كەمەڭگەر جىگىتتەرگە اقىل ايتۋدان مەن اۋلاق، ءبىراق ويداعى نارسە حالىق ءىسى بولعان سوڭ جازعانىم ەدى.
ءبىزدىڭ كەيبىر اجەپتاۋىر ادامسىنعان جىگىتتەرىمىز باسپا بەتىندە، كوپتىڭ الدىندا: «ءبىز قاراڭعى، جابايى، نادان، سورلى ەدىك...
ءبىزدىڭ بابالارىمىزدىڭ كوزى اشىلماعان سوقىر، پايىمسىز، جارىق دۇنيەنى تانىماعان، دالانى جايلاعان ايۋان قاتارى حالىق ەدىك»، تاعى وسى سياقتى بىرنەشە جالا، وتىرىك، وسەك، قيانات «جالپانىشتى» سوزدەر ايتىپ، ەل ەڭسەسىن سەلگە سالىپ، جەر ەتىپ جۇرگەندەرى از ەمەس، ونداي جىگىتتەردىڭ ەل سورىنا بىتكەنى ءسوزسىز ەمەس پە؟
ءبىزدىڭ بابامىز كىمنەن كەم، كىمنەن سورلى ەدى؟ مىڭ جىل جاساعان قازاقتىڭ ىشىنەن اقىلدى، پايىمدى ادامدار بۇگىنگى تاڭدا عانا شىعىپ پا؟ كەمەڭگەرلىك، دانىشپاندىق، ەل قاسيەتىن، بابامىزدىڭ ارۋاعىن تەپكەن تەنتەكتەردىڭ اۋزىنا قاشان تىيىم سالىنادى؟
بابامىزدىڭ ادامگەرشىلىگى، ەرلىگى، اقىلى، سيپات، سالتاناتى كوپ الدىندا ءادىل باعا الىپ، نەمەرە-شوبەرەلەرىنە قاشان ماقتانىش، تىمسال، مىسال بولىپ، جۇرت الدىندا ەڭسەمىزدى قاشان كوتەرەدى. باسقالار بابالارىنىڭ ارۋاعىنا سىيىنىپ باس ۇرعاندا، ونداي مىندەتتى بورىشىمىزدى باسىمىزدان اتقارۋعا ءبىزدىڭ ۇيالۋىمىزعا جول بولسىن؟
باسقالار بابالارىنىڭ مىنەز-قۇلقىنا، وسيەت، اقىلىنا، ادەت؛ ادەپ-عۇرپىنا جاڭا ءوسپىرىم بالالاردى تاربيەلەگەندە، ءبىز حالىق قاسيەتىن، تاريحىن، مادەنيەتىن، ادەبيەتىن ەلدەن جاسىرىپ، ارحيۆ پەن فيليالعا تىعىپ، ءسۇرى ەتكەنىمىزدىڭ ءجونى قايدان شىققان ادەپسىزدىك؟
ۇيالماي-قىزارماي كونسەرۆيروۆات ەتۋ — جاستارعا قارا پەردە ەمەس پە؟
تاعى وسى قالىپتا 10-20 جىل ءومىر سۇرسەك، قازاقتى — قازاق تاريحى، ادەبيەتى، تاعى باسقا جاقسى حالىق قاسيەتتەرىنە ءتۇسىندىرۋ ءۇشىن ءتىلماش، پەريەۆودشىكتەر كەرەك بولىپ، بارلىق ءتىل بايلىعىنان ايىرىلىپ، جاپ-جالاڭاش بوپ شىعا كەلمەيمىز بە دەگەن ويعا نە سەبەپتى وسى ۋاقىتقا دەيىن تۇسپەيدى؟

ماسكەۋ، 1943 جىل
(باۋىرجان مومىش ۇلىنىڭ ەسماعانبەتكە جازعان حاتىنان ءۇزىندى)