قازاقستان پرەزيدەنتى ن.نازاربايەۆتىڭ تەلەسۇحباتى ەلىمىزدىڭ بىرىنەشە تەلەارناسىنان كورسەتىلدى. ءارتۇرلى تاقىرىپتى قامتىعان سۇحبات الەۋمەتتىك جەلىدە قىزۋ تالقانىپ جاتىر.
Facebook الەۋمەتتىك جەلىسىن قولدانۋشىلار اراسىندا تەلەسۇحبات تۇشىمدى بولماعانىن، قازاقستانداعى قازىرگى جاعداي ياعني، "بەنزين تاپشىلىعىنىڭ سەبەبىن، ءۇي باعاسىنىڭ قىمباتتىعىن" ايتپادى دەپ جازادى. ال، كەرىسىنشە "پرەزيدەنتتىڭ وسى سۇحباتتاعى تاۋەلسىزدىك تۋرالى..." ايتقان ويلارىن جالپى قوعامعا ءناسيحاتتاۋ كەرەكتىگىن جازعاندار دا بار. سونداي-اق، جەلىدەگى جازبادا قانداي ماسەلەلەردىڭ ايتىلمان قالعاندىعى دا جازىلدى. بۇدان بولەك، پرەزيدەنتپەن سۇحباتتاسقان جۋرناليستەرگە كاسىبي ماماندار تۇرعىسىنان ءبىراز سىن ايتىلدى.
اقبەرەن ەلگەزەك، اقىن، "ۇلت" پورتالىنىڭ باس رەداكتورى:
- ەگەر پرەزيدەنتتىڭ وسى سۇحباتتاعى تاۋەلسىزدىك تۋرالى، مەملەكەتتىلىك، ءتىل، ءدىل تۋرالى ايتقاندارىن ۇكىمەت مۇشەلەرى، اكىم-قارالار، تەلەارنا مەن باسپا ءسوز باسشىلارى ۇران قىپ ۇستاپ، بارلىق جەرگە ءىلىپ، تەلەديداردان كورسەتىپ، گازەت-سايتتارعا باسىپ، ۋلارداي شۋلاماسا، وندا بۇل جاي عانا جانە كەزەكتى رەت حالىقتى بالا سياقتى الداي سالۋ دەپ بىلەمىن. قانداي سوزدەر دەسەڭىزدەر، ءتىزىپ بەرەيىن.
نۇرسۇلتان نازاربايەۆ: "ءتىلىمىزدى، ءدىنىمىزدى، ۇلتتىعىمىزدى ساقتاپ قالعان قازاق حالقى قانداي كەرەمەت!ەشقايسىسىمەن قوسىلىپ كەتكەن جوق..."
"عالىمدارعا ايتىپ، ءتيىستى جۇمىستاردى ىستەپ كەلە جاتىرمىز. ءبىزدىڭ جاستار مەن جالپى قازاق حالقى ەلىمىزدىڭ مىڭ جىلدىق تاريحى بار ەكەنىن ءبىلۋى كەرەك..."
"حالىق ءوز باسشىلارىن سايلاعان كەزدە سول باسشىعا تىزگىندى قولىنا بەرىپ: «ءبىزدىڭ جاعدايىمىزدى ويلا» دەگەن تىلەگىن ايتادى. ايتىلماسا دا، حالىق اماناتىنىڭ ماعىناسى سول. سوندىقتان دا، پرەزيدەنتتىڭ، ەل باسقارعان ادامنىڭ موينىنداعى جۇكتىڭ اۋىرلىعى وسىندا. بولاشاقتان كەلە جاتقان وقيعالاردى ءبىلىپ، تۇسپالداپ، ساراپتاپ، سوعان قارسى الدىن الا قيىنداتپاۋ ماسەلەسى..."
"ءبىز ەۋرازيالىق ەكونوميكالىق وداققا قوسىلا وتىرىپ، ءوزىمىزدىڭ ءۇشىنشى ەلدەرمەن بايلانىسىمىزدى جوعالتپايمىز، ول ەشقانداي شارتقا قايشى دا ەمەس..."
جالعاس ەرتاي، بلوگەر:
- حالىق تەڭگەمەن ايلىق الادى، تەڭگەمەن ساۋدا جاسايدى، دەدى پرەزيدەنت. ايتپاعى - تەڭگەنىڭ قۇنسىزدانۋى حالىقتىڭ جاعدايىنا اسەر ەتپەۋى كەرەك دەگەنگە كەلىپ تۇر. ال، ەلىمىزگە كەلەتىن، حالىق تۇتىناتىن تاۋاردىڭ باسىم كوپشىلىگى يمپورت ەكەنىن ايتۋدى ۇمىتىپ كەتتى. ءتىپتى، بەنزين دە يمپورتتالادى عوي. ول دەگەنىڭىز - وتاندىق تاۋارلاردىڭ دا باعاسى سول يمپورتتىڭ باعاسىنا تىكەلەي تاۋەلدى دەگەن ءسوز. وچم، ءپۋتيننىڭ ريتوريكاسىنىڭ تىكەلەي كالكاسى بولدى، وسى جەرى.
رۋسلان مەدەلبەك، ازاتتىق راديوسىنىڭ ءتىلشىسى:
- نازاربايەۆ حالىقتى ءار سوزىمەن دوللاردىڭ وسۋىنە دايىنداپ جاتقانداي كورىندى... ەشكىم بەنزين تاپشىلىعىنىڭ سەبەبىن، ءۇي باعاسىنىڭ قىمباتتىعىن، استاناداعى ۇيلەردى ءسۇرۋ، وپپوزيسيالىق باسىلىمداردىڭ جابىلۋى تۋرالى سۇرامادى. بىلتىرعى سۇراقتار ءھام بىلتىرعى جاۋاپتار...
دينا تولەكوۆا، تەلەجۋرناليست:
- قازاقتىڭ لارري كينگتەرى قايدا؟ پوزنەرى قايدا؟ پرەزيدەنتتەن سۇقبات الىپ وتىرعان كىمدەر؟ 25 پەن 30 جاستاعى جاس جۋرناليستەر مەن ديكتورلار. سوزىنە ەل سەنەتىن، ەلدى سەندىرەتىن تاجىريبەلى، ساليحالى وي ايتاتىن، پرەزيدەنتپەن اڭگىمەسى جاراسا كەتەتىن، جاسى ەڭ قۇرعاندا ەلۋدەن اسقان مىقتى ينتەللەكتۋال تىلشىلەر، تەرەڭ اناليتيكتەر جوق پا؟ ءبارى باس شۇلعي قاتىپ قالعان، جاساندى كۇلكى. ديسكۋسسيا جوق. ارالارىندا بايلانىس بايقالمايدى. پرەزيدەنت پەن جاس تىلشىلەر اراسىنداعى الشاقتىق - 50 جاس!!! جاتتاندى سۇراقتار، جاسقانعان جاستار. وبشىم - جاساندىلىق كوزگە ۇرىپ تۇر.
قۋاندىق شاماحاي ۇلى، حالىقارالىق جۋرناليست، ق ر مادەنيەت قايراتكەرى:
- جاسى جەتپىستەن اسقان اقساقالعا، جاي بىرەۋ ەمەس مەملەكەت باسقارىپ وتىرعان ءىرى ساياسي تۇلعاعا نەمەرەسىمەن جاستى جاس كەلىنشەكتىڭ ماحاببات، سەزىم تۋرالى سۇراق قويۋى، وعان ەرەكشە ىقىلاسپەن جاۋاپ بەرىلۋى ادەپكە ساي كەلە مە؟ قازىرگى قوعامدى قاتتى تولعاندىرىپ وتىرعان وزەكتى ماسەلە مە ەدى، سول؟! اقوردادا وتىرىپ الىپ وسىنداي اڭگىمە ەفير ارقىلى دا ايتىلادى ەكەن-اۋ!
... سوسىن، تاعى ءبىر نارسەگە تاڭ قالعانىم سول ادەمى جىگىتتەر مەن قىزدار انا كىسىگە ۇنايتىن سۇراقتاردى قالاي تاۋىپ قويا بەرەدى-ەي، تەم بولەە نا رۋسسكوم يازىكە؟ ديالوگ پا، مونولوگ پا؟
ايدوس جۇماحان ۇلى، جۋرناليست:
ءنازيا جويامەرگەن قىزى، "تۇركىستان" حالىقارالىق گازەتىنىڭ ءجۋرناليسى:
- نەگە؟ تىكەلەي ەفيردە نەگە وتكىزىلمەدى؟ سۇراقتار نەگە وتكىر ەمەس؟ كەز كەلگەن تاقىرىپتاعى سۇراقتارعا جاۋاپ بەرۋگە پرەزيدەنتتىڭ ءبىلىمى مەن بىلىگى جەتەدى. ءدال ءقازىر تىعىرىققا تىرەلگەن ءپۋتيننىڭ ءوزى وتكىر سۇراقتاردان قاشقان جوق. كەزدەسۋدى ۇيىمداستىرۋشىلاردىڭ كوزدەگەنى نە؟ سوبچاك قۇرلى بولمادى ما ءبىزدىڭ جۋرناليستەر؟ "سايقىمازاق" سۇراقتارمەن كىمدى مازاق قىلدى؟!
دەرەككوز: "تۇركىستان" باسىلىمى
