الاشتىڭ ماڭدايىنا بىتكەن جارىق جۇلدىزى مۇستافا وزتۇرىك ءتىرى بولعاندا ەرتەڭ 58 جاسقا كەلەر ەدى. قىرىقتىڭ قىرقاسىنا ىلىنگەن شاعىندا دۇنيەدەن وتكەن مارقۇمنىڭ ارتىندا وشپەس ءىزى قالدى.

 اتاجۇرتىنا جۋساننىڭ ءيسىن اڭساپ جەتكەن بوزداقتار قانشاما؟! سونىڭ ءبىرى جانە بىرەگەيى – مۇستافا وزتۇرىك. اتتەڭ! عۇمىرى قىسقا بولدى. الاشتىڭ اردا تۋعان ۇلىن باتىراشتاردىڭ بالتاسى جەر قۇشتىردى. مۇستافانىڭ اتا-بابالارى وتكەن عاسىردىڭ 50 جىلدارى تار جول، تايعاق كەشۋدى باستان وتكىزىپ، جۇڭگو، پاكىستان، ءۇندىستان باعىتىمەن تۇرىك رەسپۋبليكسىنا ات باسىن تىرەپ ەدى. ءبىر اللاعا ايان، دەگەنمەن ەلى ءۇشىن تۋعان ەردىڭ ەڭ ۇلكەن باقىتى – قازاق ەلىنىڭ تاۋەلسىزدىگىنە كۋا بولعاندىعى شىعار. 

مۇستافا ستامبۇلداعى ورتا مەكتەپتى ءبىتىرىپ، تايۆانداعى ەكسپەريمەنتالدى ۋنيۆەرسيتەتتى جانە سول ەلدەگى حالىقارالىق قاتىناستار ۋنيۆەرسيتەتىنىڭ جۋرناليستيكا فاكۋلتەتىن قوسا بىتىرگەن. ول وسى ەلدە ءجۇرىپ، ۋنيۆەرسيتەت ديپلومىمەن بىرگە تاەكۆوندودان 6-شى دان سەرتيفيكاتىن الادى. بۇل تاەكۆوندودان بارشا مۇسىلمان الەمىندەگى العاشقى جوعارى دارەجە ەدى.  كەيىن گەرمانيانىڭ كەلن، ميۋنحەن جانە تۇركيانىڭ ستامبۇل قالالارىندا ءوزىنىڭ تاەكۆوندو مەكتەبىن اشىپ، جاستاردى سپورتقا باۋلىدى. قازاقستان تاۋەلسىزدىك الا سالىسىمەن الماتىعا ورالعان ول تاەكۆوندوعا تاربيەلەۋ ورتالىعىن جاساقتاپ، قازاق ەلى تاريحىندا العاش رەت تاەكۆونديستەردى حالىقارالىق جارىستارعا اپارىپ، جەڭىسپەن ورالادى.

 مۇستافا 1995 جىلى بەلگىسىز جاعدايدا قازاعا ۇشىراپ، دەنەسى ستامبۇل قالاسىندا جەرلەندى. 2000 جىلى الماتى قالاسىندا مۇستافانىڭ اتىنا كوشە بەرىلىپ، ەسكەرتكىش بەلگى قويىلدى. 2004 جىلى مارقۇمنىڭ 50 جاسقا تولعان مەرەيتويى قارساڭىندا الماتى وبلىسى تالعار اۋدانى بەساعاش اۋىلىندا ەسكەرتكىشى اشىلدى.

مۇستافا وزتۇرىك تاەكۆون-دو سپورتىنان التى دۇركىن الەم چەمپيونى، حالىقارالىق جاتتىقتىرۋشى. التى ءتىل مەڭگەرگەن.