان - قاراعاندى» تاس جولىنىڭ كوپتەن كۇتىلگەن جوندەۋ جۇمىستارىنا قارجى تابىلعان. «جەزقازعان - قىزىلوردا» كۇرە جولىندا وتكەن جىلى باستالعان جوندەۋ جۇمىستارى جالعاسۋدا. ال «اقتاۋ-باستاۋ-تەمىرتاۋ» تراسساسىندا كۇردەلى جوندەۋ اعىمداعى جىلدىڭ قاراشاسىندا اياقتالادى دەپ كۇتىلۋدە.