(جەرلەسىمىز اقسەلەۋ سەيدىمبەكتىڭ ومىردەن وزعانىنا بەس جىل تولۋىنا)
ءالى ەسىمدە، قازاقتىڭ ءبىرتۋار ازاماتى، بەلگىلى قالامگەر، جەرلەسىمىز اقسەلەۋ سەيدىمبەكوۆتىڭ 70 جىلدىعىنا وراي، وسى جاڭاارقا توپىراعىندا، بايگەتوبە باسىندا 2012 جىلى مارقۇمعا اس بەرىلدى. كۇز ايى ەدى. بۇل كۇنى تابيعات توسىن مىنەز تانىتىپ، كۇن جاڭبىرلى بولدى. داستارحان جايىلىپ، ءدام تارتىلعان كەز بولاتىن. قازاقى كيگىز ءۇيدىڭ شاڭىراعىنان ساڭلاۋ تاۋىپ، ۇزىلگەن ءبىر تامشى قازاقتىڭ بەلگىلى اقىنىنىڭ ماڭدايىنا ءتۇستى. سول ساتكە كۋاگەر بولىپ وتىرعان مەن، ەركىمنەن تىس تىلگە ورالعان وسى جولداردىڭ ءبىرىنشى جولىن:
- اعىپ ءتۇستى ماڭدايعا كەپ ءبىر تامشى... – دەپ داۋىستاپ ايتىپ قالعانىم عوي، ءبىراق داستارحان باسىندا وتىرعان قوس اقىن تاراپىنان مۇنىما ەش قولداۋ بولمادى.
اعىپ ءتۇستى ماڭدايعا كەپ ءبىر تامشى،
سول تامشىنىڭ ءتۇسى مۇلدە الدامشى.
اقاڭ جاتقان بايگە توبە توسىندە،
ءتۇسىن تۇستەر جاۋھار جىرعا سال قامشى.
ءبارى بار – اۋ بۇل تامشىدا ءبارى بار،
تىرشىلىكتىڭ وزەك جالعار ءنارى بار.
كەڭىستىكتى كەڭ سوزدەرمەن ءسوز ەتكەن،
اقسەلەۋدەن ايرىلعان كۇن شەرى بار.
كۇمبىرلەگەن كۇي دومبىرا سازى بار،
سايىن دالا، اپتاپ ىستىق جازى بار،
ەر جىگىتتىڭ ءور كوڭىلىن جىقپايتىن،
سۇلۋ قىزدىڭ جان ەرىتەر نازى بار.
جان تۇرشىگەر جالعاندىقتىڭ ءزارى بار،
بەتتەن قاعار قاتال قىستىڭ كارى بار.
كوڭىل ءتورىن تەڭگە تەسكەن تالايعا،
سيپاي جاقسا ەم بولارلىق ءدارى بار.
«داۋرەنايدىڭ» سەزىم بويلار ءانى بار،
ناسىبايدىڭ ءتىل قۋىرعان ءدامى بار.
جانىبەكتىڭ ءانىن تىڭداپ تامسانعان،
نار تۇلعالى اقسەلەۋدىڭ ءۇنى بار.
بۇل تامشىدا زامانانىڭ زارى بار،
زاڭعار تاۋداي ىزا – كەكتىڭ قارى بار.
جولبيكە بوپ جورعالاعان جامانعا،
وتكەل بەرمەس ءنارلى ءسوزدىڭ ءبارى بار.
كورگەن تۇستەي ءوتتى ءومىر جانتالاس،
اقاڭ بيىك كۇيىنگەنمەن باقتالاس.
زەرلى ءسوز بەن بال تىلىنە ىنتىققان،
امان بولسىن، قالىڭ قازاق زامانداس.
30.06.2014 جىل
يسلام مياش ۇلى امانوۆ
سۋرەت: baq.kz
