باتىس قازاقستان وبلىسىندا انالارعا ارنالعان مۋزەي اشىلماق. وندا ەلگە ەڭبەگى سىڭگەن، وتباسىنداعى تالىم-تاربيەسىمەن ۇلگى ونەگە بولىپ جۇرگەن جانە كوپ بالالى انالار دارىپتەلەتىن بولادى.
تاياۋدا وتكەن وبلىستىق اسسامبلەيانىڭ كەڭەيتىلگەن وتىرىسىندا ج. دوسمۇحامەدوۆ اتىنداعى پەدكوللەدجدىڭ ديرەكتورى، بقو قحا جانىنداعى انالار كەڭەسىنىڭ ءتورايىمى شالقىما قۇرمانالينا مۋزەي اشۋ جونىندە ۇسىنىس ايتقان بولاتىن. «وتباسىنىڭ تىرەگى بۇل – انا. ەگەر انا دۇرىس بولماسا، ول وتباسى مۇشەلەرىنىڭ كەلەڭسىز جاعدايعا تۇسەتىنىن ءومىردىڭ ءوزى كورسەتىپ وتىر. انانى قۇرمەتتەۋ بارشامىزعا مىندەت. دانا انادان دارىندى بالا دۇنيەگە كەلەدى. ۇرپاقتىڭ ۇلاعاتتى بولۋى وتباسىندا اكە مەن اناعا بايلانىستى. وبلىسىمىزدا ءتۇرلى سالادا جەمىستى ەڭبەك ەتكەن، جانۇياسىنا ۇيىتقى بولىپ جۇرگەن ۇلگىلى انالار از ەمەس. ەگەر مۋزەي اشىلسا، وسىنداي انالاردى دارىپتەۋدى ماقسات تۇتىپ وتىرمىز. جالپى، وندا وڭىرىمىزدەن شىققان تانىمال ايەلدەر تۋرالى مالىمەتتەردى، قۇجاتتاردى، سۋرەتتەردى، تۇرمىستىق زاتتاردى دا قويۋ ويدا بار»، - دەدى شالقىما حايروللا قىزى.
اتالمىش جيىنعا قاتىسقان قازاقستان حالقى اسسامبلەياسى ءتوراعاسىنىڭ ورىنباسارى دارحان مىڭباي بۇل ۇسىنىستى قولدادى.
- مۇنداي مۋزەي الماتى وبلىسىندا بار. «اناعا قۇرمەت» دەپ اتالاتىن مادەني نىساندا جاقىندا ەلباسىمىز بولدى. وندا ەلىمىزدىڭ داڭقتى انالارىنا ارنالعان ءتۇرلى قۇجات، كىتاپ سەكىلدى قۇندى زاتتاردىڭ ءبارى جيناقتالعان. قازىرگى تاڭدا بۇل - جەتىسۋ وڭىرىندەگى ادام كوپ باراتىن تانىمال ورىنداردىڭ ءبىرى. ول جاقتا بولىپ جاتساڭىزدار ۋاقىت تاۋىپ، بۇل مۋزەيگە كىرىپ شىعۋعا كەڭەس بەرەر ەدىم. جالپى، انالارعا ارنالعان مۋزەيدى تەك وبلىس ورتالىعىندا ەمەس، اۋدانداردا دا اشسا، ارتىق ەتپەيدى. سەبەبى بۇل مادەني ورىندار وتباسى قۇندىلىعىن نىعايتۋعا دا اتسالىسادى. ەگەر جانۇيادا تاتۋلىق بولسا، وندا مەملەكەتىمىزدىڭ بىرلىگى نىعايىپ، ىنتىماعى ارتا تۇسەرى انىق،- دەدى ول.
گۇلىم اقاپ،
باتىس قازاقستان وبلىسى
