جۋىردا حاديشا بوكەيەۆا اتىنداعى باتىس قازاقستان  وبلىستىق قازاق دراما تەاترىندا «اتا ءسوزى – باتا ءسوز» اتتى وبلىستىق باتاگوي قاريالار بايقاۋى ءوتتى.

باتاگويلەر بايقاۋىنا ورال قالاسى مەن اۋدانداردان 63-75 جاس ارالىعىنداعى 15 قاريا كەلگەن. ولار – ءتۇرلى ماماندىق يەلەرى. باسىم كوپشىلىگى ۇلتتىق كيىممەن ساحناعا شىقتى. بايقاۋ ءۇش كەزەڭ بويىنشا وزدىرىلدى. شارانىڭ الدىندا باتانىڭ ءمانى مەن ماڭىزى تۋرالى تولعاۋ ايتىلىپ، ابىز اقساقال بەينەسىندەگى اكتەر جاماعاتقا باتا بەردى. وبلىستىق سوعىس جانە ەڭبەك ارداگەرلەرى كەڭەسىنىڭ ءتوراعاسى مىرزاعالي مۇحامبەتوۆ قۇتتىقتاۋ ءسوز سويلەپ، باتاگوي اقساقالداردىڭ جاستار تاربيەسىنە وڭ ىقپالىن دا ايرىقشا اتاپ ءوتتى. بايقاۋدىڭ العاشقى ساتىسىندا قاريالار سوزدەن مۇدىرمەستەن ءاتى-جونىن، تەگىن سۋدىراتا ايتىپ، وزدەرىن تانىستىردى. اراسىندا ولەڭگە دە جول بەرىپ، دومبىراسىن كۇمبىرلەتكەندەر دە كەزدەستى. ەكىنشى بولىمدە دە وزا شاۋىپ، ايرىقشا ءبىلىمدارلىق تانىتقاندار از بولعان جوق. سونىڭ ىشىندە اقجايىقتىق سىيلىحان زەينەتوۆ قاراساي باتىردىڭ باتاسىن ايتقانى ءوز الدىنا، ونىڭ ءومىر جولى جانە ەرلىك ىستەرى تۋرالى دا كەڭىنەن باياندادى. باتاگوي اقساقالداردىڭ ىشىندە ەڭ ءساندى دە كوزگە تۇسەرلىكتەي كيىنگەن بورلىلىك ەسەنعۇل كوشەكبايەۆتىڭ ونەگەسى ايتۋعا لايىق. ورال قالاسىنىڭ اتىنان شىققان ءۇش اقساقالدىڭ ەكەۋى باكار وراقايەۆ، سەرىك قاراباليندەر – جانىبەك اۋدانىنىڭ تۋمالارى. ەكەۋى دە تىم ءتاۋىر ونەر كورسەتىپ، باۋىرجان مومىش ۇلىنىڭ، كەنەن ازىربايەۆتىڭ باتالارىن اسەرلى ورىندادى. شىڭعىرلاۋلىق اقساقال، قاجى تەمىرعالي جانتاسوۆتىڭ دا ءسوز ساپتاۋى وڭتايلى شىقتى. بۇرىنعى فەلدشەر، بوكەيوردالىق سەيتەمالى قۋانشالييەۆتىڭ باسقالارمەن سالىستىرعاندا، ونەرى ءسال كەمشىن تۇسسە دە، كورەرمەن قاۋىم وعان دا ريزالىقپەن قول سوقتى. ءبىراق قاشاندا «جۇزدەن جۇيرىك وزادى جارىسقاندا» دەگەن ءتامسىل بار. كورەرمەندەر باتاگوي قاريالاردىڭ ونەرىن قىزىقتاي وتىرىپ، ءۇش ساعاتقا جۋىق ۋاقىتتىڭ قالاي وتكەنىن سەزبەي دە قالدى. سونىمەن ءادىلقازىلار القاسىنىڭ ۇيعارۋىمەن باس جۇلدە باتىس قازاقستان وبلىسىنىڭ تاسقالا اۋدانىنىڭ تۇرعىنى جۇماگەلدى ۇمبەتالييەۆكە ۇسىنىلدى. ال ءبىرىنشى ورىندى قاراتوبەلىك ەرتاي سەردالين يەلەنسە، ەكىنشى ورىندى زەلەنوۆتىق ساتىبالدى تولەگەنوۆ، جاڭاقالالىق امانجان سالاۋاتوۆتار قانجىعاسىنا بايلادى. ءۇشىنشى ورىن تەمىرعالي جانتاسوۆ (شىڭعىرلاۋ)، سىيلىحان زەينەتوۆ(اقجايىق)، يسماعۇل مۋسيندەردىڭ (قازتالوۆ) ەنشىسىنە ءتيدى. قالعان قاتىسۋشىلار وبلىستىق مادەنيەت، ارحيۆتەر جانە قۇجاتتاما باسقارماسىنىڭ العىسحاتتارى جانە ديپلومدارىمەن ماراپاتتالدى.

گۇلىم اقاپ،

باتىس قازاقستان وبلىسى