جەلتوقساننىڭ 2-ىنە قاراعان ءتۇنى وتكەن جەكپە-جەكتە قانات يسلام كەزدەسۋدىڭ التىنشى راۋندى اياقتالماي جاتىپ، ايقىن باسىمدىلىقپەن جەڭىسكە جەتكەن. 

 Boxrec پورتالىنىڭ دەرەگىنە سۇيەنسەك، كولۋمبيالىق بوكسشى رەينالدو ەسكۋيۆيا 35 جاستا. شارشى الاڭدا بارلىعى 19 كەزدەسۋ وتكىزىپ، توعىزىندا جەڭىسكە جەتكەن.

 ال قانات يسلام مۇشە Nelsons پروۋموۋتەرلىك كومپانياسىنىڭ سايتىندا، بۇل قازاق بوكسشىسىنىڭ جەتىنشى تازا جەڭىسى ەكەنى جازىلعان.

 28 جاستاعى قازاق بوكسشىسى 69 كيلوگرامعا دەيىنگى جارتىلاي ورتا سالماقتا بوكستاسىپ ءجۇر. قانات يسلام ءقازىر دۇنيەجۇزىلىك بوكس كەڭەسىنىڭ (WBC) ەرەجەسى بويىنشا الەم چەمپيونى اتاعىنا تالاسۋعا مۇمكىندىگى بار. WBC ەرەجەسىنە سايكەس قاناتقا رەيتينگى جوعارى 40 بوكسشىدان وزۋ ءۇشىن بارلىق جەكپە-جەكتەرىندە جەڭىسكە جەتۋ كەرەك.

 ۇزدىك 15ء-تىڭ ساپىنا كىرگەن جاعدايدا جارتىلاي ورتا سالماقتاعى قازىرگى الەم چەمپيونى «جەڭىلمەيتىن قابىلان» دەگەن لاقاپ اتى بار اقش بوكسشىسى فلويد مەيۋەزەرمەن (43 جەكپە-جەك، 43 جەڭىس) كەزدەسۋى مۇمكىن. WBO رەيتينگىنە ءىلىنىپ، ۇزدىك 15ء-تىڭ قاتارىنا ىلىنبەسە، مەيۋەزەر ونىڭ جەكپە-جەككە شىعۋ تۋرالى ۇسىنىسىن قابىلدامايدى. ال اقش بوكسشىسىن  جەڭسە، كاسىپقوي بوكستىڭ ەرەجەسى بويىنشا قانات يسلام الەم چەمپيونى اتانادى.

 قازاق بوكسشىسى وسىعان دەيىن دومينيكان رەسپۋبليكاسىنىڭ بەس بوكسشىسىمەن كەزدەسىپ، بارلىعىن نوكاۋتپەن جەڭگەن.

 الدىمەن، لا-رامانو قالاسىندا دانيەد ۆەاتونى (28 قىركۇيەك)، ودان كەيىن انەيدي ماترەستى (2 قازان) جەڭدى.

 قازاننىڭ 18ء-ى سانتو-دومينگو قالاسىنداعى كەزدەسۋدە مودەستو فەليكستى، 29 قازاندا نەلسيدو ميگۋەلدى نوكاۋتپەن ۇتتى. ال قاراشانىڭ 10-ى كۇنى حوسە انتونيو رودريگەسپەن وتكەن كەزدەسۋ ءۇشىنشى راۋندتا توقتاتىلىپ، قانات يسلامعا تازا جەڭىس بەرىلدى.

 بوكسشى قاراشانىڭ 24ء-ى كۇنى كولۋمبيا استاناسى بوگوتودا جەرگىلىكتى بوكسشى سەگۋندا حەررەرانى ەكىنشى راۋندتا نوكاۋتقا جىبەرگەن ەدى.

 قانات يسلامنىڭ قازاقستاندا باپكەرى بولعان تۇرسىنعالي ەدىلوۆ ازاتتىق تىلشىسىنە: "قانات يسلام لوندون وليمپياداسىنا قاتىسا المايتىنىن بىلگەن سوڭ كاسىپقوي بوكسقا كەتتى. ءقازىر نەلسون لوپەس دەگەن اقش-تاعى اتاقتى مەنەدجەردىڭ كومپانياسىمەن كەلىسىم-شارتقا وتىردى. بۇل كومپانيادا 150 بوكسشى بار. كوبى – اقش، دومينيكان جانە پۋەرتو-ريكو بوكسشىلارى. قانات ءقازىر كاسىپقوي بوكسقا ءبىرجولا بەت بۇردى. ماقساتى – ورتا سالماقتا الەم چەمپيونى اتانۋ... الەم چەمپيونى بولۋ ءۇشىن ءۇش جىلدىڭ ىشىندە جيىرما-وتىز كەزدەسۋ وتكىزىپ، بارلىعىندا جەڭىسكە جەتۋ كەرەك" دەگەن ەدى.

 قىتايدا تۋعان ەتنيكالىق قازاق قانات يسلام وسى ەلدىڭ اتىنان پەكين وليمپياداسىنا قاتىسىپ قولا جۇلدەگەر اتانعان ەدى. كوپ ۇزاماي قازاقستانعا قونىس اۋدارعان بوكسشى لوندون وليمپياداسىنا اتاجۇرتىنىڭ اتىنان قاتىسۋىنا بايلانىستى ازاماتتىق-قۇقىقتىق داۋ تۋعان سوڭ كاسىپقوي بوكسقا بەت بۇرعان.

رۋسلان مەدەلبەك

Azattyq.org سايتىنان الىندى

اۋەلگى تاقىرىبى: قانات يسلام جەتىنشى جولى كولۋمبيالىقتى جەڭدى