بۇگىن پارلامەنت ءماجىلىسىنىڭ جالپى وتىرىسىندا پالاتا دەپۋتاتتارى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە اقپارات جانە كوممۋنيكاسيالار ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ءبىرىنشى وقىلىمدا ماقۇلدادى، دەپ حابارلايدى Qamshy.kz اقپارات اگەنتتىگى.

اتالعان زاڭ جوباسى بۇقارالىق اقپارات قۇرالدارى، تەلەراديو حابارلارىن تاراتۋ، اقپاراتتاندىرۋ جانە بايلانىس، اقپاراتتىق قاۋىپسىزدىك سالاسىنداعى قوعامدىق قاتىناستاردى قۇقىقتىق رەتتەۋدى قامتاماسىز ەتۋگە باعىتتالعان.

«تۇتاستاي العاندا، تالقىلانىپ جاتقان زاڭ جوباسىندا ءۇش ۇلكەن سالانى - اقپارات، بايلانىس جانە اقپاراتتاندىرۋ سالاسىن دامىتۋعا باعىتتالعان كەشەندى وزگەرىستەر قامتىلدى. زاڭ جوباسى  اقپارات سالاسىندا ازاماتتاردىڭ قۇقىعىن قورعاۋدىڭ مەحانيزمدەرىن كۇشەيتۋگە؛   بۇقارالىق اقپارات قۇرالدارى قىزمەتىندە ساپالى وزگەرىستەر جاساۋعا؛ اقپاراتقا قولجەتىمدىلىك بويىنشا مۇمكىندىكتەردى ۇلعايتۋعا؛ ۇلتتىق زاڭنامانىڭ ىشكى ۇيلەسىمىن قامتاماسىز ەتىپ، ونى قولدانۋدىڭ ساپاسىن ارتتىرۋعا مۇمكىندىك بەرەدى»، - دەدى ءماجىلىستىڭ جالپى وتىرىسىندا ق ر اقپارات جانە كوممۋنيكاسيالار ءمينيسترى داۋرەن ابايەۆ.

اقپارات جانە كوممۋنيكاسيالار ماسەلەلەرىن قامتيتىن بۇل جوبادا 12 زاڭ مەن 4 كودەكسكە وزگەرتۋلەر مەن تولىقتىرۋلار ەنگىزۋ كوزدەلگەن.

وسى ورايدا، داۋرەن  ابايەۆ زاڭ جوباسىندا قاراستىرىلعان باستى باعىتتارعا كەڭىرەك توقتالىپ ءوتتى.

 «بىرىنشىدەن، بۇقارالىق اقپارات قۇرالدارىنىڭ دامۋى ءۇشىن ساپالى زاڭنامالىق بازانى ودان ءارى نىعايتۋدى قاراستىرىلىپ وتىر. سونىڭ ىشىندە اكىمشىلىك جۇكتەمەلەر مەن شەكتەۋ شارالارىن ازايتۋ ماقساتىندا ءبىرقاتار جەڭىلدىكتەر جاسالادى. اتاپ ايتقاندا، ازداعان قۇقىق بۇزۋشىلىقتار ءۇشىن گازەتتىڭ تيراجىن تاركىلەۋ نەمەسە باق-تىڭ قىزمەتىن توقتاتۋ سياقتى جازالاردى الىپ تاستاۋ كوزدەلۋدە. اقپارات قۇرالدارىن شىندىققا ساي كەلمەيتىن اقپاراتتى تاراتۋعا قاتىستى جاۋاپكەرشىلىكتەن بوساتاتىن سەبەپتەر قاتارى دا ۇلعايادى. بۇل وزگەرىس مەملەكەتتىك ورگاندارداعى باق-پەن بايلانىس جونىندەگى وكىلەتتى تۇلعاعا جاۋاپكەرشىلىك جۇكتەيدى»، - دەپ ءتۇسىندىردى داۋرەن ابايەۆ.

 تاعى ءبىر ماسەلە بۇقارالىق اقپارات قۇرالدارىندا ازاماتتاردىڭ سۋرەتىن قانداي جاعدايدا رۇقسات سۇراماي جاريالاۋعا بولاتىنى ايقىندالدى. «مىسالى، كوپشىلىك جاپپاي قاتىساتىن مادەني، سپورتتىق جانە باسقا دا شارالاردا جۇرت الدىندا ءسوز سويلەۋگە قاتىستى. سونىمەن قاتار قاتار قازاقستاندىق كونتەنتتى ودان ءارى قاراي قولداۋ ماقساتىندا مەملەكەتتىك مەكەمەلەر مەن ۇيىمداردا تەك وتاندىق تەلەارنالاردى كورسەتۋ جوسپارلانۋدا»، - دەدى مينيستر.

سونىمەن قاتار، زورلىق-زومبىلىقتان زارداپ شەككەن بالانىڭ جەكە باسىن انىقتايتىن كەز كەلگەن اقپاراتتى، ونىڭ سۋرەتىن اقپارات قۇرالدارىندا جاريالاۋعا شەكتەۋ ۇسىنىلىپ وتىر.

ق ر اقپارات جانە كوممۋنيكاسيالار ءمينيسترى داۋرەن ابايەۆ شالعاي اۋدانداردا ۇيالى بايلانىستى جاقسارتۋدىڭ ءتاسىلى جايىندا ءتۇسىندىردى.

وسى تۇستا مينيستر ۇيالى بايلانىس وپەراتورلارىنان تاريفتەردى تومەندەتۋدى تالاپ ەتەتىنىن اتاپ ءوتتى.

ق ر اقپارات جانە كوممۋنيكاسيالار ءمينيسترى داۋرەن ابايەۆ باق-پەن ءوزارا ءىس-قيمىل ءۇشىن مەمورگانداردىڭ جاۋاپكەرشىلىگى ارتاتىنىن ايتتى.

اتاپ ايتقاندا، مەملەكەتتىك قىزمەتكەرلەردىڭ ەڭبەكاقىسى بۇقارالىق اقپارات قۇرالدارىنىڭ ساۋالدارىنا جاۋاپ بەرۋ جاعدايىنا بايلانىستى بولادى. «قىزمەت تيىمدىلىگىن باعالاۋدى بونۋستىق-بالدىق جۇيەگە بايلانىستىرامىز. ياعني ەگەر دە ول جاۋاپ بەرمەسە، ونىڭ رەيتينگى تومەندەيدى، سايكەسىنشە ەڭبەكاقىسى دا ازايادى. بىزدە اقپاراتقا قول جەتكىزۋ زاڭى بار، وندا مەمورگاندار قىزمەتىنىڭ تيىمدىلىگىن باعالۋدى ەسكەرەتىن ءبولىم قامتىلعان. باسشىسى قىزمەتكەردىڭ جۇمىسىنداعى تيىمدىلىكتىڭ نەگىزگى كورسەتكىشىن قارايتىن بولادى. كريتەرييلەردىڭ ءبىرى رەتىندە باق-پەن جۇمىس بولادى. سونىمەن قاتار ول ونى قىزمەتىنەن دە بوساتا دا الادى»،-دەدى مينيستر.

سونىمەن قاتار، داۋرەن ابايەۆ قازاقستاندا 600 مىڭعا تارتا وتباسى «سۇر» سپۋتنيكتىك تارەلكالاردى پايدالانىپ جۇرگەنىن جانە   ەلىمىزدە 1،5 ميلليون ادام قازاقستاندىق تەلەارنالاردى قارامايتىنىن ايتىپ ءوتتى.