جەكسەنبىلىك مەكتەپتەر ەلىمىزدەگى ءار ۇلت وكىلدەرىنىڭ ءوز انا ءتىلىن، تاريحى مەن ءداستۇرىن تەرەڭ تانۋعا، سونىمەن قاتار مەملەكەتتىك ءتىلدى تەگىن وقىپ-ۇيرەنۋگە بارىنشا جاعداي جاساپ كەلەدى. وسكەمەندەگى «ەدەلۆەيس» قوناق ءۇي كەشەنىنىڭ ءماجىلىس زالىندا «جەكسەنبىلىك مەكتەپتەردە قازاق ءتىلى مەن ۇلتتىق (انا) تىلدەردى جەدەلدەتە وقىتۋداعى ءادىس، تاجىريبە، يننوۆاسيا» تاقىرىبىندا رەسپۋبليكالىق سەمينار-ترەنينگ ءوتتى.

سەمينار ەتنومادەني ورتالىقتار جانىنداعى جەكسەنبىلىك مەكتەپتەردە قازاق جانە انا تىلدەرىن وقىتۋدىڭ ادىستەمەسىن جەتىلدىرۋ، وزىق تاجىريبەنى زەردەلەۋ جانە قورىتۋ، وقىتۋدىڭ يننوۆاسيالىق ادىستەرى مەن تەحنولوگيالارىن تاجىريبەگە ەنگىزۋ ماقساتىندا ۇيىمداستىرىلعان. اتالمىش شاراعا ش.شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعىنىڭ ديرەكتورى، فيلولوگيا عىلىمدارىنىڭ كانديداتى ەربول تىلەشوۆ، «مەملەكەتتىك ءتىلدى ۇيرەتۋ ەليتالىق كۋرسى» مادەني مەكەمەسىنىڭ ديرەكتورى ساۋلە باقتىبايەۆا، كوپتىلدى ءبىلىم بەرۋدى دامىتۋ ورتالىعىنىڭ ديرەكتورى، دوسەنت ساۋلە اسانبايەۆا، ادىسكەر عالىمدار، ءتىل ماماندارى مەن جەكسەنبىلىك مەكتەپ وقىتۋشىلارى قاتىستى.

-ەلباسى جۇرگىزىپ وتىرعان مەملەكەتتىك ساياساتتىڭ ارقاسىندا ەلىمىزدە قازاقستان حالىقى اسسامبلەياسى جۇمىس ىستەيدى. جەكسەنبىلىك مەكتەپ مۇعالىمدەرىنە ارنالعان بۇل سەميناردىڭ ءمانى زور. شەبەرلىك ساباقتارىنداعى ادىس-تاسىلدەر مەن وزىق تاجىريبەلەر وڭ ناتيجەسىن بەرەدى دەپ سەنەمىن. مەملەكەتتىك ءتىلدى بىلەتىن، سىيلايتىن حالىققا اينالساق، ەڭبەگىمىزدىڭ جەمىسى سول بولماق،-دەدى ەربول ەردەمبەك ۇلى.

سەمينار بارىسىندا ادىسكەر — عالىمدار تىلدەردى وقىتۋدىڭ ءتيىمدى ادىس-تاسىلدەرىمەن جانە تەحنولوگيالارىمەن ءبولىستى. جەكسەنبىلىك مەكتەپ وقىتۋشىلارى مەن رەسپۋبليكاعا بەلگىلى ۇزدىك ادىسكەرلەر پانورامالىق جانە شەبەرلىك ساباقتارىن كورسەتتى.

سونداي-اق، قازاق تىلىمەن قاتار كورەي، وزبەك، دۇنگەن، گرەك، تۇرىك، ءازىربايجان، بالقار ءتىلى مۇعالىمدەرىنىڭ قارقىندى وقىتۋدا ينتەربەلسەندى ادىستەردى قولدانۋ جانە وقىتۋداعى يننوۆاسيالىق تەحنولوگيالار جايلى باياندامالارى تىڭدالدى.

-مەن تارازداعى №4 مەكتەپتە وزبەك ءتىلى مەن ادەبيەتىنەن جانە 1996 جىلدان بەرى جەكسەنبىلىك مەكتەپتە مەملەكەتتىك ءتىل-قازاق تىلىمەن قاتار تاجىك، وزبەك تىلدەرىنەن ساباق بەرىپ كەلەمىن. مۇنداي سەمينار-ترەنينگتەردىڭ ءبىز ءۇشىن ماڭىزى زور. ءتىل ءبىلىمى سالاسىنداعى بىلىكتى ماماندارمەن كەڭەسەمىز، وزگە وڭىرلەردەگى جەكسەنبىلىك مەكتەپتەردىڭ ۇستازدارىمەن سۇحباتتاسىپ، تاجىريبە الماسامىز. ءتۇرلى شەبەرلىك ساباقتارى ءوتىپ جاتىر. ءار ادام ءوز ۇلتىنىڭ ءتىلىن، مادەنيەتىن ءبىلۋى ءتيىس. جەكسەنبىلىك مەكتەپتە ءتىل ۇيرەنەم دەۋشىلەردىڭ جاسىنا شەكتەۋ جوق. تەك مەكتەپ وقۋشىلارى عانا ەمەس، انا ءتىلىن تەرەڭ بىلگىسى كەلەتىن ەرەسەكتەر دە كەلەدى،-دەيدى تارازدىق ۇستاز ۇلبولسىن حادىربايەۆا.

ەلىمىزدە ءبىر شاڭىراقتىڭ استىندا ءتاتۋ-تاتتى ءومىر ءسۇرىپ جاتقان بارشا ۇلتتار مەن ۇلىستاردىڭ ءتىلى مەن مادەنيەتىن ساقتاۋ ءۇشىن مەملەكەت تاراپىنان مۇمكىندىگىنشە بارلىق جاعداي جاسالعان. ينتەگراسيا مەن جاھاندانۋ زامانىندا ءتىل ساياساتىن جۇزەگە اسىرۋدا، ۇشتىلدىلىكتى دامىتۋ باعىتىندا ناقتى شارالار جۇزەگە اسىرىلۋدا. وسى ورايدا وسكەمەندەگى «ۆوزروجدەنيە» جەكسەنبىلىك مەكتەبىنىڭ جۇمىسىن ەرەكشە اتاپ وتۋگە بولادى. مەملەكەتتىك تىلمەن قاتار توعىز ءتىلدى تەگىن ۇيرەنۋگە مۇمكىندىك بەرەتىن، ءوزىنىڭ جەكە عيماراتى مەن جارعىسى بار بۇل ءبىلىم ورداسى – رەسپۋبليكاداعى ەڭ مىقتى جەكسەنبىلىك مەكتەپتەردىڭ بىرىنەن سانالادى.

ايجانات باقىت قىزى