جۋىردا باتىس قازاقستان وبلىسىنداعى ح.بوكەيەۆا اتىنداعى وبلىستىق قازاق دراما تەاترىندا قايىرىمدىلىق ايلىعى اياسىندا «باتىس قازاقستان وبلىسى مۇگەدەكتەرى ەرىكتى قوعامى» قوعامدىق بىرلەستىگىنىڭ ۇيىمداستىرۋىمەن مۇمكىندىگى شەكتەۋلى جانداردىڭ XX وبلىستىق شىعارماشىلىق فەستيۆالى ءوتتى.
مۇمكىندىگى شەكتەۋلى جاندارعا شىعارماشىلىق الەۋەتىن دامىتۋعا جانە ءوز ونەرىن كورسەتۋگە جاردەمدەسۋ، ولاردىڭ قوعامعا ەتەنە ارالاسۋىنا، تاجىريبە الماسۋىنا جاعداي جاساۋ ماقساتىندا ۇيىمداستىرىلعان وبلىستىق فەستيۆالعا اۋداندىق جانە قالالىق كەزەڭدەردىڭ جەڭىمپازدارى قاتىستى. تاعدىر سىنىنا مويىماعان قايسار جاندار ەسترادالىق ۆوكال، كوركەم ءسوز وقۋ جانە كورمە جۇمىسى اتالىمدارى بويىنشا سىنعا ءتۇستى.
سالتاناتتى شارانىڭ اشىلۋىندا ءسوز العان وبلىس اكىمىنىڭ ورىنباسارى عابيدوللا وسپانقۇلوۆ مۇمكىندىگى شەكتەۋلى جاندارعا وزدەرىن قوعامنىڭ تولىققاندى مۇشەسى رەتىندە سەزىنۋىنە جاعداي جاسايتىن وسىنداي شارالاردىڭ ماڭىزى زور ەكەنىن ايتتى.
مەملەكەت كونستيتۋسياعا ساي الەۋمەت پەن الەۋمەتتىك سالاعا بيزنەس وكىلدەرى، ۇكىمەتتىك ەمەس ۇيىمدار تاراپىنان كوپتەپ كوڭىل ءبولىپ كەلەدى. ءبىزدىڭ وبلىستا ون الەۋمەتتىك جوبا ۇسىنىلسا، جالپى قۇنى ءتورت ملن تەڭگە قۇرايتىن ەكى جوبا ناقتى قولداۋ تاپتى، - دەي كەلە عابيدوللا ابدوللا ۇلى قولونەر شەبەرلەرىنىڭ جۇمىسىنا جوعارى باعا بەردى.
-جىل ساناپ بايقاۋدىڭ اۋقىمى كەڭەيىپ كەلەدى. جالپى وڭىرىمىزدە 800-دەن استام مۇمكىندىگى شەكتەۋلى ادام شىعارماشىلىقپەن اينالىسادى. قايىرىمدىلىق ايلىعىمەن ورايلاسقان شىعارماشىلىق فەستيۆالى بيىل دا تالانتتى جانداردىڭ تالابىن ۇشتاپ، ومىرگە دەگەن قۇلشىنىسىن ارتتىرۋعا جاردەمدەستى دەپ سەنەمىن، -دەيدى «بقو مۇگەدەكتەرى ەرىكتى قوعامىنىڭ» ءتوراعاسى جۇماجان قوججانوۆ.
بايقاۋ قورىتىندىسى بويىنشا «ەسترادالىق ۆوكال» اتالىمىندا ورال قالاسىنىڭ تۇرعىنى ەرلان ءابدراحمانوۆ ۇزدىك ورىنداۋشى اتاندى. «كوركەم ءسوز وقۋ» اتالىمى بويىنشا قاراتوبەلىك اينارا سارباسوۆا باس جۇلدەگە يە بولدى. سونىمەن قاتار زەلەنوۆ اۋدانىنان كەلگەن ميحايل ستارينەستىڭ قولونەر تۋىندىلارى «كورمە جۇمىسى» اتالىمىندا ۇزدىك دەپ تانىلدى. بارلىق قاتىسۋشىلار العىس حاتپەن ماراپاتتالسا، بايقاۋ جەڭىمپازدارىنا ديپلوم مەن باعالى سىيلىقتار تابىستالدى.
گۇلىم اقاپ،
باتىس قازاقستان وبلىسى
