ەۋرازيالىق ەكونوميكالىق وداققا ۇلكەن سىن- قاتەر ءتونىپ تۇر. بۇل تۋرالى قازاقستان پرەزيدەنتى نۇرسۇلتان نازاربايەۆ جەتەكشى قازاقستاندىق ب ا ق وكىلدەرىمەن سۇحباتى بارىسىندا ءمالىم ەتتى.

«وتكەن جىلدىڭ تاريحىنا جازىلىپ جاتسا دا، قاربالاستا كەيبىر وقيعالار ۇمىتىلىپ جاتقانداي كۇي كەشەسىڭ. ءبارىبىر ماڭىزدى وقيعالار ورىن الدى. استانادا ءبىز ەۋرازيالىق ەكونوميكالىق وداق قۇرۋ جونىندەگى كەلىسىمشارتقا قول قويدىق. بۇل يدەيانى 20 جىل بۇرىن ماسكەۋ مەملەكەتتىك ۋنيۆەرسيتەتىندە ايتقان بولاتىنمىن. شىنىن ايتايىن، داعدارىسقا بايلانىستى بۇگىندە وداق ۇلكەن قاۋىپ-قاتەرلەرگە ۇشىراپ وتىر»، - دەدى ەلباسى.

مەملەكەت باسشىسى، وداقتىڭ قۇرىلۋى - كەڭەس ۇكىمەتىنە قايتىپ ورالۋ ەمەس ەكەنىن تاعى قاداپ ايتتى. «تاۋەلسىزدىگىمىزدەن ايىرىلىپ، جاڭا كەڭەس وداعى قۇرىلىپ جاتىر دەگەن سوزدەر ايتىلدى، ايتىلا دا بەرەدى. بوس ساندىراق. كەڭەس وداعىن قۇرعىسى كەلەتىندەردە ءتىپتى، مي جوق. ءبىز بۇدان باياعىدا-اق كەتكەنبىز، ءقايتىپ ورالۋ مۇمكىن ەمەس. ول كەزدە ورتاق ماركس-لەنين يدەولوگياسى بولدى. ول كەلمەسكە كەتتى. ۋىسىندا ۇستاعان كوممۋنيستىك پارتيا بولدى، ونىڭ دا عۇمىرى تاريح قويناۋىندا. ءبىرىڭعاي ەكونوميكالىق «اعزا» بولدى، ەندى ول جوق. جاڭا بۋىن ءوسىپ شىقتى سودان بەرى. كوشەدەگى وقۋشىدان ءقازىر سۇراڭىز، ماركس دەگەن كىم، لەنين دەگەن كىم دەپ. ونى سۇراپ تا كەرەك ەمەس، سەبەبى ءتىپتى جاڭا بۋىن قالىپتاسىپ ۇلگەردى»، - دەدى پرەزيدەنت. ەلباسىنىڭ ايتۋىنشا، ەاەو ەلدەرى اراسىندا تاۋار اينالىمى 40 پايىزعا وسكەن.

«قازىرگى جاعدايلارعا بايلانىستى ونىڭ دەڭگەيى تۇسەتىنى انىق. سەبەبى، بارشا الەمنىڭ ەكونوميكاسى تۇسۋدە. اقشا جاعىنان قىسىلتاياڭ كورۋدە. ءبىراق تاۋار الماسۋ جانە بىرلەسكەن كاسىپورىندار قۇرۋ جاعىنان ءبىز وڭ كورسەتكىشتەر كورىپ وتىرعانىمىز انىق. سەبەبى، شەكارا اشىق، ادامداردىڭ بارىس-كەلىسى كوبەيەدى، پويىزدار مەن جۇكتەر ەشبىر تەكسەرۋسىز وتۋدە. ياعني، كەڭىستىگىمىز ءۇش مەملەكەتكە كەڭەيدى. ەكونوميكا قالپىنا كەلەدى جانە ءبىزدىڭ يگىلىگىمىزگە جۇمىس جاسايدى»، - دەدى ن.نازاربايەۆ.

"قازاقپارات"