2015 جىلى رەسپۋبليكا كولەمىندە تويلاناتىن قازاق حاندىعىنىڭ 550 جىلدىعىنا بايلانىستى پەتروپاۆل مەن پاۆلودار اتاۋىن حان  كەرەي مەن حان جانىبەك دەپ وزگەرتۋ كەرەك. وسى باستامانى وقىرمان تالقىسىنا ۇسىنىپ، سايتىمىزدا جازعان بولاتىنبىز(http://qamshy.kz/؟p=16716). جۇرتشىلىق تاراپىنان قىزۋ تالقىلانعان بۇل ۇسىنىسقا بايلانىستى جۋرناليستەر مەن قوعام بەلسەندىلەرىنىڭ پىكىرىن بىلگەن ەدىك. 

بولات ءمۇرسالىم:

ۇسىنىستى قولدايمىن. قازاق حاندىعىنىڭ نەگىزىن قالاعان تۇلعالارعا قاي اقالانىڭ اتىن بەرسە دە لايىق. ءبىراق، بۇل ۇسىنىس مەملەكەت تاراپىنان قولداۋ تابا ما، جوق پا - ايتا المايمىن. ويتكەنى، قالا اتىن وزگەرتۋدىڭ ءوز پروسەدۋراسى بار. ۇسىنىس جەرگىلىكتى حالىقتىڭ جانە قالالىق ءماسليحاتتىڭ قولداۋىنا يە بولۋى كەرەك. قالالىق ونوماستيكالىق كوميسسيا قولداپ، رەسپۋبليكالىق كوميسسياعا جىبەرەدى دەگەن سياقتى ءوز ءۇردىسى بار. بۇل زاڭدى جاعى. ال، ماسەلەنىڭ ساياسي جاعى تاعى بار. ونىڭ بارلىعى ساياسي ەليتا مەن يستەبليشمەنتتىڭ ەرىك-جىگەرىنە بايلانىستى.

ايدوس جۇقان ۇلى:

بيلىك مۇندايدى قولدامايدى. ويتكەنى، بيلىك 23 جىل بويى ورىستىلدىلەردىڭ قامىن جەپ كەلەدى. سوندىقتان بۇل ۇسىنىس ولاردىڭ ۇستانىمىنا قايشى.

قاسىم  امانجول ۇلى:

مۇنداي جەكەلەگەن ۇسىنىستار ءجيى شىعىپ كەلە جاتىر عوي... مەملەكەتتىك بيلىكتەن قولداۋ تاپپايدى دەپ ويلايمىن. سەبەبى، رەسەي بيلىگىندە اگرەسسياشىل پۋتين، قازاقستان بيلىگىندە مامىلەشىل باسشى وتىرعان كەزدە مۇنداي باستامالاردىڭ ەشقايسىسى دا جۇزەگە اسپايدى.

رۋزا بەيسەنبايتەگى:

قازاق حاندىعىنىڭ 550-جىلدىعى اياسىنداعى ۇسىنىستارىڭىز وتە ورىندى، ارينە. ەگەر ءبىزدىڭ ەل وتارلىق سانادان ساۋىققان ەل بولسا بۇنداي ۇسىنىستى 70 پايىزعا تاياپ قالعان قازاق ۇلتى دا (ناقتىلى بۇكىل ەل عوي)، بيلىك تە ەكى قولىن كوتەرىپ قولداۋشى ەدى. ءبىراق پۋتيندىك رەسەيگە جالتاقتاپ وتىرعان ءبىزدىڭ بيلىك مۇنداي شەشىمدى قابىلداي قويار ما ەكەن؟ ءتىپتى وسى جالتاقتاعان كۇيىمىزدە قالا بەرەمىز بە دەپ قورقامىن. ايتالىق، سوڭعى كەزدەرى ءبىر كەرەكۋدىڭ وزىندە قالا اتاۋىن وزگەرتكىسى كەلمەيتىن ءوز قانداستارىمىزدىڭ دا قاتارى كوبەيگەن سياقتى. مەن سونى بايقايمىن.

ماقسات جاقاۋ:

تولىق قولدايمىن. ءبىراق بيلىك زاڭعا سۇيەنەدى. ال زاڭدا جەرگىلىكتى تۇرعىنداردان حات ءتۇسىپ، قول جينالىپ، ارنايى وبلىستىق قۇزىرلى ورگاندارعا ارىزداندانباسا ۇسىنىس جۇزەگە اسپايدى. ونىڭ ۇستىنە سول ايماقتاعى حالىقتىڭ باسىم بولىگى ورىستار بولعان سوڭ، ماسەلە ناتيجەسىز قالۋى تاعى مۇمكىن. بۇل جەردە ەلابسىنىڭ ساياسي شەشىمى قاجەت، تەك قانا سول كىسىنىڭ ۇيعارىمىمەن شەشىلەتىن دۇنيە بۇل!