ەستەرىڭىزدە بولسا «قامشى» پورتالى «1 قاڭتاردىڭ» اتىن اتاپ، ءتۇسىن تۇستەپ، اسپانداتپاۋدى ءوزىنىڭ بۇلجىماس قاعيداسىنا اينالدىرعان. ىلە-شالا وڭتۇستىك قازاقستان وبلىسىنان دا ءسۇيىنشىلى حابار جەتىپ ەدى. ەندى مىنە، «ورىستانعان» وبلىستاردىڭ دا قوزعالاتىن ءتۇرى بار. ونى قوستاناي وبلىسى اكىمىنىڭ بلوگىنا جازىلعان مىنا حات پەن وعان جازىلعان جاۋاپتان بىلدىك. 

15 قاراشا 2012

قاھارلى:

قۇرمەتتى نۇرالى مۇستافا ۇلى!

بىزدەر جىل سايىن ءبىر تۇسىنىكسىز جايتتىڭ كۋاسى بولىپ ءجۇرمىز. مىسالى، جەلتوقسان ايى باستالماي جاتىپ، «1 قاڭتاردى» قارسى الۋعا بايلانىستى جارنامالار كوبەيىپ (قالا كوشەلەرىندە دە، تەلە-/راديو، گازەت-جورنالداردا جانە ت.ب.)، ال ودان جارتى اي بۇرىن بولاتىن قازاقستاننىڭ ۇلتتىق مەرەكەسى -16-17 جەلتوقسان تاسادا قالىپ قويادى. بۇل جونىندە كەزىندە «قامشى» پورتالى قازاق جۋرناليستەرىنە ۇندەۋ تاستاعان. اتا-بابالارىمىزدىڭ بىلەكتىڭ كۇشىمەن، نايزانىڭ ۇشىمەن قورعاعان اتامەكەنىمىزدىڭ تاۋەلسىزدىگىن العانى ەرەكشە كۇن ەمەس پە؟

وسى ورايدا ايتا كەتەيىن دەگەنىم، جۋىردا اتالعان "قامشى" پورتالىندا ماقالا جاريالاندى. وندا "وڭتۇستىك قازاقستان وبلىسىنىڭ اكىمى

اسقار مىرزاحمەتوۆ تاۋەلسىزدىك مەرەكەسىنە دەيىن «1 قاڭتاردى»  جالاۋلاتپاۋدى قول استىنداعىلارىنا تاپسىرعاندىعى ايتىلدى.

قوستاناي وبلىسى دا قازاقستاننىڭ جەرى ەمەس پە؟ «1 قاڭتاردى» تاۋەلسىزدىك مەرەكەسىنە دەيىن جارنامالاعاندا ەلىمىزدىڭ ۇلتتىق مەيرامىنا دۇرىس كوڭىل بولىنبەي قالادى. سوندا بىزدەر ەگەمەندىكتى جاقتىرمايتىن، وعان قۋانبايتىن بولعانىمىز با؟

وسىعان وراي ۇسىنىسىمىز: تاۋەلسىزدىك كۇنىن تويلاپ وتكەنگە شەيىن «1 قاڭتار» تۋرالى جارنامانىڭ دا، قالا ورتالىعىنا (وبلىس قالالارىندا، اۋداندارىندا) شىرشا ورناتىلماسا ەكەن. تاۋەلسىزدىكتى باسقا مەملەكەتتەر سياقتى جاقسى قارسى الايىق؟ نە دەگەنمەن ۇلتتىق مەرەكە مارتەبەسى بار جالعىز مەيرام عوي...

23 قاراشا 2012  

جاۋاپ بەرەدى: سادۋاكاسوۆ نۋرالى مۋستافينوۆيچ

قۇرمەتتى قاحارلى:

شىنىندا دا، كوپ جىلدار بويعى قالىپتاسقان داستۇرگە بايلانىستى، «1 قاڭتاردىڭ» كەلۋىنەن كوپ بۇرىن ەلدى مەكەندەردە مەرەكەلىك ءىس-شارالارعا دايىندىق باستالادى.

«1 قاڭتار» جونىندەگى ءىس-شارالاردى ايدىڭ باسىنان باستاپ جۇرگىزۋ، سول سياقتى مەملەكەتتىك ورگاندارىنىڭ بەكىتىلگەن تاريف بويىنشا مەرەكەلىك ءىس-شارالارعا بولىنگەن بيۋدجەتتىك قاراجاتتى قارجى جىلىنىڭ اياعىنا دەيىن يگەرۋلەرىنىڭ قاجەتتىلىگىنە دە بايلانىستى.  وسى ماسەلە بويىنشا ءسىزدىڭ ۇستانىمىڭىزدى قولدايمىز.

بۇدان بۇرىن جەرگىلىكتى اتقارۋشى ورگاندارىنا «1 قاڭتاردى» قارسى الۋ جاڭا مەملەكەتتىك مەرەكە - تۇڭعىش پرەزيدەنتتىڭ كۇنىنە جانە ۇلتتىق مەرەكە - تاۋەلسىزدىك كۇنىنە وراي تاقىرىپتىق رەسىمدەۋدەن باسىم تۇسپەۋى جونىنەن ۇسىنىستار بەرىلدى.

تاۋەلسىزدىك كۇنى بارشا قازاقستاندىقتار ءۇشىن ەڭ باستى مەرەكە بولدى جانە سولاي بولىپ قالا بەرەدى دە.

كەيبىر سوزدەر «قامشى» پورتالىنىڭ ۇستانىمى بويىنشا «1 قاڭتار» دەپ الىندى.