سەميا – شاعىن مەملەكەت.

مەن – پرەزيدەنت، سەن – پرەمەر.

ارتتىم ساعان كوپ مىندەت،

پرەمەر جولداس، بەر پريمەر.

مەن تىڭدار دەپ سەلت ەتپە،

ەسكىلىكتىڭ ۋاعازىن.

سەن ورىندا، ەكى ەتپە

پرەزيدەنتتىڭ ۋكازىن.

باسقارا ءبىل ءۇي ءىشىن،

بەردىم ساعان بيلىكتى.

جەمىستى بولسا جۇمىسىڭ،

مەن ايامان سىيلىقتى.

بار دوسىم دا، بار دۇشپان،

سال ويلانىپ اقىلعا.

الىستاي ءبىل الىستان،

جاقىنداي ءبىل جاقىنعا.

جاۋاپتىمىز ءسىز بەن ءبىز،

ۇقسىن باسقا ۇقپاسىن.

مەملەكەتكە تاۋەلسىز

دۇشپان قولىن سۇقپاسىن.

كوكىرەگىمنىڭ كۇيى ءۇشىن،

سەن ەڭبەك ەت مەن ءۇشىن.

باسقار ءوزىڭ ءۇي ءىشىن،

مەن جىرلايىن ەل ءۇشىن.

جىر توقيمىن كوپ ويعا،

جەتەر مە ەكەن ۋاقىتىم.

مەن دە ويلايمىن، سەن دە ويلا

بالالاردىڭ باقىتىن.

ءبىزدىڭ بايتاق ەلىمىز،

سەميالاردان قۇرالعان.

ەلىن سۇيەر، سەنىڭىز،

ءوز سەمياسىن سۇيە العان.

ءسۇي ەلىڭدى – ۇيىڭدەي،

ءسۇي ءۇيىڭدى – ەلىڭدەي.

كوكىرەكتەگى كۇيىڭدەي

جىرىڭدى جاز ەرىنبەي.

بۇل ولەڭ قاسىم امانجولوۆتىڭ 1953 جىلى جازىلعان ولەڭى. «وتان وتباسىنان باستالادى» دەپ ءجيى ايتامىز. ءبارىمىز وتانىمىزدى سۇيەتىن وتانسۇيگىش پاتريوتتارمىز. الايدا، وتباسىن قادىرلەي، ارداقتاي بەرمەيمىز. وعان سەبەپ وتباسى قۇندىلىعىن ساقتامايتىنىمىزدا.

2016 جىلى قازاقستاندا 140 840 نەكە تىركەلگەن. دەگەنمەن وسى ءبىر جىل ىشىندە 51 775 وتباسى اجىراسىپ كەتكەن. (140 840 نەكەنىڭ ەمەس، جالپى العاندا اجىراسقاندار). ونىڭ ىشىندە، وڭىرىمىزدە اجىراسۋ ۇيلەنگەندەردىڭ ۇشتەن بىرىنە تەڭ بولعان (باتىس قازاقستان وبلىسى 5 030/ 1829).

ۇلىبريتانيالىق The Economist جۋرنالىنىڭ ءداستۇرلى "الەم ستاتيستيكاسى - 2015" جيناعىندا قىرعىزستان اجىراسۋ كورسەتكىشى بويىنشا الەم ەلدەرى اراسىندا 48-ورىندا تۇر. ال قازاقستان بولسا، العاشقى وندىققا كىرگەن.

الەۋمەتتانۋشى، ەۋرازيا ۇلتتىق ۋنيۆەرسيتەتىنىڭ وقىتۋشىسى ايگۇل زابيروۆا ەلدەگى اجىراسۋدىڭ كوبەيۋىندە زاڭدىلىق بار دەيدى. ونىڭ ايتۋىنشا، 1990 جىلمەن 2010 جىلداعى دەرەكتەرگە قاراعاندا، قالا حالقى كوبەيىپ، اۋىل تۇرعىنى ازايعان. سونىڭ اسەرىنەن ايەل مەن ەركەكتىڭ ستاتۋسى دا وزگەرگەن. ەتى ءتىرى، وقىعان قازاق قىزدارىنا قالادا كوپ مۇمكىندىك اشىلعان. بۇرىنعىداي اۋىلدا قالىپ،  اتا-اناعا، اعايىن-تۋىسقا، قارجىعا تاۋەلدىلىك جويىلعان.

"ايەل ءۇشىن قالادا جۇمىس، مۇمكىندىك كوپ. ايەلدىڭ وزىنە دەگەن سەنىمى ارتتى. بۇرىن سوۆەت كەزىندە ادامدى ۇيلەنگەن-ۇيلەنبەگەنى، اجىراسقانىنا قاراپ باعالايتىن. ءقازىر بۇل پىكىر وزگەردى. سوزدەرى جاراسپاعان جۇپتاردا بۇرىن «بالا ءۇشىن شىداۋ كەرەك» دەگەن تۇسىنىك بولسا، ءقازىر «بالانى الداماۋ، ولار ءۇشىن وتىرىك باقىتتى بولۋدىڭ قاجەتى جوق، شىنايى ءومىر ءسۇرۋ كەرەك» دەگەن پىكىر قالىپتاستى،– دەيدى ايگۇل زابيروۆا.

ال ۇلىبريتانيانىڭ بەدەلدى باسىلىمى The Economist جاريالاعان سوڭعى "الەم ستاتيستيكاسىندا" قازاقستان اجىراسۋدان 10-ورىندا تۇر. مۇنداعى دەرەك بويىنشا، مىڭ ادامعا شاققاندا قازاقستانداعى اجىرسۋ كورسەتكىشى – 2،7. ءبىراق قازاقستان ۇيلەنۋ جاعىنان دا الدىڭعى وندىقتىڭ ىشىندە، ياعني 9-ورىن. مىڭ ادامعا شاققاندا ۇيلەنۋ كورسەتكىشى دە سوعۇرلىم جوعارى- 9،7.

ۇلى ەلمىز، جەتىمىن جىلاتپاعان، جەسىرىن قاڭعىرتپاعان حالىقپىز دەپ ماقتانامىز. مەملەكەت باسشىسى ن.ءا.نازاربايەۆتىڭ وتباسى ينستيتۋتىن نىعايتۋ مەن رۋحاني-ادامگەرشىلىك تاربيەنى كوتەرۋگە ەرەكشە كوڭىل ءبولىپ كەلە جاتقاندىعىن ايتىپ كەلەدى. ەندەشە، اركىم ءوز وتباسىن ساقتاۋدا وتانىنا قىزمەت ەتىپ جاتقانىن تۇسىنگەنى ابزال.

نازەركە توقجان