سىرتقى قولايلى جاعدايلار جانە قىسقا مەرزىمدى اۋىتقۋلاردى رەتتەۋگە باعىتتالعان ۇلتتىق بانك شارالارىنىڭ ناتيجەسىندە قول جەتكىزىلگەن ۆاليۋتا نارىعىنداعى احۋالدىڭ تۇراقتىلىعى تۋرالى ق ر پارلامەنتىنىڭ سەنات وتىرىسىندا باياندامامەن ءسوز سويلەگەن ۇلتتىق بانك ءتوراعاسىنىڭ ورىنباسارى ولەگ سمولياكوۆ ايتىپ بەردى، دەپ حابارلايدى Qamshy.kz اقپارات اگەنتتىگى ۇلتتىق بانكتىڭ باسپا ءسوز قىزمەتىنە سىلتەمە جاساپ.  

«ايىرباستاۋ باعامى 8 قاراشاداعى جاعداي بويىنشا ءبىر اقش دوللارى ءۇشىن 333،76 تەڭگەنى قۇرادى. ۇلتتىق بانك تەڭگەنىڭ ەركىن وزگەرمەلى ايىرباستاۋ باعامى رەجيمى ساقتالعان جاعدايدا ينفلياسيالىق تارگەتتەۋ ساياساتىن ۇستانۋدى جالعاستىرادى. ۇلتتىق بانك قىزمەتىندەگى نەگىزگى ماقسات – بۇل باعا تۇراقتىلىعىن قامتاماسىز ەتۋ جانە جىلدىق ينفلياسيانى بەلگىلەنگەن نىسانالى دياپازون شەڭبەرىندە ۇستاپ تۇرۋ»، - دەدى و.سمولياكوۆ.

ونىڭ ايتۋىنشا، ينفلياسيا 2017 جىلعى ون ايدا 5،4%-دى قۇرادى. قازاندا جىلدىق كورسەتكىش بويىنشا ينفلياسيا 2017 جىلعا بەلگىلەنگەن 6-8% ءدالىز ىشىندە بولىپ، 7،7%-دى قۇرادى. باعا تۇراقتىلىعىن قامتاماسىز ەتۋ ءۇشىن قاجەتتى شارالاردى ۇلتتىق بانك تولىق كولەمدە قولدانۋدا. ەكونوميكانىڭ ۇزاق مەرزىمدى ورنىقتى ءوسۋى جانە حالىقتىڭ يگىلىگىن ارتتىرۋ باعا تۇراقتىلىعىنىڭ نەگىزى بولىپ تابىلادى.

سونىمەن بىرگە و.سمولياكوۆ اقشا قۇنىنىڭ نەگىزگى ينديكاتورى بازالىق مولشەرلەمەنىڭ ءمانى قازىرگى ۋاقىتتا 10،25%-دى قۇرايتىنىن اتاپ ءوتتى. و.سمولياكوۆ 2017 جىلدىڭ 9 ايىندا ۇلتتىق بانكتىڭ حالىقارالىق رەزەرۆتەرى 32،2 ملرد. اقش دوللارىن قۇراپ، 9،1%-عا ۇلعايعانىن ايتتى. ۇلتتىق قوردىڭ ۆاليۋتالىق اكتيۆتەرى 57،1 ملرد. اقش دوللارىن قۇرايدى، ال ەل رەزەرۆتەرىنىڭ جالپى سوماسى ءىجو-نىڭ 60%-ىن قۇراي وتىرىپ، 89،3 ملرد. اقش دوللارى بولدى.

«دەپوزيت نارىعىندا شەتەل ۆاليۋتاسىنداعى سالىمدار ۇلەسىنىڭ جىل باسىنداعى 55%- دان قازىرگى كەزدەگى 49%-عا دەيىن تومەندەۋى بايقالۋدا. ۆاليۋتا نارىعىنداعى تۇراقتىلىق جانە ينفلياسيا دەڭگەيىنىڭ تومەندەۋى تەڭگەمەن جيناقتاۋدى ودان ءارى ىنتالاندىراتىن بولادى. جىلدىڭ باسىنان بەرى بانكتەردىڭ ەكونوميكاعا كرەديتتەرىنىڭ كولەمى 13،2 ترلن. تەڭگەگە دەيىن 4%-عا ءوستى. ۇلتتىق ۆاليۋتامەن كرەديتتەر بەرۋ كولەمى 11%-عا (906،5 ملرد. تەڭگەگە) نەمەسە 9،5 ترلن. تەڭگەگە دەيىن ۇلعايدى. كرەديتتەر بويىنشا ورتاشا الىنعان مولشەرلەمە قىركۇيەكتە 14%-عا دەيىن تومەندەدى»، - دەدى و.سمولياكوۆ.

قورىتىندىلاي كەلە ول بانكتەردىڭ تۇراقتىلىعىن قامتاماسىز ەتۋ بويىنشا بەلسەندى جۇمىس جالعاسىپ جاتقانىن اتاپ ءوتتى: «بانكتەردى قالىپقا كەلتىرۋ جانە ەكونوميكانى كرەديتتەۋدى جانداندىرۋ ءۇشىن ىنتالاندىرۋ قازىرگى ساتتە جۇرگىزىلىپ وتىرعان بانك سەكتورىنىڭ قارجىلىق ورنىقتىلىعىن ارتتىرۋ باعدارلاماسىنىڭ ناتيجەسى بولادى».