نۇرسۇلتان نازاربايەۆ ەنەرگەتيكا ءمينيسترى قانات بوزىمبايەۆتى قابىلدادى، -دەپ Qamshy.kz اقپارات اگەنتتىگى اقورداعا سىلتەمە بەرە وتىرىپ جازادى.
كەزدەسۋ بارىسىندا مينيستر ەلباسىنا مۇناي وڭدەۋشى زاۋىتتاردىڭ جاڭا زامانعا ساي وزگەرۋى بارىسىنداعى جانار-جاعارماي ماتەريالدارى نارىعىنىڭ جاعدايىن ءتۇسىندىردى. ەلباسى «قازاقستانداعى مۇناي جەتىسپەۋشىلىگى ەنەرگەتيكا مينيسترلىگىنىڭ جانار-جاعارماي ماتەريالدارى نارىعىنداعى شەشىمدەردى ءوز ۋاقىتىندا قابىلداماۋىنان بولدى» دەدى.
– ەنەرگەتيكا مينيسترلىگى ەلىمىزدىڭ وتىن-ەنەرگەتيكا ماسەلەلەرىنە، سونىڭ ىشىندە ىشكى نارىقتى جانار-جاعارمايمەن قامتاماسىز ەتۋگە جاۋاپتى. ەلىمىزدە ونىڭ تاپشىلىعىنا بايلانىستى ورىن العان احۋال ۇكىمەت پەن ەنەرگەتيكا مينيسترلىگى تاراپىنان نەمقۇرايلىلىق پەن جاۋاپسىزدىققا جول بەرىلگەنىن كورسەتىپ وتىر. ءسىز بيىلعى مامىر ايىندا مۇناي وڭدەۋ زاۋىتتارىنا جوندەۋ جۇمىستارىن جۇرگىزۋ كەستەسىن بەكىتتىڭىز. كۇزدە ءۇش زاۋىتتىڭ ەكەۋى جوندەۋ ءۇشىن توقتاتىلاتىنىن ءبىلدىڭىز. مۇنداي جاعداي جىل سايىن قايتالانىپ كەلەدى. سونى بىلە تۇرا، الدىن-الا دايىندالىپ، حالىقتى قامتاماسىز ەتۋ ءۇشىن قاجەتتى كولەمدە جانار-جاعارماي جەتكىزۋگە ءتيىس ەدىڭىز. ولاي بولمادى، – دەدى قازاقستان پرەزيدەنتى.
سونداي-اق، ەلباسى مينيسترلىكتىڭ جانار-جاعارماي نارىعىنداعى احۋالدى تۇراقتاندىرۋعا باعىتتالعان بۇعان دەيىنگى شارالارىنىڭ تيىمدىلىگى تومەن بولعانىن اتاپ ءوتتى.
– ءسىز ۇسىنعان جاقسى باستامالار از ەمەس. ولار مەنىڭ تاراپىمنان دا، ۇكىمەت تاراپىنان دا قولداۋ تاۋىپ كەلەدى. جانارماي تاپشىلىعىن بولدىرماۋ ءۇشىن باعانى مەملەكەتتىك رەتتەۋدەن باس تارتۋ ۇسىنىلدى. الايدا، نارىقتا تاعى دا جانار-جاعارماي جەتىسپەۋشىلىگى ورىن الدى. وسىعان بايلانىستى، ۇكىمەتتىڭ ۇسىنىسى بويىنشا سىزگە سوگىس جاريالادىم. بۇل – قىزمەتتەن بوساتىلعانمەن بىردەي، – دەدى مەملەكەت باسشىسى.
سونداي-اق قانات بوزىمبايەۆ قازاقستان پرەزيدەنتىنە پاۆلودار جانە اتىراۋ مۇناي وڭدەۋ زاۋىتتارىن جاڭعىرتۋ جۇمىستارىنىڭ بارىسى تۋرالى مالىمدەدى.
– ەكى مۇناي وڭدەۋ زاۋىتىن جەتىلدىرىپ، جاڭعىرتۋ بيىل اياقتالادى. قاراشا ايىندا پاۆلودارداعى زاۋىتتى ىسكە قوسۋ جوسپارلانىپ وتىر. اتىراۋداعى مۇناي وڭدەۋ زاۋىتىنداعى جۇمىستاردى وسى جىلدىڭ 16 جەلتوقسانىنا دەيىن اياقتاۋ كوزدەلگەن. مۇندا مۇناي ونىمدەرىنىڭ كولەمىن ارتتىرۋعا جانە ولاردىڭ ساپاسىن جاقسارتۋعا مۇمكىندىك بەرەتىن كاتاليتيكالىق كرەكينگ قۇرىلعىسى ءبىرىنشى رەت پايدالانىلاتىن بولادى.
ق.بوزىمبايەۆ مەملەكەت باسشىسىنا شىمكەنتتەگى مۇناي وڭدەۋ زاۋىتىندا دا جوعارى وكتاندى بەنزين شىعارۋعا ارنالعان كاتاليتيكالىق كرەكينگ قۇرىلعىسىن سالۋ جوسپارلانىپ وتىرعانى تۋرالى مالىمدەدى.
ەنەرگەتيكا ءمينيسترى كەلەسى جىلى قازاقستان نارىعى جوعارى ساپالى جانارمايمەن، سونىڭ ىشىندە اۆياسيالىق جانارمايمەن قامتاماسىز ەتىلەتىنىن ايتتى.
