جۋىردا ورال شاھارىنداعى «سيتي سەنتر» ورتالىعىنىڭ ءتورتىنشى قاباتىندا «ايالاعان الاقان» قوعامدىق قورىنىڭ ۇيىمداستىرۋىمەن «ءومىر ءسۇر، ءسابي!» اتتى اكسيا ءوتتى. اكسيا شەڭبەرىندە ەرىكتىلەر توبى شالا تۋعان جانە اناسى باس تارتقان سابيلەرگە جۇننەن قولعاپ، شۇلىق، كەۋدەشەلەر توقىدى.
«ايالاعان الاقان» قوعامدىق قورىنىڭ جەتەكشىسى رادا حايرۋشيەۆانىڭ ايتۋىنشا، اكسياعا قالا تۇرعىندارى مەن قوناقتارى بەلسەندى تۇردە قاتىسقان.
- ءبىرى توقىما ءجىبىن اكەلىپ، ەندى ءبىرى سابيگە ارنالعان كيىمدەر مەن ويىنشىقتار اكەلىپ جاتتى. ەرىكتىلەر توبى ءۇش ساعاتتىڭ ىشىندە سابيلەرگە ارنالعان بىرنەشە شۇلىقتار، باس كيىم، كەۋدەشەلەر توقىدى. بۇل توقىما بۇيىمدار اسىرەسە، شالا تۋىلعان بوبەكتەردىڭ دامۋىنا وتە پايدالى. ويتكەنى بۇرىنعى كەزدە اتا-اجەلەرىمىز شالا تۋىلعان نارەستەنى تىماقتىڭ ىشىنە سالىپ، كوزگە ەلەۋسىزدەۋ تۇرعان ەسىكتىڭ جاقتاۋىنا ءىلىپ قوياتىن بولعان ەكەن. ، - دەيدى ول.
«ءومىر ءسۇر، ءسابي!» اكسياسىنا شامامەن 100-گە جۋىق ادام قاتىستى. ايالى الاقانداردىڭ جىلۋى سىڭگەن سابيگە ارنالعان زاتتار كەيىننەن پەريناتالدى ورتالىق پەن بوبەكتەر ۇيىندەگى سابيلەرگە تابىستالماق.
- قالامىزدا قايىرىمدى جاندار وتە كوپ. سابيلەردى قورعاۋ باعىتىنداعى ۇسىنىستارىمىزدى قابىل العان رۋسلان عابدۋللين، دەننيس ۆولودينعا، «سيتي سەنتردىڭ» Play، Happy kids، Daniel بۋتيكتەرىنىڭ يەلەرىنە جانە ىلعي وزگەلەرگە كومەك كورسەتۋگە دايىن تۇراتىن ءبىزدىڭ كومانداعا ايتار العىسىمىز شەكسىز. سونىمەن قاتار «بوبەكتەر ۇيىندە» 24 ءسابيدىڭ ءوز اتا-اناسىن كۇتىپ جۇرگەنىن قايىرىمدى جانداردىڭ قاپەرىنە سالعىم كەلەدى. ءبىزدىڭ قالامىزدا جۇرەگى مەيىرىمگە تولى كاسىپكەرلەر، قولىنداعىسىن قينالعان جانعا ءبولىپ بەرگىسى كەلىپ تۇراتىن قاراپايىم ادامدار، قوعامداعى تۇيتكىلدى ماسەلەگە سەرگەك قارايتىن قوعامدىق بىرلەستىكتەر از ەمەس. مەنى وسىنداي مەيىرىمدى جانداردىڭ كوپ بولعانى قۋانتادى، - دەيدى رادا حايرۋشيەۆا.
«ايالاعان الاقان» قوعامدىق قورى بىرنەشە مارتە مۇمكىندىگى شەكتەۋلى بالعىندارعا ارناپ كونسەرت بەرگەن بولاتىن.
گۇلىم اقاپ،
باتىس قازاقستان وبلىسى
