بۇگىن «نۇر وتان» پارتياسى ءتوراعاسىنىڭ ءبىرىنشى ورىنباسارى مۇحتار قۇل-مۇحاممەد 57 جاسقا كەلدى. 20 جىلدان بەرى ۇلكەن ساياساتتا بەلسەندى جۇرگەن تۇلعانىڭ وتكەنى مەن بۇگىنى قانداي؟ Qamshy.kz ءتىلشىسى وسى سۇراق توڭىرەگىندە ىزدەنىپ، «بالا مۇحتار قانداي بولعان؟ بۇگىنگى بيلىكتەگى مۇحتاردىڭ بەينەسى وزگەردى مە؟» دەگەن سۇراقتى مۇحتار ابرار ۇلىنىڭ مەكتەپتەگى سىنىپتاسى، اۋىلداسى سوۆەتحان ۇمىتقاجييەۆكە قويدى:

مۇحتار ويىنعا بەرىلگەن بالا ەمەس

- ءبىز مۇحتارمەن اۋىلدا بىرگە وستىك. ءبىرىنشى سىنىپقا بىرگە باردىق.  3-تەن كەيىن مەن «ب» سىنىبىندا، ول ۇلگەرىمى جاقسى بالالاردىڭ ىرىكتەلگەن «ا» سىنىبىندا وقىدى. ءۇيىمىز ىرگەلەس بولدى. مالعا شىقسا 4-5 كىتاپتى قولتىقتاپ شىعادى. مەن ونىسىنا كۇلەم، ول «وقۋ كەرەك! كورەسىڭ، مەن كەيىن باستىق بولامىن» دەپ قالجىڭدايتىن. ايتقانىنداي باستىق بولدى.

ول 3-تەن كەيىن «ا» سىنىبىنا اۋىسىپ كەتسە دە، ارالاسىپ تۇردىق. ساباققا بىرگە بارىپ، بىرگە قايتاتىنبىز. «سوۆەت، سەن دە جاقسى وقىساڭشى» دەپ قويمايتىن. مالعا قولتىقتاپ العان كىتاپتارىن وقىپ بارادى، وقىپ قايتادى. تابىنعا مال اپارىپ، كەشكە قارسى الامىز، سوندا قولىنداعى كىتابىن تاستاماي «مەن وقۋىم كەرەك، سەن دە وقىساڭشى» دەپ ايتاتىن. مەن تراكتور ايدايمىن دەيتىنمىن.  ويىنعا بەرىلگەن بالا ەمەس. ول ادال ادام بولاتىن. مەكتەپتە جۇرگەندە بارلىق ءپاندى جاقسى وقىعان. وعان ءتورت قويسا، نامىستاناتىن. مۇعالىمدەر بولمەسىنە دەيىن بارىپ، ءوزىنىڭ دۇرىستىعىن دالەلدەپ، 5-كە تۇزەتەتىن. ءبىز قوڭىراۋ ۋاقىتىندا دوپ وينايتىن ەدىك، سوندا ءبىر ۇل جەتىسپەي قالىپ، ونى شاقىرعانىمىزدا، ءبىزدىڭ ماڭايىمىزعا قارامايتىن. ول ءۇشىن 4 الۋ ۇيات بولاتىن.

مەكتەپتە قوڭىراۋ ۋاقىتىندا ساباعىن جاقسى وقيتىن 5-6 قىزبەن وتىرىپ، ساباق جايىندا اڭگىمە ايتاتىن. ءبىز سەكىلدى كوشەدە جۇگىرىپ جۇرمەيتىن. بالا كۇنىمىزدە بۇزاقىلار ۇرىپ كەتەتىن، ول ءتىپتى جاۋاپ تا قايتارمايتىن. سوندا تاڭ قالاتىنمىن «مۇحتار، شاماڭ جەتەدى، نەگە ۇرمايسىڭ؟» دەپ. سوندا «ءبىلىم مىڭدى جىعادى، بىلەك ءبىردى شىعادى» دەگەن ءسوزدى مۇحتاردان العاش ەستىدىم.

مۇعالىمدەردەن «ساباق ايتايىنشى» دەپ ۇنەمى سۇرانىپ وتىراتىن. كۇن-تۇن دەمەي وقيتىن. ۇزدىك وقۋشى بولدى. مەكتەپتى 1977 جىلى بىتىردىك قوي، ول 30 جىلدىقتا كەلگەن جوق، شەتەلدە بولعاندىقتان سىيلىعىن جىبەرىپتى. مەكتەپكە ۇنەمى كومەگىن بەرىپ جۇرەدى.

اۋىلدا اكە-شەشەسى تۇرادى. اكەسى 80 جاستان استى. 

بۇگىن حابارلاسىپ ارالاسپاسام دا اتقارىپ جۇرگەن قىزمەتىن باقىلايمىن. بالا كۇنىندە «وقىسام، جەتسەم» دەپ جۇرەتىن. ءبىز كوڭىل دە بولمەيتىن ەدىك قوي. بىزگە دە «وقى، وقى، ىزدەن» دەپ جۇرەتىن مۇحتار ءوزىنىڭ ءدال ورنىندا وتىر. وزىنە لايىق جۇمىس تاپتى دەپ ويلايمىن.

تەلەديداردان كورىپ رازى بولىپ وتىرامىن. قىزمەتىنە كوڭىلىم تولادى. بۇرىندارى قالاي ادال بولسا، ءقازىر ءدال سولاي. ەشكىمنىڭ الا ءجىبىن اتتامايدى. ۇلتىنا قىزمەت ەتۋگە شىن بەرىلگەن ادام عوي. ءوزىن كورمەسەم دە، سىرتتاي رازى بولىپ جۇرەمىن.

***

سوۆەتحان اقىش ۇلىنىڭ جارى بولسا مۇحتاردىڭ قارىنداسى عاليامەن بىرگە وقىعان. ول دا وتباسىندا 8 اعايىندى بولىپ وسكەن مۇحتار ابرار ۇلىنىڭ مەكتەپتەگى ەڭ ۇلگىلى وقۋشى بولعانىن ەستەلىك ەتەدى.  ۇمىتقاجييەۆتەر وتباسىنىڭ ايتۋىنشا جوعارى بيلىكتە بولعانىمەن باۋىرلارى بيلىكتە قىزمەت ەتپەيدى. ابرار ۇلى بالا كەزىندەگى قاراپايىمدىلىعىنان ەش وزگەرمەگەن ادام.