ەتنومادەني ورتالىقتار جانىنان اشىلعان تەگىن ءتىل ۇيرەتۋ كۋرستارى ءوز جۇمىسىن باستادى. اۋقىمدى شارانى قولعا الماس بۇرىن سالا ماماندارى 14 ساۋىردە الماتى قالاسىندا باس قوسىپ، جەكسەنبىلىك مەكتەپتەردە قازاق جانە انا تىلدەرىن وقىتۋ كۋرستارىنىڭ وقىتۋشىلارىنا ارنالعان نۇسقاۋلىق-ادىستەمەلىك سەمينار وتكىزدى.

جيىن بارىسىندا قازاق جانە انا تىلدەرىن وقىتۋ كۋرستارىن جۇيەلى وتكىزۋ جولدارى تالقىلانىپ، ناتيجەلى جۇمىستىڭ جوسپارى جاسالدى. «مەملەكەتتىك ءتىلدى ۇيرەتۋ ەليتالىق كۋرسى» مادەني مەكەمەسىنىڭ ديرەكتورى، مودەراتور ساۋلە قايىرعالي قىزى جيىندى اشىپ، جينالعانداردى سەمينار باعدارلاماسىمەن تانىستىردى. نەگىزگى ءبولىم ش.شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعى «اكىمشىلىك-ۇيىمداستىرۋ» ءبولىمىنىڭ باسشىسى گۇلنار سەيىلحان قىزىنىڭ قۇتتىقتاۋىمەن جالعاستى. ءتىل ماماندارىنىڭ تالقىسىندا فيلولوگيا عىلىمدارىنىڭ كانديداتى، دوسەنت ساۋلە اسانباي قىزى «قازىرگى ءبىلىم بەرۋ جۇيەسىندە كوپتىلدى پوليمادەنيەتتى تۇلعانى قالىپتاستىرۋ» تاقىرىبىنداعى بايانداماسىن وقىدى.«ەتنومادەني ورتالىقتار جانىنداعى جەكسەنبىلىك مەكتەپتەردە قازاق جانە انا تىلدەرىن وقىتۋدا ينتەربەلسەندى ادىستەردى قولدانۋ» تاقىرىبىندا اينۇر جالەل قىزى ءوز ويىن ورتاعا سالدى. وقىتۋ كۋرسى بويىنشا بارلىق انا تىلدەرى مەن قازاق تىلىنە كۇنتىزبەلىك-تاقىرىپتىق جوسپارلار 60 اكادەميالىق ساعات جۇكتەمەسىنە نەگىزدەلىپ جاسالۋ كەرەكتىگىن ەسكەرتىپ، وقىتۋشىلاردى جالپى جۇمىس كەستەسىنىڭ ەسەپتىك تابەلىمەن تانىستىردى.

سەمينار سوڭى اشىق پىكىرتالاسقا ۇلاستى. ماماندار بەلگىلەنگەن مەجەدە مەملەكەتتىك ءتىل مەن ەتنوس تىلدەرىن وقىتۋدىڭ وڭتايلى ءادىسىن ويلاستى. ءبىراۋىزدان دەڭگەيلى كۋرستار اشۋدى ماقۇلداپ، باستاۋىش جانە جالعاستىرۋشى توپتار كۇنتىزبەلىك-تاقىرىپتىق جوسپارلار بويىنشا كەستەگە سايكەس ساباق الاتىن بولادى.

ايتا كەتەيىك، اعىمداعى جىلدىڭ 19 ساۋىرىندە پەداگوگيكالىق كەڭەس وتەدى.