نۇرسۇلتان ءابىش ۇلى: ەكى مىڭ جىلعا جەتەتىن تاريحىمىز بار. ءبىزدىڭ ۇرپاق ءبىلۋى كەرەك، ءبىز قۇراشەيىن ءبىر جاقتان پايدا بولا سالعان ادام ەمەسپىز. ءبىز كەشە عانا اسپاننان سالبىراپ تۇسكەن ەشتەڭەسى جوق حالىق ەمەسپىز. ءبىزدىڭ تاريحىمىز بار، ول تاريح بۇكىل قازاقستاننىڭ جەرىندە سايراپ جاتىر. «ءبىزدىڭ تاريحىمىز سوۆەت وداعىنىڭ تاريحى» دەپ كەلدىك، سوندىقتان وسىعان ەس جيناپ كوڭىل بولەتىن كەز كەلدى. سونى ءبىز حاندىقتىڭ 550 جىلدىعىنان باستايمىز. ءبىز سول بابالارىمىزدىڭ، حاندىقتىڭ جيىنتىعىمىز. بىزگە ولار كەڭ جەردى ساقتاپ قالدى. اركىم وزىنە «وسىنداي ەن دالا قازاققا قالاي قالدى» دەپ سۇراق قوياتىن شىعار؟ حالقىمىز كوپ ەمەس... سوعان جاۋاپ بەرۋ ءۇشىن حاندىقتان باستاۋىمىز كەرەك. تاريحىمىز قانداي دەگەنگە جاۋاپ بەرۋىمىز كەرەك. رەسەيدىڭ، ەگيپەتتىڭ، يراننىڭ ءوز تاريحى بار، ءبىزدىڭ نەگە تاريحىمىز جوق؟ ۇرپاقتارىمىز اياعىنان نىق تۇرۋ ءۇشىن ءبىزدىڭ ارت جاعىمىزدا بابالاردان قالعان ەل، جۇرت، حاندىق بولعانىن، ولار وسى جەر ءۇشىن كۇرەسكەنىن، قان توككەنىن ۇرپاق ءبىلۋى كەرەك. مىنا تۇرعان قازاقستان – بۇكىل تاريحتىڭ ءتۇپ تامىرى. ۇرپاقتى وسىلاي تاربيەلەۋ كەرەك. ءتىلىمىزدى، ءدىنىمىزدى، ۇلتتىعىمىزدى ساقتاپ قالعان قانداي كەرەمەت حالىقپىز! «تامىرى تەرەڭ قارا ەمەن، قاسقايا كۇتەر داۋىلدى» دەگەن ولەڭدى ءسوز بار. ماڭگىلىك ەل دەگەن – يدەيا، وسى يدەيانىڭ توڭىرەگىنە توپتاسۋ كەرەك. قازاقتىڭ بارلىق تاريحى – بىرىگۋ تاريحى. ءۇش ءجۇزدىڭ بالاسى بىرىگىپ سوعىسقا شىققان كەزدە ەشبىر جاۋ توتەپ بەرگەن جوق. ءبىزدى ءبولىپ-جارعان كەزدە جاۋ الدى، وسىنى ەستە ساقتاۋ كەرەك. اللا بەرگەن، اتا-بابالارىمىزدىڭ تىلەگىمەن كەلگەن تاۋەلسىزدىكتى ساقتاپ قالۋ ءۇشىن قازاقتىڭ ءوزىنىڭ ىشىندەگى الاۋىزدىقتان قۇتىلۋ كەرەك. تۇبىندە ول بىزگە ءحاۋىپ بولۋى مۇمكىن. اتا-بابالاردىڭ بەرگەن كەڭ دالاسىن، مەملەكەتتىلىگىن قولىمىزدان جىبەرىپ الۋ – ءومىرباقي كۇنا بولىپ سانالادى. تاۋەلسىزدىكتى العاننان ساقتاپ قالۋ قيىن...

سۋرەت: akorda.kz