الماتى قالاسى قوعامدىق كەڭەسىنىڭ وسى كۇنگە دەيىنگى قىزمەتى مەن تاجىريبەسى تۋرالى «بولاشاق» رەسپۋبليكالىق قوزعالىسىنىڭ جانە «جاستار ءۇنى» جاستار قوعامدىق بىرلەستىگىنىڭ ءتوراعاسى، سونداي-اق اتالعان كەڭەستىڭ مۇشەسى داۋرەن بابامۇراتوۆ بايانداپ بەردى.
«قوعامدىق كەڭەس ءوز قىزمەتىن تۇراقتى جانە جۇيەلى نەگىزدە جۇزەگە اسىرادى. نەگىزگى ەرەكشەلىگى - اكىمشىلىكتەن تىس جەردە ورنالاسۋى. بۇل وتە ماڭىزدى. ءبىز و باستان وندا وتىرمايمىز دەگەن شەشىم قابىلدادىق. سەبەبى، حالىقتا «اكىمشىلىك عيماراتىنىڭ ىشىندە وتىرسا، ول اكىمنىڭ، مەملەكەتتىك ورگانداردىڭ قاراماعىندا بولادى، بۇل اكىمنىڭ قوعامدىق كەڭەسى» دەگەن جانساق پىكىر قالىپتاسقان. شىن مانىندە، قوعامدىق كەڭەس اكىمنىڭ نەمەسە مەملەكەتتىك ورگان باسشىسىنىڭ قاراماعىنداعى ەمەس، تاۋەلسىز كەڭەس»، - دەيدى داۋرەن بابامۇراتوۆ.
ونىڭ سوزىنشە، كەڭەستىڭ تاعى ءبىر ەرەكشەلىگى - «الماتى كەڭەسى» دەگەن رەسمي سايتى بار. كەڭەستىڭ قىزمەتى، تالقىلاۋداعى ماسەلەلەر، ۇسىنىستارى سول جەردە جاريالانادى. 2016 جىلدان باستاپ اتقارىلعان جۇمىستاردى جۇرت سايتتان كورە الادى.
«ءوز تاراپىمنان ءبىرشاما دۇنيەگە توقتالسام دەگەن ويىم بار. ءبىرىنشى ماسەلە - سايت ماسەلەسى. مەنىڭ ويىمشا ءاربىر قوعامدىق كەڭەستىڭ مىندەتتى تۇردە اقپاراتتىق ورتالىعى، ياعني سايتى بولۋى كەرەك. وكىنىشكە وراي، بارلىق جەردە مۇنداي ەمەس. ارينە، بۇل قوسىمشا قاراجات، قوسىمشا ادامنىڭ قىزمەتىن تالاپ ەتەتىن شىعار. ءبىراق، اقپاراتتىق سايتتىڭ بولۋى، مەنىڭ ويىمشا، زامان تالابى. سەبەبى، كۇندەلىكتى تۇراقتى تۇردە اتقارىلىپ وتىرعان جۇمىسقا قاتىستى اقپاراتتى الۋ ءۇشىن حالىققا ورتالىق كەرەك، ءبىر جۇيە كەرەك. سونىمەن قاتار، بۇل جەردە كەڭەستىڭ مۇراعاتى قالىپتاسادى. بۇل، ءسوزسىز، قوعامدىق كەڭەستىڭ قىزمەتىن جەتىلدىرەدى دەپ ويلايمىن»، - دەيدى ول.
كەڭەس مۇشەسى مۇنداي كەڭەستەر الەۋمەتتىك جەلىلەرگە دە كوڭىل ءبولۋ كەرەك ەكەنىن ايتادى.
«ءبىز اقپاراتتىق قوعامدا، تەحنولوگيالار دامىعان زاماندا ءومىر ءسۇرىپ جاتىرمىز. كەڭەستەردىڭ جۇمىسىن دا وسىعان بەيىمدەۋ كەرەك. ءبىزدىڭ Facebook الەۋمەتتىك جەلىسىندە ءوز پاراقشامىز بار. بۇل پاراقشادا قوعامدىق كەڭەستەرگە، جينالىستارعا، وتىرىستارعا، تىڭداۋلارعا، داۋلى سۇراقتارعا، وزەكتى ماسەلەرگە قاتىستى اقپاراتتىڭ بارلىعى تولىق تۇردە جاريالانىپ وتىرادى. مىسالى، 2016 جىلعى قىزمەتىمىزدىڭ قىسقاشا ەسەبىن 5000-نان استام ادام قاراپ، حاباردار بولعان. بۇل جاقسى ناتيجە جانە اقپاراتقا قولجەتىمدىلىك پەن اشىقتىقتىڭ ايقىن كورىنىسى. سوندىقتان قوعامدىق كەڭەستەردە الەۋمەتتىك جەلىدە پاراقشالارى بولىپ، سول جەردە تولىق اقپاراتتى بەرىپ وتىراتىن بولسا، ءسوزسىز جۇمىستىڭ تيىمدىلىگىن ارتتىرار ەدى»، - دەيدى كەڭەس مۇشەسى.
ودان بولەك، سپيكەر قوعامدىق كەڭەستەر ازاماتتاردىڭ قۇقىقتارى، بوستاندىعى مەن مىندەتتەرىنە قاتىستى نورماتيۆتىك-قۇقىقتىق اكتىلەردى قاراستىرىپ، ۇسىنىستار بەرەتىنىن ايتادى: «وسى ماسەلە قازىرگى ۋاقىتتا تالقىلانىپ جاتىر. وعان بايلانىستى سان-الۋان پىكىرلەر ايتىلدى. كەيبىرەۋلەرى وسى تارماقتى زاڭنان الىپ تاستاۋ كەرەك، كەيبىرەۋلەرى وزگەرىستەر ەنگىزۋ كەرەك دەپ ەسەپتەيدى. مەنىڭ ويىمشا، ەگەر ءبىز زاڭ اكتىلەرىن قارايتىن پۋنكتى الىپ تاستايتىن بولساق، وندا قوعامدىق كەڭەس تەك قانا ۇسىنىس بەرەتىن ورگان بولىپ قالادى. كوپتەگەن جيىنداردان ەشقانداي ايىرماشىلىعى بولمايدى. مەنىڭ ويىمشا، بۇل فۋنكسيا كەڭەستەردىڭ قۇزىرىندا قالۋ كەرەك، ول قوعامدىق كەڭەستەر ءۇشىن اسا ماڭىزدى».
ءسوز سوڭىندا داۋرەن بابامۇراتوۆ قوعامدىق كەڭەستەردىڭ حالىق پەن بيلىك اراسىن دانەكەرلەۋشى، بيلىك پەن قوعامدى بايلانىستىرۋشى قۇرىلىم ەكەنىنە توقتالدى.
«ەلباسىمىز ن.ءا. نازاربايەۆ: «بيلىك وڭ جاقتا، حالىق سول جاقتا، ەكەۋىنىڭ اراسى الشاقتاپ كەتتى، ورتاسىن دانەكەرلەيتىن قۇزىرلى ورگاندار قاجەت، ورتاسىن دانەكەرلەيتىن ازاماتتار كەرەك، قۇرىلىمدار كەرەك» دەپ اتاپ كورسەتكەن. قوعامدىق كەڭەس - دانەكەرلەۋشى، بيلىك پەن قوعامدى بايلانىستىرۋشى قۇرىلىم. ونىڭ قۇزىرىن ودان ءارى ارتتىرۋ ءۇشىن قۇرامىنىڭ ساپاسىن ارتتىرۋ قاجەت. ول ءۇشىن بەلگىلى ءبىر دەڭگەيدە بالاما ادىستەمە جولدارىن قاراستىرۋ قاجەت. كەڭەس قۇرامىنىڭ ساپاسى ارتقان سايىن، قىزمەتىنىڭ تيىمدىلىگى دە ارتا تۇسەدى دەپ ەسەپتەيمىن»، - دەدى ول.
