وسكەمەن قالاسىندا وتەتىن جيىندا جەكسەنبىلىك مەكتەپتەردىڭ جايى، تىلدەردى وقىتۋداعى ەرەكشەلىگى ، ەتنوس تىلدەرىن وقىتۋدىڭ ۇلەس سالماعى جونىندە ءسوز قوزعالاتىن بولادى.

قازاقستان رەسپۋبليكاسى مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتى 2017 جىلعى 29 ماۋسىم كۇنى «جەكسەنبىلىك مەكتەپتەردە قازاق ءتىلى مەن ۇلتتىق (انا) تىلدەردى جەدەلدەتە وقىتۋداعى ءادىس، تاجىريبە، يننوۆاسيا» اتتى رەسپۋبليكالىق سەمينار-ترەنينگ وتكىزەدى.

سەميناردىڭ ماقساتى – ەتنومادەني ورتالىقتار جانىنداعى جەكسەنبىلىك مەكتەپتەردە قازاق جانە انا تىلدەرىن وقىتۋدىڭ ادىستەمەسىن جەتىلدىرۋ، وزىق تاجىريبەنى زەردەلەۋ جانە قورىتۋ، وقىتۋدىڭ يننوۆاسيالىق ادىستەرى مەن تەحنولوگيالارىن تاجىريبەگە ەنگىزۋ.

سەمينارعا ق ر مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتىنىڭ، ش.شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعىنىڭ قىزمەتكەرلەرى، ادىسكەر عالىمدار، ءتىل ماماندارى، جەكسەنبىلىك مەكتەپ وقىتۋشىلارى قاتىسادى.

سەمينار بارىسىندا ادىسكەر-عالىمدار تىلدەردى وقىتۋدىڭ ءتيىمدى تەحنولوگيالارى، ادىس-تاسىلدەرىمەن بولىسەدى. جەكسەنبىلىك مەكتەپ وقىتۋشىلارى مەن رەسپۋبليكاعا بەلگىلى ۇزدىك ادىسكەرلەر پانورامالىق جانە شەبەرلىك ساباقتارىن كورسەتەدى.

وتەتىن ورنى: وسكەمەن قالاسى، حالىقتار دوستىعى كوشەسى، 6 ءۇي «ەدەلۆەيس» كونفەرەنسيا زالى