نۇرسۇلتان نازاربايەۆ ءابۋ-دابيدىڭ تاق مۇراگەرى، بىرىككەن اراب امىرلىكتەرىنىڭ قارۋلى كۇشتەرى جوعارعى باس قولباسشىسىنىڭ ورىنباسارى، شەيح مۇحاممەد بەن زايد ءال ناھايانمەن كەزدەستى دەپ حابارلايدى Qamshy.kz اقپارات اگەنتتىگى اقوردانىڭ باسپا ءسوز قىزمەتىنە سىلتەمە جاساي وتىرىپ.
كەزدەسۋدە مەملەكەت باسشىسى قازاقستان مەن بىرىككەن اراب امىرلىكتەرى اراسىنداعى قارىم-قاتىناس ءوزارا سەنىمگە نەگىزدەلگەنىن اتاپ ءوتىپ، ونى ءارى قاراي تابىستى دامىتۋدىڭ ماڭىزدىلىعىنا نازار اۋداردى.
– سىزدەر ءبىزدى حالىقارالىق ارەنادا دا، ەكونوميكادا دا ءاردايىم قولداپ كەلەسىزدەر. وسى جىلدار ىشىندە سىزدەرمەن دوستىق قارىم-قاتىناس ورناتتىق. قازاقستانعا ەرەكشە كوڭىل ءبولىپ وتىرعاندارىڭىز ءۇشىن ريزاشىلىعىمدى بىلدىرەمىن، – دەدى مەملەكەت باسشىسى.
قازاقستان پرەزيدەنتى قازىرگى ۋاقىتتا ەكونوميكانىڭ ءتۇرلى سەكتورلارىندا، سونىڭ ىشىندە مۇناي حيمياسى، اۋىل شارۋاشىلىعى جانە اتوم ونەركاسىبى سالالارىندا ءبىرقاتار بىرلەسكەن جوبالاردى ىسكە اسىرۋ جوسپارلانىپ وتىرعانىن ايتتى.
نۇرسۇلتان نازاربايەۆ مۇسىلمان ەلدەرى اراسىندا زاماناۋي تەحنولوگيالاردى دامىتۋ جاعىنان بىرىككەن اراب امىرلىكتەرى كوش باستاۋشىلاردىڭ ءبىرى بولىپ وتىرعانىن اتاپ ءوتتى.
– «بولاشاقتاعى وزگەرىسكە ساي بولامىن دەسەڭ، بۇگىن ءوزىڭ وزگەر» دەگەن دانا ءسوز بار. سىزدەر سول جولدان تايماي كەلەسىزدەر، – دەدى مەملەكەت باسشىسى.
ءابۋ-دابيدىڭ تاق مۇراگەرى ەكى جاقتى بايلانىستار سەرپىندى دامىپ كەلە جاتقانىن ايتىپ، نۇرسۇلتان نازاربايەۆتىڭ ەكى ەل اراسىنداعى قارىم-قاتىناستى نىعايتۋ ىسىندەگى بەلسەندى رولىنە توقتالدى.
– ءبىز كوپ نارسەنى سىزدەردەن ۇيرەنىپ كەلەمىز. ءسىزدىڭ رەفورمالارىڭىز ۋاقىت تالابىنا ساي جۇرگىزىلۋدە. قازاقستان ءسىزدىڭ كورەگەن ساياساتىڭىزدىڭ ارقاسىندا تۇراقتى دامىپ كەلەدى، – دەدى شەيح مۇحاممەد بەن زايد ءال ناھايان.
كەلىسسوزدەر بارىسىندا تاراپتار حالىقارالىق جانە وڭىرلىك كۇن تارتىبىندەگى وزەكتى ماسەلەلەردى دە تالقىلادى.
پىكىر قالدىرۋ