قىتايداعى ورتالىق حالىق راديوستانسياسىنىڭ قازاق تىلىندەگى راديوسى 2015 جىلى 1 قاڭتاردان باستاپ ارناۋلى تولقىنمەن 18 ساعات بويى باعدارلاما تاراتادى. بۇل قىتايداعى ءبىر جارىم ميلليون قازاق ءۇشىن تاعى ءبىر ۇلكەن قۋانىش بولماق.

جۇڭگو، ۇيعۇر، قازاق، كورەي، تيبەت، موڭعۇل تىلدەرىندە تاراتىلاتىن ورتالىق راديوسى قىتايداعى ەڭ ۇلكەن راديوستاسياسى. اتالعان راديونىڭ جۇڭگو تىلىندە باعدارلاما تاراتۋى 1949 جىلى جەلتوقساننان باستاۋ السا، قازاق تىلىندەگى راديوسى 1971 جىلى 1 مامىردا ەفيرگە كوتەرىلگەن بولاتىن. باستابىندا ءبىر ساعات باعدارلاما تاراتقان قازاق تىلىندەگى راديو قاز-قاز باسقان قادامىن نىقتاي ءجۇرىپ، 2014 جىلعا كەلگەندە كۇنىنە 7 ساعات باعدارلاما تاراتاتىن ورەگە جەتتى.

سوڭعى كەزدەرى جۇڭگو ۇكىمەتىنىڭ اقپارات مەديالارىن قولداۋ تەبىنىن ارتتىرۋىنا بايلانىستى ورتالىق حالىق راديوستانسياسىنىڭ قازاق تىلىندەگى راديوسى قوي جىلىنىڭ قاڭتار ايىنان باستاپ، ارناۋلى ەفيردە 18 ساعات بويى باعدارلاما تاراتۋ مۇمكىندىگىنە يە بولدى. سونىمەن قىتايدا كەلەر جىلدان باستاپ، كۇنىنە 18 ساعات بويى قازاق تىلىندە باعدارلاما تاراتاتىن 2 راديو جۇمىس ىستەيدى. مۇنىڭ ءبىرى شىنجاڭ ۇيعۇر اۆتونوميالى ولكەسىنىڭ ورتالىعى ءۇرىمجى قالاسىنان تاراتىلاتىن شىنجاڭ حالىق راديوستانسياسى، ال ەندى ءبىرى قىتايدىڭ استاناسى − پەكيننەن تاراتىلاتىن ورتالىق حالىق راديوستانسياسىنىڭ قازاق تىلىندەگى راديوسى.

ەستەرىڭىزگە سالا كەتەيىك، قىتايداعى قازاقتاردا قازاق تىلىندە شىعاتىن 10 نان استام گازەت (مۇنىڭ تورتەۋى كۇن سايىن، اپتاسىنا جەتى كۇنى بويى شىعاتىن باسىلىم بولىپ تابىلادى)، 50 گە جۋىق جۋرنال بار. شىنجاڭ تەلەارناسىنىڭ ءۇشىنشى، سەگىزىنشى جانە ون ەكىنشى ارناسى قازاق تىلىندە تاراتىلادى. سونىمەن بىرگە، قازاق تىلىندە جۇمىس ىستەيتىن 200 گە جۋىق سايت، 6 باسپا بار.

سۋرەتتە: كەلەر جىلى قاڭتاردان باستاپ قازاق تىلىندە 18 ساعات بويى باعدارلاما تاراتاتىن راديونىڭ تۇساۋكەسەر سالتاناتى.

قالياكبار ۇسەمحان ۇلى